Tuesday, June 12, 2018

Kamati ya watu wenye ulemavu Rukwa kutekeleza agizo la Waziri Mkuu.


Kamati ya watu wenye ulemavu Mkoa wa Rukwa imeaswa kuhakikisha inawatambua watu wenye ulemavu na kubaini mahitaji yao pamoja na kuona namna ya kutatua changamoto zao ili kuweza kuwasaidia katika kufikia malengo yao katika sekta mbalimbali za kimaendeleo.
“Katika Mkoa wa Rukwa tunachamoto kubwa juu ya namna ya kuwahudumia watu wenye ulemavu, kwani mara nyingi watu hawa wamekuwa wakileta malalamiko yao katika ofisi hii, hivyo uwepo wa kamati hii utapunguza sana changamoto wanazokabiliana nazo ndugu zetu hawa.”Hayo yamesemwa na Mkuu wa Mkoa wa Rukwa Mh. Joachim Wangabo alipokuwa akizindua kamati ya watu wenye ulemavu ngazi ya Mkoa.
Ameongeza kuwa ni matumaini ya serikali kuwa kamati hiyo itazisimamia kamati zote zilizopo chini yake kuanzia ngazi ya halmashauri, mitaa na vijiji ili kujua idadi ya watu wenye ulemavu kuanzia ngazi ya kitongoji hadi kufikia ngazi ya halmashauri na kupeleka taarifa ya utekelezaji wa majukumu yao kwa Ofisi ya Rais TAMISEMI.
Kwa upande wake akisoma taarifa ya kamati katibu wa kamati ya watu wenye ulemavu mkoa Godfrey Mapunda amezitaja changamoto mbalimbali zinazowakabili watu wenye ulemavu ikiwa ni pamoja na kutokuwa na taarifa sahihi juu ya haki zao, kutokuwepo kwa miundombinu isiyozingatia hali za watu wenye ulemavu zinazowapelekea kushindwa kushiriki kwenye shughuli mbalimbali za kijamii pamoja na Imani potofu kwa jamii inayowapelekea kushindwa kupata elimu na mahitaji muhimu.
Na kueleza majukumu ya kamati hiyo ikiwa ni pamoja na “Jukumu la kwanza itakuwa ni kutambua haki na uwezo wa watu walio na ulemavu katika mkoa lakini pia kuwasaidia watu wenye ulemavu na familia zao na kupanga mipango yenye ufanisi ili kupunguza umasikini kupitia shughuli za kujiingia kipato, kuratibu shughuli zote za watu wenye ulemavu katika mkoa, kulinda na kukuza ustawi wa watu wenye ulemavu katika Mkoa,” Alisema.
Hadi kamati hiyo inazinduliwa na Mkuu wa Mkoa asilimia 42 ya kamati za watu wenye ulemavu kuanzia ngazi ya Kijiji hadi halmashauri zilikuwa zimeshaundwa na walemavu 774 wamebanika huku maazimio ya kamati hiyo ikiwa ni kuhakikisha kamati zinaundwa kwa asilimia 100 na walemavu wote kutambulika na kuwa na takwimu sahihi ili kuweza kuwafikishia huduma stahiki.
Hii ikiwa ni utekelezaji wa agizo la Waziri Mkuu Mh. Kassim Majaliwa alilolitoa alipohudhuria hafla ya chakula cha mchana kwa watu wenye ulemavu iliyoandaliwa na Mkurugenzi Mtendaji wa Kampuni ya IPP, Bw. Reginald Mengi kwenye ukumbi wa Diamond Jubilee mapema mwezi wa pili mwaka 2018.

Tuesday, June 5, 2018

Sekta ya Afya Rukwa yatakiwa kuja na mikakati ya kumaliza matatizo ya uzazi


Katibu Tawala wa Mkoa wa Rukwa Benard Makali ameitaka sekta ya afya mkoani humo kuhakikisha wanaandaa mkakati wa kupunguza kama sio kumaliza kabisa tatizo la vifo vya watoto wachanga na akinamama vitokanavyo na matatizo ya uzazi.

Amesema kuwa mkakati huo utakamilika endapo kutakuwa na ufuatiliaji wa kila mwezi katika ngazi ya halmashauri pamoja na ufuatiliaji wa kila robo mwaka katika ngazi ya Mkoa ili kubaini changamoto mbalimbali zinazoibuka kila siku na kuona namna ya kuzitafutia ufumbuzi.


Katibu Tawala wa Mkoa wa Rukwa Benard Makali (….) kwatika picha ya pamoja na wakuu wa wilaya za mkoa wa Rukwa, Wakurugenzi wa halmashauri, waganga wakuu wa mikoa na timu za afya ngazi za halmashauri na mkoa. 


“Kwa mkoa wetu wa Rukwa, kwa mwaka 2017 kinamama 62 walipoteza maisha hii ni sawa na vifo 132 kati ya vizazi hai 100,000, na vifo vya watoto wachanga 15 kati ya vizazi hai 1,000. Kwa takwimu hizi hata kama tunaonekana tuna vifo vichache ikilinganishwa na viwango vya kitaifa bado sio nzuri, hivyo kuna kila sababu ya kuendelea kubuni na kutekeleza njia mbalimbali za kupunguza vifo hivi,” Alisema.

Aliyasema hayo alipokuwa akifungua kikao cha siku mbili cha kujadili vifo vya watoto wachanga na akinamama vitokanavyo na matatizo ya uzazi kilichowashirikisha wakuu wa wilaya, wakurugenzi wa halmashauri, waganga wakuu wa wilaya na timu za afya ngazi ya mkoa na wilaya.

Ameongeza kuwa Serikali ya awamu ya tano inatekeleza haya kwa vitendo juhudi za kupunguza vifo hivyo kwa kuendesha zoezi la ukarabati na upanuzi wa vituo vyote vya afya nchini ambapo Mkoa wa Rukwa umepatiwa shilingi Bilioni 2.9 kukarabati na kujenga vituo vya afya 6 ambapo kazi hiyo inaendelea vizuri.

Kwa upande wake akisoma risala kbala ya kumkaribisha mgeni rasmi mratibu wa huduma ya afya na uzazi mkoa wa Rukwa Asha Izina amesema kuwa madhumuni ya mkoa ni kupunguza kwa kiasi kikubwa vifo vitokanavyo na matatizo ya uzazi kwa wanawake na watoto chini ya umri wa miaka mitano na hasa wa chini ya mwaka mmoja na kuhakikisha makundi haya yanapata huduma muhimu Mkoa unatekeleza sera ya serikali ya kutoa huduma bila ya malipo.

“Katika kutekeleza maelekezo ya serikali, Mkoa kupitia ofisi ya mganga mkuu wa mkoa kwa kushirikiana na mradi wa UZAZI SALAMA Rukwa, tumeanza kufanya vikao vya kujadili vifo vya akinamama na watoto wachanga kila robo mwaka tangu mwanzoni mwa mwaka 2017 tukiwa na lengo la kuweka mikakati ya kukabiliana na vifo hivyo na hatimae kuokoa maisha ya akinamama na watoto wachanga,” Alisema.

Takwimu za mwaka 2015 – 2016 za utafiti wa viashiria vya huduma za afya na Malaria zinaonesha kuwa, vifo vitokanavyo na matatizo ya uzazi kitaifa ni 556 kwa kila vizazi hai 100,000 na vifo vya watoto wachanga ni 39 kwa kila vizazi hai 1,000.

Monday, June 4, 2018

Rukwa kushirikiana na Ireland kuongeza uzalishaji wa alizeti

Mkuu wa Mkoa wa Rukwa Mh. Joachim Wangabo (kulia) akipeana mkono na Balozi wa Jamhuri ya Ireland nchini Paul Sherlock muda mfupi baada ya maongezi ya mikakati ya kukuza uzalishaji wa zao la Alizeti Mkoani Rukwa.


Balozi wa Jamhuri ya Ireland Paul Sherlock amepokea maombi ya ushirikiano baina ya Ofisi ya Mkuu wa Mkoa wa Rukwa na nchi yake yaliyolenga kuongeza uzalishaji wa zao la alizeti mkoani humo jambo litakalopelekea kuinua kipato cha mkulima wa mkoa wa huo.


Maombi hayo yaliyowasilishwa na mkuu wa mkoa wa Rukwa Mh. Joachim Wangabo kwa balozi huyo mapema mwezi huu yalionyesha hali ilivyo ya uzalishaji wa zao hilo kwa sasa, ambapo kati ya hekta za shamba la Alizeti 0.5 hadi 2 huzalisha tani 1.1 badala ya tani 2.5.

“Nimefurahishwa sana na jitihada za Mh. Joachim Wangabo kwa kuona umuhimu wa kutafuta zao mbadala la biashara katika Mkoa wa Rukwa ikiwa ni pamoja na kuinua kulimo cha mkoa na kuinua kipato cha wakulima wadogo na hatimae kuwatafutia namna ya kuongeza viwanda vidogo na kuongeza ajira,” Alisema Balozi Sherlock.

Kwa upande wake Mh. Wangabo amesema kuwa zao la mahindi linazalishwa kwa wingi sana katika mkoa wake na wakulima hulichangamkia hilo zaidi ila bei ikitetereka wakulima hao wanakosa pa kujishika hivyo kwakuwa zao la alizeti ni la pili la kibiashara basi ni vyema kulitafutia mikakati liwe sawa na zao la mahindi ili wananchi wachague.

“Kwa mwaka 2016/2017 hekta 47,862 zililimwa alizeti na tukapata tani 53,470 ambayo ni chini ya kiwango tunachotakiwa kuzalisha kutokana na tafiti mbalimbali zilizofanywa kwa hekta 47,862 zikilimwa vizuri tunaweza kupata tani 119,655 ambayo ni ongezeko la asilimia 55, tunataka kufika huko, tuzalishe mafuta ya alizeti kwa wingi, kutengeneza ajira na kuongeza viwanda,” Alisema Mh. Wangabo.

Ameongeza kuwa kwa kufanya hivyo kutalipunguzia taifa mzigo wa kununua mafuta nje ya nchi jambo linalopelekea serikali kutumia pesa nyingi kufanya manunuzi na hatimae pesa hiyo kubaki kwa wakulima wetu.  

Mkoa wa Rukwa unatarajia kushirikiana na Shirika lisilo la kiserikali la Faida mali ambalo limefanikiwa kwa kiwango kikubwa kukuza zao la alizeti katika Mkoa wa Singida ili kuhamishia ujuzi huo katika Mkoa wa Rukwa.

Kwa mujibu wa Wizara ya Viwanda, Biashara na uwekezaji, Tanzania hutumia Shilingi bilioni 189.6 kila mwaka kununua mafuta ya kula nje ya nchi huku ikizalisha tani 91,000 ambayo ni sawa na asilimia 40 za mafuta hayo tofauti na makadirio ya tani 200,000 hadi 300,000 ya uhitaji wa bidhaa hiyo kwa mwaka.


Wednesday, May 30, 2018

RC Wangabo kutumia nguvu ya dola kukomesha Kipindupindu


Mkuu wa Mkoa wa Rukwa Mh. Joachim Wangabo amesema atalazimika kuwatumia polisi kusimamia zoezi la usafi na ujenzi wa vyoo salama katika Kijiji cha Namasinzi, kata ya Kapenta, bonde la ziwa Rukwa Wilayani Sumbawanga baada ya wananchi hao kushindwa kujenga vyoo hivyo mbali na elimu ya umuhimu wa vyoo waliyopewa kwa muda mrefu.

Mkuu wa Mkoa wa Rukwa Mh. Joachim Wangabo (kulia) akikabidhi tenki la lita 5000 kwa mwenyekiti wa kitongoji cha Liweliyamvula, Kijiji cha Lumbesa, Kata ya Kapenta, Wilayani Sumbawanga Paulo Maufi, ikiwa ni miongoni mwa juhudi za serikali kuhakikisha wananchi wanapata maji safi na salama na kuhifadhiwa sehemu salama, kuepukana na kipindupindu. 


Amesema kuwa ikifikia hatua hiyo Kijiji hicho kitafungiwa na hakuna atakayetoka wala kuingia na hatimae kusitisha shughuli za kiuchumi za Kijiji hicho ambacho ni maarufu kwa kilimo cha mpunga hali itakayopelekea maisha magumu kwa wananchi hao jambo ambalo asingependa litokee.

Katika kuhakikisha hali hiyo haitokei Mh. Wangabo alimuagiza Mkuu wa Wilaya ya Sumbawanga Dk. Khalfan Haule na timu yake ya usafi ya halmashauri kuhakikisha wanapita kaya kwa kaya ili kuzibaini kaya zisizopenda usafi na zisizokuwa na vyoo na kuzichukulia hatua za kisheria kwani kwa kushindwa kufanya hivyo kipindupindu hakitamalizika katika bonde hilo.

“Sasa tutatumia nguvu ya dola, ili kuhakikisha kwamba kila mtu anaishi katika maisha ya usafi wala sio uchafu, na kila mtu ahakikishe kwamba anakuwa na kiboko Fulani ambacho ni kigumu amuone mtu anachemsha maji, anayaweka maji yake yanapoa akienda shambani anakwenda na maji mbayo yamekwisha poa, lakini mkilea lea hivi, waswahili wanasema ukicheka na nyani unavuna mabua, mabua ambayo tunayavuna ni vifo.” Alisisitiza.

Aliyasema hayo katika Mkutano wa hadhara alioufanya katika  kijiji cha Namasinzi, Kata ya Kapenta, Wilayani Sumbawanga, kijiji ambacho wananchi watatu wamefariki kwa ugonjwa wa kipindupindu na wengine wakiendelea kupatiwa huduma. 

Kwa upande wake Mganga Mkuu wa hlamshauri ya Wilaya ya Sumbawanga Dkt. Fani Musa aliendelea kuishukuru serikali kwa kuendelea kupeleka misaada katika bonde hilo ili kuhakikisha wanakabiliana na ugonjwa huo na kusisitiza kuwa wataendelea kutoa elimu bila ya kuchoka akiamini kuwa wananchi hao wataelewa wakiendelea kusimamiwa.

“Serikali imekuwa ikifanya kazi tatu kwa wakati mmoja, tumekuwa tukitoa elimu ya ugonjwa huu kwa lengo la kuzuia haya yasitokee, lakini yakitokea tunatumia nguvu kubwa ya kukabiliana na tatizo hili lakini pia serikali inatoa dawa za kutosha ili kuweza kuponya pia, ugonjwa wa kipindupindu ni kitendo cha kula kinyesi ambacho ni kibichi, hivyo watu ni muhimu kujenga vyoo salama,” Alimalizia.

Tangu kulipuka kwa ugonjwa huo tarehe 6 Mei, 2018 watu 14 wameshafariki na wengine 221 wakiendelea na kupatiwa matibabu katika kambi za wagonjwa hao katika bonde la ziwa Rukwa.

Wednesday, May 23, 2018

Watendaji wanaochangia kuenea kipindupindu Rukwa kushughulikiwa




Mkuu wa Mkoa wa Rukwa Mh. Joachim Wangabo amesema
hatamvumilia mtendaji wa serikali atakaechangia kuenea kwa ugonjwa kipindupindu
katika mkoa kwani elimu ya ugonjwa huo imeshatolewa kwa muda mrefu hivyo ni
jukumu la kila mtendaji kuhakikisha ugonjwa huo unatokomezwa.

Amesema kuwa kumekuwa na tabia iliyojengeka ya watendaji
kuanza kufanya majukumu yao baada ya mlipuko wa ugonjwa huo kutokea na kuonya
kuwa kaya ambayo haitakuwa na choo katika ngazi ya Kijiji basi mtendaji wa Kijiji
atawajibishwa.

“Wakati hatua mbalimbali zikiendelea kuchukuliwa, tukikidhibiti
kipindupindu halafu kikatokea tena hapo mahali ambapo kimetokea hatutapaelewa, watendaji
wetu wakitilia maanani  wakahakikisha
kaya zetu zina vyoo na kuchemsha maji hatuwezi kuwa na kipindupindu, sasa
kinatokea kipindupindu halafu kaya haina choo, mtendaji wa Kijiji hicho hana
sababu ya kuwa mtendaji,” Alisisitiza.

Ameyasema hayo alipokuwa akifunga kikao cha dharura
kilichoitishwa na kamati ya afya ya mkoa ili kujadiliana juu ya mbinu za
kutokomeza ugonjwa huo ambao umeathiri zaidi ya watu 600 tangu kulipukwa kwake
mwezi November mwaka 2017 na kutoweka mwezi Machi mwaka 2018 na hatimae kuibuka
tena tarehe 6, Mei mwaka 2018.

Kikao hicho kilichojumuisha, Wakuu wa ilaya, Wakurugenzi wa halmashauri,
Wenyeviti wa halmashauri, madiwani, kamati ya ulinzi na usalama ya mkoa na wilaya,
Maafisa Afya wa mkoa na halmashauri, wataalamu wa afya pamoja na waganga wakuu
wa wilaya na mganga mkuu wa mkoa kiliazimia kutokomeza ugonjwa huo na kuweka
mikakati ya kutorejea tena wa ugonjwa huo.

Akisoma baadhi ya maazimio Katibu Tawala wa Mkoa Benard
makali amesema kuwa kamati ya afya za vijiji na vitongoji zisimamiwe kutenda
majukumu yake kwani wao ndio wanaojuana zaidi katika utekelezaji wa maagizo na
sheria za serikali kuanzia ngazi hizo na kuitaka kamati za afya za Wilaya kuwa
na mbinu za kudumu za kuthibiti ugonjwa huo na kutaka elimu zaidi iendelee
kutolewa.

Tangu kulipuka tena kwa ugonjwa huo tarehe 6, Mei mwaka 2018
wagonjwa 9 wamefariki na wengine 214 wakiendelea kupatiwa matibabu katika vituo
mbalimbali vya Halmashauri ya Wilaya ya Sumbawanga ambayo imeathirika zaidi
huku wananchi wake wakiwa na asilimia 36 ya umiliki wa vyoo bora.

Mganga Mkuu Rukwa atoa elimu ya kina ya Kipindupindu Rukwa

Tuesday, May 22, 2018

Saba Wafariki kwa kipindupindu Rukwa.




Mkuu wa Wilaya ya Sumbawanga Dkt. Khalfan Haule
amethibitisha kufariki kwa wagonjwa saba wa kipindupindu katika Wilaya ya
Sumbawanga huku wagonjwa wengine 44 wakibaki wodini kuendelea kupatiwa matibabu
na wagonjwa 115 wakiruhusiwa kurudi nyumbani.

Amesema kuwa ugonjwa huo umelipuka tarehe 6 Mei, 2018 katika
Kijiji cha Mayenje, kata ya Milepa katika bonde la ziwa Rukwa na kusambaa
katika meneo mengine ya Wilaya na hatimae kupatikana kwa wagonjwa wawili katika
hospitali ya rufaa ya mkoa.

“Sasa hivi katika bonde la ziwa Rukwa kuna shughuli za
uvunaji wa mpunga na hivyo watu wengi hutokea huku juu kwenda bondeni kutafuta
vibarua vya kuvuna mpunga kwenye maeneo hayo yaliyoathirika na kipindupindu,
maji yanayotumika huko ni machafu kutoka katika madimbi na mito nawaomba
viongozi wa dini watoe tahadhari kwa waumini hasa katika maeneo yale
yalioathirika zaidi,” Alisema.

Alisema hayo alipopewa nafasi ya kutoa taarifa hiyo ya
ugonjwa wa kipindupindu na Mkuu wa Mkoa wa Rukwa Mh. Joachim Wangabo wakati wa
Mkutano uliowakutanisha wadau wa afya Mkoani hapa kwaajili ya kuzungumzia
tahadhari ya ugonjwa wa Ebola uliopo katika nchi ya jirani ya Kongo.

Kwa upande wake Mh. Wangabo alisema kuwa elimu ya tahadhari
itatolewa kwa wananchi kupitia mikutano mbalimbali ya hadhara ya wakuu wa wilaya,
madiwani pamoja na wakurugenzi ili ifikie hatua ya kusema “kipindupindu sasa
basi”.


Wanarukwa watolewa mashaka kuhusu Ebola.




Mkuu wa Mkoa wa Rukwa Mh. Joachim Wangabo amewatoa mashaka wanarukwa
juu ya kutokuwepo kwa ugonjwa wa Ebola katika Mkoa na kutahadharisha yeyote anaejaribu
kuleta hofu ya ugonjwa huo katika Mkoa na kuwataka wananchi wasijengewe hofu
bali waendelee kuchukua hatua za tahadhari za kujikinga na ugonjwa huo.

Amesema kuwa Mkoa unaendelea kushirikiana na sekta
mbalimbali katika kuimarisha ufuatiliaji na kutekeleza mikakati ya udhibiti ikiwemo
kutoa taarifa na elimu kwa jamii kwa kadiri itakavyohitajika ili ugonjwa huo
usiingie katika mkoa.

“Katika kipindi hiki ambacho tunatakiwa kuchukua tahadhari
kubwa, wananchi wote wa Mkoa wa Rukwa ni lazima tuwe na mshikamano, umoja na
tahadhari kubwa sana na hasa maeneo yale ya Ziwa Tanganyika ambako kuna
muingiliano wa watu kutoka Zambia, DRC, Rwanda na Burundi. Lakini pia
wanaotokea maeneo mengine ya nchi, la muhimu ni kuchukua tahadhari kubwa sana,”
Alisema

 Ameongeza kuwa
wenyeviti wa vijiji wajizatiti katika kuboresha taarifa za wakazi wao kwenye madaftari
yao na kuwa makini na wageni wanaoingia kwenye maeneo yao pamoja na kuitaka
idara ya uhamiaji kuhakikisha wageni wote wanaingia katika njia zilizo rasmi.

Ameyasema hayo alipokuwa akifungua kikao cha wadau wa afya
Mkoa kilichoitishwa na Mganga Mkuu wa mkoa ili kutoa elimu kwa wawakilishi wa
makundi mbalimbali ya jamii ikiwemo waandishi wa habari juu kusambaza ujumbe
huo wa kujihadhari na ugonjwa huu hatari wa Ebola.

Mmoja wa wadau hao akiwakilisha kundi la wazee, Zeno Nkoswe
amesema kuwa serikali ya Mkoa haina budi kuhakikisha elimu hiyo inafikishwa kwa
viongozi wote wa dini kwani wao wanauwezo wa kuwafikia wananchi wengi zaidi na
kwa muda ufupi na ujumbe hatimae kutimiza malengo ya kufisha ujumbe huo kwa
wananchi.

Akichangia mjadala huo mwenyekiti wa Chama cha Demokrasia na
Maendeleo (CHADEMA) Mkoa wa Rukwa, Sadrick Malila amesema kuwa serikali haina
budi kutumia redio zilizopo Mkoani Rukwa ili kufikisha ujumbe huo kwa watu wote
na maeneo yote ya Mkoa na mikoa ya jirani ili watu waweze kujikinga na ugonjwa
huo.

Ugonjwa wa Ebola upo katika nchi ya jirani ya Jamhuriya watu
wa Kongo katika mji wa Biroko, jimbo la Equator na kwa taarifa za shirika la
afya duniani, hadi kufikia tarehe 17 Mei, 2018 watu 44 walikuwa wamebainika
kuwa na ugonjwa huo na watu 23 kufariki.


Monday, May 14, 2018

RC Wangabo aagiza DED kuchunguzwa



Mkuu wa Mkoa wa Rukwa mh. Joachim Wangabo amemuagiza Katibu Tawala
wa Mkoa kuanzisha mchakato wa kinidhamu na uchunguzi mara moja dhidi ya
Mkurugenzi wa Halamashauri ya Wialaya ya Kalambo kutokana na utendaji kazi wake
usioriddhisha.

Amesema kuwa mkurugenzi huyo amekuwa akichelewesha juhudi za
serikali baada ya kushindwa kumaliza ujenzi wa upanuzi wa kituo cha afya cha Mwimbi
kwa wakati na kuchelewa kuanza ujenzi wa kituo kipya cha afya cha Legeza mwendo
hata baada ya kupatiwa Shilingi Bilioni 1.1 na serikali kwaajili ya vituo vyote
viwili vilivyopo katika halmashauri hiyo.

“Huyu mkurugenzi wa Halmashauri ya Wilaya ya Kalambo
utendaji wake siridhwi nao hata kidogo katika mazingira ya sekta ya afya kwa
ujumla wake, ujenzi na ukarabati wa miundombinu katika kituo cha afya cha
Mwimbi ulianza mwezi wa nane mwaka 2017 mpaka leo naongea hapa mwezi wa tano
mwaka 2018 kituo cha afya kile bado hakijakamilika,” Alisema
Ameyasema hayo alipokuwa akiongea na wauguzi katika siku yao
ya wauguzi duniani iliyoadhimishwa kimkoa katika kata ya Laela, Wilaya ya
Sumbawanga.

Tuesday, May 8, 2018

Miradi ya Tsh. Bilioni 20 kupitiwa na Mwenge wa Uhuru Rukwa.




Mwenge wa Uhuru wa Tanzania unaratajiwa kuweka mawe ya
msingi, kukagua na kuzindua miradi yenye thamani ya shilingi 20,499,194,866 Mkoani
Rukwa ikiwemo miradi ya maendeleo 43 na vikundi 48 katika kutekeleza malengo ya
serikali ya awamu ya tano nchini.

Hayo yamesemwa na Mkuu wa Mkoa wa Rukwa Mh. Joachim
Wangabo alipokuwa akisoma hotuba ya mapokezi ya mwenge huo wa Uhuru katika Kijiji
cha Kizi mpakani na Mkoa wa Katavi.

Mh. Wangabo alibainisha kuwa katika fedha hizo wananchi
wamechangia shilingi 654,373,600, halmashauri zikiwa zimechangia shilingi
323,187,500, na serikali kuu nayo ikiwa imechangia 15,958,184,766 huku wadau
wengine wakiwa wamechangia shilingi 3,563,499,000.

Aidha Mh. Wangabo alimpongeza Mkuu wa Mkoa wa Katavi kwa
kumaliza kukimbiza mwenge ukiwa salama na kuwatunza wakimbiza mwenge na kuingia
katika MKoa wa  Rukwa wakiwa na afya
nzuri na kumuhakikishia kuukimbiza mwenge huo wa uhuru kwa amani na usalama
katika kipindi chote ukiwepo katika Mkoa wa Rukwa

“nikuhakikishie kuwa Wakimbiza Mwenge wote wa Kitaifa
mliotukabidhi tutawalea, tutawatunza na kuwaenzi na kuhakikisha kuwa
wanahitimisha Mbio za Mwenge katika Mkoa wetu kwa amani na utulivu.” Alisema.

Mwenge wa uhuru wa mawaka huu ukiwa umebeba kauli mbiu ya
‘Elimu ni ufunguo wa maisha; Wekeza sasa kwa maendeleo ya Taifa letu’ Mh.
Wangabo amesema kuwa wanafunzi waliojiunga na darasa la kwanza kwa shule za
msingi wamevuka maoteo ambapo wanafunzi 50,887 sawa na asilimia 106, huku
wanafunzi wa shule ya awali wakifikia 39,486 ambayo ni sawa na asilimia 92 ya
maoteo.

Mkoa wa rukwa ni mkoa wa sita kutembelewa na mwenge wa
uhuru tangu kuwashwa kwake mkoani Geita mwanzoni mwa mwezi wan ne mwaka huu, na
kutegemewa kukimbizwa kwa zaidi ya kilomita 721 katika Halmashauri nne ndani ya
mkoa wa Rukwa.


Tuesday, May 1, 2018

Mufti wa Tanzania apongeza ushirikiano baina ya waislamu na serikali ya ...


Shekhe Mkuu na Mufti wa Tanzania Aboubakar Bin Zuber Bin Ali amepongeza ushirikiano uliopo baina ya baraza la waislamu la Mkoa  pamoja na serikali ya Mkoa wa Rukwa katika kutatua kurekebisha au kuyaweka sawa masuala mablimbali kwa maslahi ya watanzania.
“siku zote huwa nawaamnbia viongozi wangu hawa wa baraza kwamba wafanye kila wanachokifanya lakini wahakikishe kuwa wanajenga mahusiano mazuri na serikali ya mahala walipo, baada ya kujenga mahusiano na wananchi wa dini zote basin a serikali pia na katika eneeo hili ninapowauliza panaonesha pana mashirikiano mazuri, cha kusema ni kwamba ushirkinao na uhusiano uendelee na udumu vizuri kwasababu ndio utakaoweza kujenga nchi yetu katika masuala yote ya maendeleo,” alisema.
Wakati akisoma taarifa ya Mkoa, mwakilishi wa mkuu wa Mkoa wa Rukwa ambaye ni Mkuu wa Wilaya ya Sumbawanga Dkt. Khalfan Haule amepongeza juhudi mbalimbali zinazofanywa na waislamu katika kuiletea nchi maendeleo na kumuomba mufti wa Tanzania kuikumbuka Rukwa katika mipango yao mbalimbali ya uwekezaji katika sekta ya afya, maji, elimu na viwanda.
“Baada ya serikali kutangaza elimu bure kuna mafuriko ya wanafunzi huko mashuleni, hii inaonesha kwamba bado miundombinu ya elimu bado haitoshelezi hivyo tunahitaji kwenye eneo hilo ushirikinao wa kujenga shule za msingi, sekondari na hata vyuo, sisi ni eneo la pembezoni lakini tunapenda kuliita eneo la kipaumbele hivyo kwenye mipango yako basi utuweke kwenye eneo la kipaumbele,” Alisema.
Mufti wa Tanzania atafanya ziara ya siku mbili katika Wilaya ya Sumbawanga pamoja na Nkasi, akizindua na kuweka mawe ya msingi katika misikiti pamoja na kituo cha afya kilichopo kata ya kirando, Wilayani Nkasi.

Monday, April 30, 2018

Mufti wa Tanzania aiombea dua Rukwa

Mwananchi ashangazwa na visanduku vya maoni serikalini


Mwananchi wa Kijiji cha Mtowisa, Kata ya Mtowisa, Tarafa ya Mtowisa, Wilayani Sumbawanga Pius Wapinda ameshangazwa na kitendo cha taasisi mbalimbali za kiserikali kuweka visanduku kwaajili ya kukusanyia maoni ya wananchi lakini hakuwahi kupata mrejesho wa maoni hayo kufanyiwa kazi.
Mwananchi huyo aliiomba serikali kuyafanyia kazi maoni hayo na kufanya mrejesho kupitia mikutano na vikao mbalimbali vinavyofanywa na serikali katika ngazi tofauti ili wananchi wawe na moyo wa kuendelea kutoa maoni hayo pindi wanapoona yanafanyiwa kazi.
“ukipita kwenye maofisi ya kiserikali kuna masunduku mbalimbali pale, yale masanduku ya maoni mimi huwa sioni kama yana maana yoyote na sijui yanatusaidia kitu gani maana sioni mrejesho wake, ningependelea kwenye mikutano kama hii wangekuwa wanatuambia kuanzia mwezi wa kwanza hadi wa kumi tumepokea maoni kadhaa na mrejesho wake ni huu hapa,” Alieleza.
Nae Afisa utumishi wa Halamashuri ya Wilaya ya Sumbawanga Hamis Mangale alisema kuwa ni mwezi mmoja tu tangu akabidhiwe ofisi hiyo na hakufahamu kama utaratibu wa dawati la malalamiko halifanyiwi kazi hivyo aliahidi mbele ya Mkuu wa mkoa wa Rukwa Mh. Joachim Wangabo kulichukua hilo na kuhakikisha wanalifanyia kazi ili kukata kiu ya wananchi ambao wengi wamekuwa na malalamiko yanayohusu masuala ya mapenzi.
Katika Kusisitiza hilo Mh. Wangabo alisema kuwa maoni hayo ni vyema yakachukuliwa na taasisi husika ikiwa ni hospitali kuna kamati ya afya, yajadiliwe katika kamati hiyo na hatimae wananchi wapatiwe mrejesho katika vikao mbalimbali kuanzia ngazi ya Kijiji hadi kata.  

Friday, April 20, 2018

Wenyeviti wa vijiji wapewa onyo kali kuhusu vitambulisho vya NIDA


Mkuu wa Mkoa wa Rukwa Mh. Joachim Wangabo amewaonya vikali wenyeviti wa vijiji wananojihusisha na kuwajazia watu wasio raia wa Tanzania fomu za mamlaka ya vitambulisho vya taifa (NIDA) ili kuhalalisha uwepo wao katika nchi na kuongeza kuwa kufanya hivyo ni ukiukwaji wa sheria.
Pia aliwaasa wananchi kuwa macho na wale wanaopewa fomu hizo hali ya kuwa sio raia na hawastahili kupewa vitambulisho hivyo na kuwasisitiza kuwa walinzi wa kwanza wa taifa la Tanzania ili wananchi ambao ni raia wa Tanzania wanaostahili kupata fomu hizo ndio wapatiwe.
“Mwenyekiti yoyote wa Kijiji akibainika amemwandikisha mtu amabae sio raia, ambae hastahili na hana vibali husika vinavyomruhusu apate kitambulisho cha taifa, ukibainika tunakukamata tunakuweka ndani, halafu tunakufungulia mashataka kwasababu utakuwa msaliti na unalisaliti taifa letu, na nyie wananchi ndio macho yetu yeyote mnaeona sio raia na amepewa fomu muwekeeni kipingamizi, kwasababu sheria inaruhu,” Alisema.
Aliyasema hayo alipokuwa akizungumza na wananchi wa Kijiji cha mtowisa, kata ya mtowisa, wilayani Sumbawanga alipokwenda kutemebelea na kuijionea miradi kadhaa ya kimaendeleo inayoendelea kutolewa katika ukanda  wa bonde la ziwa Rukwa.
Kwa upande wake Mratibu wa Mamlaka ya Vitambulisho vya taifa (NIDA)Mkoani Rukwa Emanuel Mjuni amesema kuwa katika kata ya Mtowisa wanatarajia kuwaandikisha wananchi 5,430 na kusisistiza kuwa wale wasiokuwa wakazi wa kata hiyo hawana vigezo vya kupata fomu na hatimae kukosa vigezo vya kupata vitambulisho hivyo vya taifa.
“Kama tukiwaandikisha wananchi ambao hawaishi kwenye maeneo yetu wale wananchi ambaotumewaandalia fomu hizo watakosa, kama Mh. Mkuu wa Mkoa alivyosema wale wenyeviti na watendaji wa vijiji wasimamie kwa makini kuhakikisha yule anaepata fomu ni mkazi halali wa eneo husika na zoezi hili linafanyika nchi nzima hivyo basi wale ambao wapo huku kibiashara ama kwa mambo mengine warudi kwenye maeneo yao ili waandikishwe, ili wasikose vitambulisho,” Alisisitiza.
Majibu hayo yaliibuka baada ya maswali kadhaa kutoka kwa wananchi Pius Wapinda na Paulo Chipeta waliotaka kujua endapo ni ruhusa kwa wafanyabiashara kuchukua fomu za maombi ya vitambulisho vya taifa katika eneo ambalo zoezi hilo limemkuta ili aweze kuchukua fomu na kupata kitambulisho na hatimae kuwa na utambulisho wa uraia wa nchi yake na pia hatua zitakazochukuliwa kwa wenyeviti watakaokiuka taratibu za kutoa fomu.

Mti wamshangaza Mkuu wa Mkoa wa Rukwa.

Thursday, April 19, 2018

wasichana zaidi ya 26,000 kupata Chanjo ya HPV, Rukwa




Zaidi ya Wasichana 26,000 wenye umri wa miaka 14 wanatarajia
kupatiwa chanjo ya kuzuia saratani ya mlango wa kizazi mkoani Rukwa ikiwa ni
juhudi za serikali ya mkoa kuwakinga wasichana hao kutokana na madhara makubwa
yanayoweza kuwapata pindi wanapofikia umri wa utu uzima.
Hayo yamesemwa na Mkuu wa Mkoa wa Rukwa Mh. Joachim Wangabo
alipokuwa akifungua kikao cha wadau wa chanjo ngazi ya mkoa kwaajili ya
maandalizi ya utoaji wa chanjo mpya ya kinga dhidi ya saratani ya mlango wa
kizazi kwa wanawake mkoani Rukwa.
 “Kwa Mkoa
wetu wa Rukwa, jumla ya wasichana 26,234 wanatarajiwa kupatiwa chanjo hii
muhimu, Wazazi na Walezi, wahakikishe kuwa watoto wa umri
wa miaka 14 wanaenda katika vituo vya kutolea huduma za chanjo kupata chanjo.
Naomba kuwahakikishia wananchi kuwa chanjo zinazotolewa katika vituo vyetu ni
salama na zinatolewa na wataalamu wenye uzoefu waliopatiwa mafunzo,” Alisema.

Nae Mganga mkkuu wa Mkoa wa Rukwa Dkt. Boniface Kasululu amesema
kuwa zoezi hilo linatarajiwa kuanza katika wiki ya mwisho wa mwezi wanne ambayo
itakuwa ni wiki ya chanjo ya saratani ya mlango wa kizazi kwa nchi nzima ambapo
uzinduzi wake ulifanyika tarehe 10, Aprili mwaka huu.

 Pia ametaja sababu
kadhaa zinazosababisha ugonjwa huo ikiwemo watoto wa kike kushiriki tendo la
ndoa wakiwa katika umri mdogo, kuwa na wapenzi wengi, uvutaji wa sigara na
kuonya kuwa dalili zake hujitokeza baada ya saratani hiyo kusambaa mwilini.

“Baadhi ya dalili za saratani ya
mlango wa kizazi ni pamoja na kutokwa damu ya hedhi bila mpangilio, kutokwa
damu baada ya tendo la ndoa, maumivu
ya mgongo, miguu na/au kiuno, kuchoka,
kupungua uzito, kukosa hamu ya kula, kutokwa
uchafu wa rangi ya kahawia au wenye damu ukeni na kuvimba miguu,”Alisema.

Kwa upande wao mwakilishi wa viongozi wa dini ambae ni
katibu wa Bakwata Mkoani Rukwa Mohamed Adam amesema kuwa kama viongozi wa dini
watahakikisha wanakuwa mstari wa mbele katika kuwahamasisha waamini wao
kujiunga na juhudi za serikali katika kupunguza vifo vinavyosababishwa na
saratani ya mlango wa kizazi.

Imeelezwa kuwa, nchini Tanzania zaidi ya asilimia 36 ya
wagonjwa wa saratani wanaugua saratani ya mlango wa kizazi ikiwa na wastani wa
wagonjwa 51 kwa kila kinamama 100,000, na kuongoza kwa kusababisha vifo
ikifuatiwa na saratani ya matiti ambazo kwa pamoja husababisha zaidi ya
asilimia 50 ya vifo vyote vya akina mama vitokanavyo na saratani.

Monday, April 9, 2018

RC Wangabo afanikisha kupatikana Ekari 3 kujenga nyumba za polisi Mtowisa




Mkuu wa Mkoa wa Rukwa Mh. Joachim Wangabo amefanikisha kupatikana
kwa ekari 3 ili kujengwa kwa nyumba za askari polisi katika eneo la karibu na
kituo cha polisi kipya kinachomaliziwa kujengwa katika kata ya Mtowisa,
Wilayani Sumbawanga na kurahisisha makazi ya polisi katika bonde la ziwa Rukwa.
Hayo yamejiri ikiwa ni utekelezaji wa ahadi ya wananchi wa
kata ya Mtowisa kwa Mkuu wa Mkoa waliyoiahidi tarehe 13.11.2017 Mh. Wanagabo
alipofanya ziara katika eneo hilo na kudai kuwa usalama wa bonde hilo sio mzuri
kwa kukosa kituo bora cha polisi na makazi yao na kupelekea kuanzisha ujenzi wa
kituo na hatimae kuomba nguvu ya Mkuu wa Mkoa kuweza kumalizia ujenzi huo.
“Nilipokuja mwaka jana tuliwekeana agano na mkasema
mtatafuta eneo kwaajili ya ujenzi wa nyumba za polisi ya kwangu nimekamilisha
Milioni 5 mlizohitaji kumalizia ujenzi wa kituo cha polisi sasa bado zamu yenu,”
Mh. Wangabo alisema.

Mtendaji wa Kata ya Mtowisa Paulo Katepa alimuhakikishia MKuu
wa Mkoa kuwa eneo hilo limeshapatikana na tayari kwa kukabidhi kwa askari
polisi kwaajili ya taratibu nyingine za kisheria na kumuhakikishia kuwa eneo
hilo halihitaji fidia ya aina yoyote na kwamba wananchi wa Kijiji cha Mtowisa
wameridhia bila ya kusukumwa, na kufanya yote kwaajili ya usalama wao na wa
mali zao.

Kwa upande wake Kamanda wa Polisi wa Mkoawa Rukwa ACP George
Kyando amekiri kupokea eneo hilo la ekari 3 na kuahidi kuwatuma vijana wake ili
waanze maandalizi ya kuweka alama zinatakazobainisha eneo hilo na maeneo
mengine ili waendelee na taratibu nyingine za kisheria ili kumiliki eneo hilo
kihalali.

RPC Rukwa atahadharisha mauaji kwa wivu wa mapenzi

Thursday, March 29, 2018

RC Wangabo azigeukia NGOs na CSOs kuhamasisha uanzishwaji wa viwanda kupambana na umasikini

Mkuu wa Mkoa wa Rukwa Mh. Joachim Wangabo
Mkuu wa Mkoa wa Rukwa Mh. Joachim Wangabo amezitaka asasi za kiraia na mashirika yasiyo ya kiserikali kuchukulia juhudi za uanziswaji wa viwanda nchini unaofanywa na serikali kama suala mtambuka na ukombozi kwa mwananchi katika kupambana vita dhidi ya Umasikini huku wakizingatia utunzaji wa mazingira na kushirikiana na SIDO.
Amesema kuwa takwimu zinaonesha kwamba takribani hekta 300,000 hadi 400,000 za misitu nchini huharibiwa kwa kuchoma Mkaa. Hivyo njia nyingine na muhimu kuokoa mazingira yetu ni kwa kuanzisha viwanda vya kutengeneza Mkaa kwa kutumia marando ya Mbao, Pumba za Mpunga, Mabua ya mahindi n.k. malighafi ambazo hupatikana kwa wingi Mkoani kwetu.
 “Kwa sababu hiyo ninapenda kutoa wito kwa NGOs na CSOs kushiriki kwenye kampeni hii ya uanzishwaji wa viwanda yenye kaulimbiu ya Mkoa wetu, Viwanda vyetu kwa kuanzisha viwanda. Viwanda tunavyovilenga ni vile vidogo vya thamani ya kuanzia milioni 2 hadi Milioni 10,” Alisisitiza.
Kwa upande wake Meneja wa SIDO Emanuel Magere amesema kuwa asasi pamoja na mashirika hayo yamekuwa yakitoa elimu mbalimbali kutegemea matatizo ama changamoto za wananchi lakini imefika wakati kutambua kuwa, wananchi hao wanahitaji pia elimu ya ujasiliamali ili kuanzisha viwanda, na kuziomba taasisi za fedha kuweza kutoa mikopo kwa wanaohitaji kuanzisha viwanda.
“Mwamko katika uazishwaji wa viwanda sio mkubwa sana, wengi wamekuwa wakijiwekeza kwenye sekta ya huduma mfano, mashule, migahawa, maduka na huduma mbalimbali ambayo “return” yake inakuwa ya haraka kuliko viwanda na pia changamoto ya masoko ya bidhaa za ndani ya mkoa kutoka kwa bidhaa za nje ya mkoa ama nje ya nchi imekuwa ni changamoto kwa mkoa,” Alimalizia.
Katika kuhimiza ushirikiano Mkuu wa Wilaya ya Nkasi Mh. Said Mtanda amezitaka NGO na CSO hizo kuweza kufika kwenye ofisi za kiserikali ili kuweza kujitambulisha shughuli wanazofanya na kujitokeza kwenye songambele mbalimbali zinazofanywa na halmashauri katika ujenzi wa madarasa ya shule na vituo vya afya ili michango yao ijulikane na sio kusubiri kutafutwa na serikali.
Katika utekelezaji wa viwanda 100, ndani ya kipindi cha miezi minne kuanzia Disemba mwaka 2017 hadi 26, Machi, 2018 Mkoa wa Rukwa umezalisha viwanda vidogo 51 huku lengo la Mkoa ni kuwa na viwanda vingi zaidi ili kuchangia kwa kiasi kikubwa lengo la Kitaifa la kufikia nchi ya Uchumi wa Kati wa Viwanda ifikapo 2025.

Thursday, March 8, 2018

Wakurugenzi wasiotenga fedha za mikopo kwa wanawake kufikia June kutumbu...


Waziri wa Afya, Maendeleo ya Jamii, Jinsia, Wazee na Watoto  Mh. Ummy Mwalimu ametoa miezi mitatu kwa
wakurugenzi wote nchini kuhakikisha wanatenga asilimia 4 za fedha za
halmashauri kwaajili ya kuwapa wanawake mikopo ili waweze kujikwamua kiuchumi
na kuunga mkono juhudi za serikali katika uchumi wa viwanda.

Amesema kuwa serikali haitasita kuwawajibisha wakurugenzi
watakaokiuka maelekezo ya serikali yanayolenga kutekeleza ahadi za Mheshimiwa
Rais kwa wananchi ili kuwawezesha wanawake wa mijini na vijijini kiuchumi na
hatimae kujiongezea kipato na kuwezesha uchumi wa viwanda.

“Linapokuja suala la kuwawezesha wanawake kiuchumi
hatutanii, chama cha mapinduzi tumepewa kura na wanawake wa Tanzania hasa
wanawake wa vijijini na tumewaahidi wanawake kwamba tutawapa mikopo yenye
masharti nafuu, kwahiyo pale ambapo mkurugenzi anashindwa kutenga fedha
kwaajili ya kuwapatia wanawake mikopo hatutaelewana, na tunasubiri mpaka tarehe
30 June 2018 wakurugenzi wote ambao hawajatenga fedha na kuzitoa kwaajili ya
wanawake  tutapeleka majina yao kwa Mh.
Rais Dk. John Pombe Magufuli,” Mh. Ummy alisisitiza.

Halikadhalika Mh. Ummy amepiga marufuku suala la kutoa fedha
ndogo kwa kikundi kikubwa cha kinamama huku akitolea mfano kikundi cha watu
sita kupewa 300,000 kuwa haitawasaidia kinamama hao katika juhudi za kujikwamua
kiuchumi na kuongeza kuwa ni heri fedha hizo zikabaki kwa mkurugenzi ili ifanye
shughuli nyingine lakini sio kuwakwamua kinamama.

Ameyasema hayo katika maadhimisho ya kilele cha Siku ya Wanawake
Duniani yaliyofanyika kimkoa katika Halmashauri ya Manispaa ya Sumbawanga kwa
kuanza na maandamano yaliyotokea ofisi ya mkuu wa mkoa wa Rukwa hadi katika
Uwanja wa mpira wa Nelson Mandela akiwa ni mgeni rasmi wa sherehe hizo.

Awali akisoma risala Mkuu wa Wilaya ya Kalambo Mh. Julieth
Binyura ameitaka serikali kuhakikisha wanafanya marekebisho ya sheria kinzani ili
kuendana na mabadiliko ya mfumo wa maisha kama vile sheria ya ndoa, mirathi,
maadili ya jamii na kiwango cha mchango wa mzazi katika malezi ya familia na
watoto huku akitaja mafanikio kadha ya kufikia idadi ya asilimia 50 kwa 50.

“Kuanzishwa kwa vikundi na kuunganishwa na taasisi za fedha kama
vile NMB, CRDB, Pride, SACCOS na SIDO kwaajili ya mikopo na vifaa kwaajili ya kufanyia
kazi, pia mkoa kwa kushirikiana na Halmashauri tumeweza kuwatambua wazee 48,732
wakiwemo wanawake na wanaume pia mkoa unaendelea kufuatilia masuala ya kijinsia
dhidi ya watoto, jumla ya watoto 1,307 walifanyiwa ukatili na mashauri yao yapo
polisi, dawati la jinsia na mahakamani,” Alisema.

Akichukua nafasi hiyo mbunge wa Sumbawanga Mjini Mh. Aesh
Hilally nae alimuomba Mh. Ummy kuona umuhimu wa kuongeza gari za wagonjwa nae
Mh. Ummy alikubali ombi hilo na kuahidi kutoa gari za wagonjwa mbili, moja
ikihudumia hospitali ya rufaa ya mkoa wa rukwa na nyingine katika kituo cha
afya kilichopo manispaa ya Sumbawanga. 


Monday, March 5, 2018

Uongozi wa Mkoa Rukwa wachangia Milioni 5.7 kumalizia Ujenzi wa Msikiti Sumbawanga.




Uongozi wa Waislamu Mkoani Rukwa umepokea kwa furaha mchango
wa Shilingi Milioni 5.7 uliotolewa na uongozi wa serikali ya Mkoa wa Rukwa
ukiongozwa na Mkuu wa mkoa wa Rukwa Mh. Joachim Wangabo katika kikao cha
maridhiano juu ya ujenzi wa msikiti uliosimama kwa muda.

Fedha hizo zilizochangwa zilijumuisha ahadi, fedha taslimu
pamoja na vifaa vya ujenzi vilivyotolewa kwa umoja wa viongozi wa serikali
kuonesha mshikamano uliopo kati ya serikali na wananchi bilaya kujali itikadi,
dini wala rangi huku Mh. Wangabo akichangia milioni 1.5

Kabla ya maridhiano hayo Mh. Wangabo alitoa salamu za rais
Dk. John Pombe Magufuli juu ya kuuendeleza msikiti huo na kunukuu kuwa Mheshimiwa
Rais ametoa kibali cha kuuendeleza msikiti hio na yupo tayari kuweka jiwe la
msingi ama kuuzindua msikiti huo.

“Mh. Rais ameniagiza niseme yafuatayo kuwa ametoa kibali cha
kuendelea kujenga msikiti huu ahdi umalizike, ameyafikiria mambo mengi sana mpaka
kuja kufikia maamuzi haya, ili yalete muskabali wa maridhiano, ilete amani,
ilete utulivu, mshikamano, maoelewano na umoja ili Rukwa yetu iweze kusonga
mbele kama kitu kimoja., la pili alisema kuwa yupo tayari kuweka jiwe la msingi
ama la kuzindua msikiti huu,”

Kwa kuongezea hilo Mh. Wangabo aliuomba uongozi wa uislamu
mkoa kuendelea kushirikiana na kudumiasha amani na kuhakikisha wanajenga Rukwa
moja isiyoyumbishwa na tofauti yoyote kwani ushirikiano huo umekuwa wa muda
mrefu hovyo asingependa pawepo na tofauti.

Pia alimuagiza Mkurugenzi wa Manispaa ya Sumbawanga
kuhakikisha vikwazo vyote vianondolewa na kumtaka kamishna wa ardhi nyanda za
juu kusini kufanya haraka kupitisha kibali ili msikiti huo upatiwe hati.
Kwa upande wake Shekhe Mkuu wa mkoa wa Rukwa Rashid
Akilimali amesifu maamuzi ya Rais Dk. John Pombe Magufuli na kukubali ombi lake
la kutaka kuja kuweka jiwe la msingi ama kuuzindua msikiti huo na kuwa waislamu
wataendelea kuungana nae na kumuombea amalize vipindi vyake salama.
“Mh. Mkuu wa Mkoa kwa niaba ya waislamu wa mkoa wa Rukwa kwanza
tunatoa shukrani za dhati kwa Mh.Rais wa nchi Mh. Dk. John Magufuli, nimeamini
kama alivyosema kuwa yeye ni msikivu na yeye anatuomba kila siku tumuombee dua na
sisi mwisho wa khotuba yetu kila ijumaa tunadua huwa tunaiomba, Eee Mola wetu
linda amani ya nchi yetu na uwalinde viongozi wetu,” Shekh Akilimali
alimalizia.
Uongozi wa mkoa wa Rukwa uliowajumuisha kamati ya ulinzi na
usalama ya Mkoa, Wakuu wa Wilaya, Mkurugenzi wa halmashauri, Mbunge wa jimbo la
Sumbawanga mjini, Mwenyekiti wa CCM Wilaya ya Sumbawanga pamoja na kaimu
Kamishna wa Ardhi nyanda za juu kusini.

Thursday, March 1, 2018

Nyumba 20 NHC Rukwa kuendelezwa.




Mkuu wa Mkoa wa Rukwa Mh. Joachim Wangabo amekataa maombi ya
Shirika la Nyumba la Taifa (NHC) kufanya ukandarasi wa majengo mbalimbali ya
serikali mkoani Rukwa kutokana na kusimama kwa mradi wanaousimamia kutokamilika
kwa muda wa miaka minne.

Maombi hayo yaliwasilishwa kwa Mkuu wa Mkoa na meneja wa Mkoa
wa shirika hilo Mhandisi Musa Kamendu baada ya Mh. Wangabo kutembelea mradi wa
nyumba 20 za NHC zilizopo sumbawanga mjini ili kujionea maendeleo ya ujenzi wa
nyumba hizo ambazo umefikia asilimia 60.

Mradi huo wenye thamani ya shilingi bilioni 1.5 ambao
ulianza mwezi juni 2014 na kusimama kutokana na shirika kukosa fedha za
kuendeleza na kutarajiwa kuendelea ifikapo mwezi machi mwaka huu amabpo hadi
kufikia hapo shilingi 867,990,367 zimeshatumika kati ya 1,532,473,872.

“Tunaona wakati mwwingine serikali inatoa kazi kwa SUMA JKT
na kukarabati shule kama Kantalamba Sekondari, sisi kama mkandarasi daraja la
kwanza, Mkuu wa Mkoa na viongozi wengine tunawaalika na tunawaomba mtupe hizo
kazi, tutazifanya vizuri sana na kwa ufanisi mkubwa, tumesikia kuna miradi
mingi, sisi kama wakandarasi tunaomba mtupe hizo kazi,” Mhandisi Kamendu
alimalizia.

Katika kujibu maombi hayo Mh. Wangabo alitoa angalizo kuwa
endapo mradi wa shirika umeshindikana kumalizika kwa wakati hali hiyo itakuwaje
kama wakipewa mradi na taasisi nyingine ya serikali na kuwataka kwanza kumaliza
mradi wao ili wawe na ushahidi wa kuonekana katika Mkoa wa Rukwa na sio kuishia
kutoa mifano kwa miradi iliyofanyika katika mikoa mingine.

Thamani ya nyumba moja ni shilingi 139,680,000 na ikiwa
haikumalizwa gharama yake ni shilingi 118,080,000 bila ya VAT.

Wednesday, February 28, 2018

RC Wangabo asisitiza usafi katika mahindi kujikinga na Kansa.




Mkuu wa Mkoa wa Rukwa Mh. Joachim Wangabo amewataka wakulima
wote mkoani Rukwa kuhakikisha wanayasafisha mahindi yao kabla ya kuyauza ili
kupata soko la uhakika na pia kujiepusha na magonjwa mbalimbali ikiwemo kansa
endapo mahindi hayo yatauzwa yakiwa na mchanganyiko wa mahindi yaliyooza na
takataka.

Amesema kuwa mahindi yaliyooza yana sumu Kuvu ambayo
hutengenezwa yakiwa na upepo na unyevu, sumu ambayo huleta kansa kwenye miili
ya binadamu endapo mahindi hayo yatasagwa na athari hiyo haitakuwa kwa
watanzania peke yao bali hata walaji waliopo nje ya nchi.

“Muhakikishe kwamba mahindi yale mnayoyachambua hambakishi
mahindi yaliyooza na matakataka yale mahindi yaliyooza ni sumu ile inaitwa sumu
kuvu inakuja kutengenezwa baadae kukiwa na upepo na unyevu na kusababisha
kansa, lakini pia mawe yakiingia kwenye mfumo wa kusaga unga, chakula kikiwa na
mawe kitasababisha kidole tumbo, ambapo hadi ufanyiwe upasuaji ndipo upone,”
Alisema

Na kuongeza kuwa kwa kufanya hivyo kutasaidia kutangaza
bidhaa nzuri zitakazo Mkoa wa Rukwa katika mikoa mbalimbali nchini lakini pia
kama usafi huo utazingatiwa utaleta sura nzuri katika soko la kimataifa na
hatimae kuitangaza nchi kwa bidhaa zake bora.

Ameyasema hayo alipotembelea kiwanda cha kuzalisha unga cha
Mbasira Food Industries kilichopo kata ya Malangali, Wilaya ya Sumbawanga
kujionea maendeleo ya kiwanda hicho chenye uwezo wa kuzalisha tani 36,000 za
unga kwa mwaka na kuongea na vibarua wa kiwanda hicho waliokuwa wakitenga
mahindi mazima na mabovu kwaajili ya uzalishaji.

Nae Mkurugenzi wa Mbasira food Industries Ltd Mikidadi
Kassanda amesema kuwa changamoto kubwa wanayopambana nayo katika kununua
mahindi kutoka kwa wakulima ni kupata machanganyiko wa mahindi mabovu na
kusababisha kupoteza kilo nne za mahindi mabovu katika kila kilo 100 za mahindi
wanayouziwa na wakulima.

“Moja ya changamoto tunazokumbana nazo ni ukosefu wa mafunzo
bora kwa wakulima juu ya uzalishaji bora wa mahindi na hatimae kupata mahindi
yasiyo na viwango,” Alisema.

“Hatutaki kusikia Zero Kantalamba Sekondari” RC Wangabo.




Mkuu wa Mkoa wa Rukwa Mh. Joachim Wangabo ameitahadharisha
bodi ya shule ya Sekondari Kantalamba kuhakikisha wanaweka mikakati ya kuondoa
daraja la sifuri katika shule hiyo kongwe nchini iliyoanzishwa mwaka 1964 na
Kanisa Katoliki na hatimae kukabidhiwa rasmi serikali mwaka 1968.

Amesema kuwa shule hiyo haina hadhi ya kuwa na daraja la
sifuri kutokana na kutoa viongozi mbalimbali walioiongoza nchi hii na kuwa
serikali kwa makusudi imetoa shilingi Bilioni 1.1 ili kuboresha miundombinu ya
shule hiyo hivyo haipendezi kusikika ikiendelea kutoa daraja la sifuri kuanzia
kidato cha pili hadi cha sita.

“Mjumbe wa bodi ziondoeni hizi sifuri zitoke kabisa, na hata
four taratibu zitoeni, yaani hapa pana hadhi ya Division one nyingi, two
zinafuata na three mwisho hiyo ndio hadhi ya Kantalamba sekondari na ukongwe
wake, na sasa tunatumia mabilioni kuboresha miundombinu halafu bado sifuri,
sifuri katika mazingira haya, na anakaa bweni miaka minne sifuri?” Alisema.

Ameyasema hayo alipotembelea shule hiyo ili kujionea marekebisho
ya ujenzi wa majengo kadhaa yaliyofanywa ili kuboresha mazingira ya shule
kwaajili ya wanafunzi.

Kwa upande wake Mkuu wa Shule Hiyo Martin Kasensa amesema
kuwa ufaulu wa wanafunzi umekuwa ukipanda mwaka hadi mwaka.

RC Wangabo asifu bidhaa zinazotengenezwa na Energy Sembe pamoja na Dew Drop




Mkuu wa Mkoa wa Rukwa Mh. Joachim Wangabo amewataka
watanzania kutumia unga wa Energy Sembe pamoja na maji ya Dew Drop
yanayozalishwa Mkoani Rukwa na kusambazwa zaidi ya Miko saba nchini ili kuona
ubora wa bidhaa zinazotengenezwa katika Mkoa wa Rukwa.

Ameyasema hayo alipotembelea kiwanda cha Unga cha Energy
Sembe pamoja na Kiwanda cha Maji ya Dew Drop vyote vinamilikiwa na mwekezaji
mzawa wa Mkoa wa Rukwa Aziz Sudi katika ziara ya siku moja aliyoifanya katika
Manispaa ya Sumbawanga ili kujionea maendeleo ya Viwanfda mablimbali pamoja na
miradi ya maendeleo inyaotekelezwa na manispaa.

“Nitoe rai kwa wananchi wote Tanzania watumie Energy Sembe
kutoka Rukwa ni bora yenye viwangona kingine ni hiki kiwanda cha Dew Drop
ambacho kinatengeneza maji yenye kiwango cha juu sana na yanasambazwa zaidi ya
mikoa saba nchini, tutumie maji haya, tujivunie viwanda vyetu vya hapa hasa
hivi ambavyo vinazalishwa na wazawa wenyewe,” Alisema.

Kwa upande wake Mwekezaji huyo Aziz Sudi amesema kuwa maji
ya Dew Drop ni maji yasiyotumia kemikali ya aina yoyote na kuwa ni maji halisi
na kuongeza kuwa ni tofauti na maji mengine yanayowekwa kitu kinachofanana na
“water guard” jambo linalobadilisha ladha ya maji.

Wednesday, February 21, 2018

“Kamwe Sitauingilia mhimili wa mahakama” RC Wangabo.


Mkuu wa Mkoa wa Rukwa Mh. Joachim Wangabo amewatahadharisha wananchi juu ya kuingilia Mhimili wa mahakama baada ya kupokea malalamiko ya wakulima 112 waliouza tani 622 za mahindi kwa chama cha ushirika cha mazao MUZIA AMCOS bila ya kulipwa fedha zao kwa msimu wa 2016/2017 ambapo kesi hiyo ipo mahakamani na kutegemewa kusikilizwa tarehe 27/2/2018.
Mkuu wa Mkoa wa Rukwa Mh. Joachim Wangabo akipokea muhtasari wa malalamiko ya wakulima wa Tarafa ya Mwimbi kutoka kwa Katibu wa  wakulima kata ya Mambwekenya Geofrey Siyame muda mfupi baada ya kusoma malalamiko hayo. 

Mrajis wa Vyama vya ushirika Mkoa wa Rukwa Wallace Kiama akitoa somo kwa wakulima juu ya taratibu za kisheria zinafuatwa na vyama vya ushirikia nchini.

Mkuu wa mkoa wa Rukwa mh. Joachim Wangabo akitoa ufafanuzi kwa wakulima wa zao la mahindi juu ya mipaka iliyopo kati ya mihimili mitatu inayoendesha nchi.

Wananachi hao wanaokidai chama hicho Shilingi Milioni 315 wameiomba serikali kuchukua mzigo huo wa deni baada ya chama hicho kutoa ahadi kadhaa za malipo tangu tarehe 10/10/2017 na kushindwa kulipa na kupelekea wananchi hao kushindwa kujiendeleza kiuchumi.

Amesema kuwa haingilii mahakama pale anaposikiliza kero za wananchi isipokuwa kesi ikiwa mahakamani hana mamlaka ya kumlazimisha Jaji cha kufanya kwani mahakama zinataratibu zao za kuendesha kesi na kuwasihi wakulima kusubiri hukumu ya kesi hiyo ndipo aweze kushughulikia na kuwahakikisha kupata haki yao pindi hukumu itakapotoka.

“Tumeambiwa hapa kuwa hilo suala ltasikilizwa tarehe 27/2/2018, sasa hebu tusubili tuone ile hukumu itatoka na itakuwa ya namna gani kwahiyo siwezi kuisemea, nikiisemea inamaana nitakuwa naingilia uhuru wa mahakama, tusubiri tusikie hukumu itasemaje juu ya kuipata hiyo fedha milioni 315, wakulima watapataje na mhukumiwa atapewa adhabu gani, ikishatoka ndipo serikali tutajua tufanye kitu gani,” Alisisitiza.

Awali akisoma risala fupi kwa niaba ya mrajisi wa vyama vya ushirikia Mkoa wa Rukwa Nicolas Mrango alisema kuwa baada ya kubaini kasoro kadhaa katika chama hicho waliitisha kikao cha bodi na wajumbe wa bodi hiyo walielekeza lawama kwa Mwenyekiti na katibu wa chama hicho na kupelekea viongozi hao kufikishwa polisi na hatiame kesi kufikishwa mahakamani.

“Miongoni mwa hatua zilizochukuliwa ni pamoja na kuwasimamisha uongozi viongozi waliotuhumiwa kuhusika na upotevu wa mahindi ya wakulima ili kupisha vyombo vya uchunguzi kutekeleza majukumu yake pasipo kuingiliwa,” Alisema.

Nae katibu wa wakulima kata ya Mambwekenya Geofrey Siyame aliitaka serikali kuchukua mzigo wa deni kwakuwa serikali ndio iliyotoa uwakala wa kununua mahindi ya wakulima kwa chama hicho na kueleza kuwa hadi sasa wameshindwa kununua pembejeo ili kuendelea na shughuli za kilimo na kuwa hawana Imani na mahakama.

“Tumepata taarifa kwamba serikali imepeleka madai mahakamani, mahakama imekuwa ikirusha tarehe kile kesi inapotanjwa kwa madai upelelezi unaendelea, kwanininuchunguzi unachukua muda mrefu, wakulima mpaka sasa hawana Imani na mahakama baada ya kutishiwa na mdaiwa kuwa anadili na mahakama,” Alisema.