Thursday, November 15, 2018

Vijana, wanawake na walemavu wala neema Manispaa ya Sumbawanga


Halmashauri ya manispaa ya Sumbawanga imetoa shilingi milioni 70.5 kwa vikundi 21 vya vijana, wanawake na walemavu ikiwa ni utekelezaji wa Sera ya Taifa ya Uwezeshaji Wananchi Kiuchumi ya Mwaka 2004 yenye adhima ya kuwainua wananchi kiuchumi ili kufikia uchumi wa kati ifikapo mwaka 2025.
Mkuu wa mkoa wa Rukwa Mh. Joachim Wangabo akitoa hundi kwa moja ya vikundi vilivyopewa Mkopo katika manispaa ya Sumbawanga. 
Manispaa ya Sumbawanga imedhamiria kutekeleza maelekezo ya serikali kwa kutenga asilimia 10 ya mapato ya ndani na kuwezesha vikundi hivyo ambapo tangu mwaka wa fedha 2018/2019 uanze mwezi Julai hadi mwezi Novemba Halmashauri tayari imeshakusanya Shilingi bilioni 1.1 ambayo ni nusu ya makusanyo ya malengo waliyojiwekea kwa mwaka huu.

Fedha hizo zilitolewa katika hafla fupi ambapo mgeni rasmi alikuwa Mkuu wa Mkoa wa Rukwa Mh. Joachim Wangabo aliyekabidhi hundi kwa vikundi hivyo na kuhudhuriwa na Mkuu wa Wilaya ya Sumbawanga Dkt. Khalfan Haule, Meya wa Manispaa ya Sumbawanga Mh. Justin Malisawa na viongozi mbalimbali wa vyama vya siasa na vikundi husika.

Akisoma taarifa ya kukabidhi fedha hizo kwa vikundi Mkurugenzi wa Manispaa ya Sumbawanga Jacob Mtalitinya alisisitiza kuwa Ili dhamira ya Serikali ya kufikia uchumi wa kati na Tanzania yenye Viwanda itimie shughuli utoaji wa mikopo lazima iwe endelevu na kuwa halmashauri imejiimarisha katika kukusanya mapato yake ya ndani ili kuleta matunda kwa kutoa mikopo.

“Vikundi hivi  vinajishughulisha na Usindikaji mafuta, chakula,vinywaji, Useremala, Utengenezaji wa Chaki na ushonaji, ufumaji na utengenezaji wa Mabatiki na Ufugaji wa kuku na ngombe wa maziwa. Pia Halmashauri inatarajia kutoka kiasi cha mkopo kilichobakia kwa mwezi Januari, 2019 kitakachokuwa kimekusanywa kutokana na makusanyo ya ndani.” Alisema.

Aliongeza kuwa ili kuona vikundi hivyo vinakuwa kiuchumi maafisa maendeleo ya jamii  ngazi ya kata na halmashauri kuhakikisha wanakuwa na orodha ya vikundi vilivyokopeshwa, kwaajili kufuatilia shughuli za vikundi na kuwajengea uwezo pamoja na kubaini mwendo wa urejeshaji wa mikopo kwa vikundi  na kufanya ufuatiliaji wa marejesho ya mikopo.

KWa upande wake Mh. Wangabo aliipongeza Manispaa ya Sumbawanga na kwaagiza wakurugenzi wote wa halmashauri zizlizopo Mkoa wa Rukwa kuhakikisha wanatekeleza agizo hilo ili kuweza kukuza kipato cha mwananchi wa Mkoa kwa kuwawezesha kiuchumi na hatimae kuongeza ajira pamoja na kukuza uchumi wa viwanda.

Pi aliwapongeza wale waliofanikiwa kupata mikopo hiyo na kuwasihi waweze kurudisha kwa wakati ili na wengine wapate fursa ya kukopeshwa na kujikwamua na kuwaonya kutotumia fedha hizo kwa matumizi ambayo yako tofauti na walichoombea.

“Serikali haitafurahishwa kuona fedha zilizokopwa zinatumika kwa malengo ambayo hayakukusudiwa kama vile anasa, aidha, nitoe wito kwa Wakurugenzi wa Halmashauri zote ndani ya Mkoa wetu kupitia hafla hii, kuweka mipango na mikakati ya kuhakikisha wananchi wanawezeshwa kiuchumi ikiwa ni pamoja na kuwaunganisha na wadau mbalimbali wa maendeleo  ndani na nje ya Mkoa kwa kadiri itakavyowezekana.”Alisisitiza.

Kuanzia mwaka 2013/2014 hadi 2017/2018 fedha zilizopaswa kuchangiwa na Halmashauri yetu kama asilimia 10 ya mapato ya ndani ni shilingi 684,055,823. Hata hivyo hadi kufikia Juni 2018 jumla ya shilingi 50,000,000 zilitolewa kwa vikundi 43 sawa na asilimia 7.3 ya lengo. kiasi cha shilingi 634,055,823 hakikutolewa kutokana na mwenendo wa makusanyo.

Thursday, November 8, 2018

RC Wangabo afika kwenye ghala la TFC na kukuta patupu

Mkuu wa Mkoa wa Rukwa Mh. Joachim Wangabo ametembela ghala la kuhifadhia mbolea la Kampuni ya Mbolea Tanzania (Tanzania Fertilizer Company – TFC) na kutokuta hata mfuko mmoja wa mbolea huku wakulima wakijiandaa na msimu wa kilimo wa mwaka 2018/2019 huku mvua zikitarajiwa kuanza hivi karibuni.
Kamati ya Ulinzi na Usalama ya Mkoa ikiongozwa na Mkuu wa Mkoa pamoja na Mkuu wa Wilaya ya Sumbawanga na Mkurugenzi wa manispaa ya Sumbawanga walipotembelea moja ya maduka ya wauzaji wa mbolea yaliyopo mjini Sumbawanga. 

Mh. Wangabo amefanya ziara fupi katika maghala kadhaa ya wafanyabiashara binafsi pamoja na makampuni yaliyopo mjini sumbawanga na kukuta shughuli za uletaji wa mbolea ukiendelea kwa maandalizi yam simu wa kilimo huku Kampuni ya Mboleaa Tanzania (TFC) ikikosa hata mfuko mmoja katika ghala lao jambo lililowashanga walioambatana na Mkuu wa Mkoa katika ziara hiyo.
“Tutawasiliana na viongozi wa TFC ili tuweze kujua kwanini hawaleti mbolea ya kutosha wakati hii ni kampuni ya serikali inaweza ikaleta mbolea nyingi kuliko hata hao wengine lakini badala yake “godown” (ghala) kubwa lakini hakuna kitu, nini manufaa ya TFC sasa,” Alihoji.
Awali akisoma taarifa ya kampuni hiyo msimamizi wa ghala hilo Jelio Mahenge alisema kuwa msimu wa kilimo wa mwaka 207/2018 kampuni ilifanikiwa kusambaza tani 1082 na kuwa msimu wa kilimo wa mwaka 2018/2019 kampuni imejipanga kuleta jumla ya tani 2500 kwa awamu ya kwanza.
“Mheshimiwa Mkuu wa Mkoa kampuni inafanya jitihada zote za hali na mali kuhakikisha uletaji wa mbolea unatekelezeka ndani ya mwezi huu wa kumi na moja ili kuendana na msimu wa kilimo na kuleta tija kwa wakulima na nchi kwa ujumla,”
Msimu wa Kilimo wa mwaka 2017/2018 Mkoa ulitumia zaidi ya tani 24,000 za Mbolea ya kupandia (DAP) na mbolea ya kukuzia (UREA) na msimu wa kilimo wa mwaka 2018/2019 mkoa unatarajiwa kutumia zaidi ya tani 34,000 na mpaka mwanzoni mwa mwezi huu Mkoa umepokea tani 363.75 ambazo tayari zikiwa ndani ya maghala ya wafanyabiashara wa mbolea na nyingine zikiwa njiani.

RC Wangabo asisitiza upandaji miti kuzuia maafa huku wa mabondeni wakiamuliwa kuhama.


Mkuu wa Mkoa wa Rukwa Mh. Joachim Wangabo amewaagiza wakurugenzi wote wa halmashauri kuhakikisha wanatekeleza sheria ya upandaji miti kwa kila nyumba ili iwe ngao dhidi ya upepo mkali unaosababisha maafa na kuwafanya wanachi hao kukosa mahala salama pa kukaa na wengine kuharibikiwa na vyombo vyao.
Mkuu wa Mkoa wa Rukwa Mh. Joachim Wangabo (aliyenyoosha kidole) akionyesha moja ya nyumba zilizoathirika na upepo mkali na mvua kubwa zilizonyesha mapema mwezi huu katika kijiji cha Kichangani, kata ya kirando Wilayani Nkasi, Mkoani Rukwa, alipokwenda kutoa pole kwa waathirika hao. 

 Mkuu wa Mkoa wa Rukwa Mh. Joachim Wangabo akiingia katika moja ya nyumba zilizoathiriwa na upepo mkali ulioambatana na mvua pamema mwezi huu katika kijiji cha Kichangani, kata ya kirando Wilayani Nkasi, Mkoani Rukwa.

Miongoni mwa nyumba zilizoathiriwa na upepo mkali ulioambatana na mvua pamema mwezi huu katika kijiji cha Kirando, kata ya kirando Wilayani Nkasi, Mkoani Rukwa.

Ameyasema hayo alipokwenda kuwatembelea walioathiriwa na upepo mkali ulioambatana na mvua kubwa iliyoezua paa za nyumba zipatazo 27 na kusababisha hasara ya zaidi ya shilingi milioni 26 katika Tarafa ya kirando, Wilayani Nkasi.

“Mh. DC tuwe wakali katika hili, kuhakikisha kwamba nyumba ambayo haina miti inayozunguka lile eneo la makazi tuhakikishe kwamba tunachukua hatua stahiki za mazingira, halmashauri mnajua hata kwenye vibali vya ujenzi huwa mnasema lazima muwe na miti angalau minne kama sio mitano lakini hakuna anaefuatilia kwamba hiyo miti ipo? Sadsa ni wakati muafaka wa kufuatilia taratibu zote,” alisisitiza.

Mh. Wangabo aliongeza kuwa wale wote waliojenga kwenye mabonde ya mpunga wajue kwamba maeneo hayo si salama na kama watapatwa na maafa yoyote wasiitegemee serikali kuwahudumia kwasababu serikali imeshatoa onyo juu ya uhatari wa makazi hayo na kuwataka wananchi wasiishi kwenye maeneo hatarishi.

Kwa upande wake Mkuu wa Wilaya ya Nkasi Mh. Said Mtanda amesema kuwa halmashauri ya Wilaya ya Nkasi inaendelea kutoa elimu ya ujenzi wa nyumba bora na katika kuhakikisha jambo hilo linatekelezwa kamati za ujenzi za vijiji zinaendelea kuundwa katika kila kijiji ikimabatana na jukumu la kuhamasisha upandaji wa miti.


DC Nkasi aonya wanaotishia hali mbaya kiuchumi.


Mkuu wa Wilaya ya Nkasi Mh. Said Mtanda amewaonya wale wote wanaowatia hofu wananchi wa mwambao wa ziwa Tanganyika juu ya ugumu wa maisha baada ya kufanyika oparesheni ya kukamata wavuvi haramu katika mwambao huo.

“kuna kikundi kidogo cha watu kazi yao kuwajaza wananchi hofu, baada ya suala la (operesheni ya) Samaki kuanza tulipokea kama simu sita saba hivi wengine wakitoka hapa kirando, tukafuatilia, tukawaita wale maafisa wanaofanya oparesheni, tukakaa nao, tulikuwa tunaambiwa huruhusiwi hata kusafirisha samaki hata kama ni mmoja, tukajua hali ni mbaya, tuliuliza nia ya operesheni tukaambiwa ni kudhibiti uvuvi haramu sio kuzui biashara ya samaki,” Alisema.

Mkuu wa Wilaya ya Nkasi Mh. Said Mtanda

Ameyasema hayo baada ya kupokea malalamiko kutoka kwa wavuvi hao walizozielekeza  kwa Mkuu wa Mkoa akiwa ziara fupi kata ya kirando ili kujionea maafa yaliyotokea siku chache zilizopita yalisababishwa na mvua kali na kuharibu nyumba 27 na kutia hasara ya shilingi milioni 26.

Ameongeza kuwa wavuvi hao walikuwa wanalalamika kutozwa kuanzia milioni tano kama faini ya kukiuka sheria za uvuvi lakini baada ya mkuu wa Wilaya huyo kutangaza aliyetozwa kiasi hicho ajitokeze ili arudishiwe fedha yake, hakutokea hata mwananchi mmoja.

Aliwataka watu kuacha hofu na wengine kuacha kuwapa wenzao hofu kwa kuwaambia kuwa shughuli za uvuvi hivi sasa hakuna na kwamba watu wanaotegemea shughuli hizo watalala na njaa jambo ambalo si la kweli.

Mmoja wa wavuvi hao Ali Seif alisema kuwa wavuvi wamekuwa wakitozwa faini kubwa kuliko kawaida ikiwemo faini ya shilingi milioni tano na milioni kumi huku mvuvi mwingine Rashid Huseni aliongeza kuwa wakazi wa Kijiji cha Kirando kwa asilimia 99 wanategemea ziwa Tanganyika kwaajili ya vipato vya vya kuendesha maisha hivyo operesheni hiyo inawakosesha vipato hivyo na kusababisha watu wajiingize kwenye uhalifu.

Akitoa maelekezo ya Serikali katika utekelezaji wa zoezi hilo Mkuu wa Mkoa wa Rukwa Mh. Joachim Wangabo alisisitiza kuwa aliapa kuitetea na kuilinda sheria ya nchi na hana mpango wa kwenda kinyume na sheria ambayo ilishapitishwa ila ataendelea kusisitiza utekelezaji wake hadi hapo itakapobadilishwa na vyombo husika.

RC Wangabo atembelea kituo cha Afya na kukuta madudu


Mkuu wa Mkoa wa Rukwa Mh. Joachim Wangabo amemuagiza mkurugenzi wa halmasshauri ya Wilaya ya Kalambo kuhakikisha anampatia taarifa ya kila wiki juu ya maendeleo ya ujenzi wa kituo cha afya cha Kanyezi, kilichopo kata ya Kanyezi wilayani Kalambo.

Maesema kuwa tangu kuanza kwa miradi ya upanuzi na ujenzi wa vituo vya afya katika halmashauri hiyo kumekuwa na ubabaishaji hasa wa kuchelewa kununua vifaa vya ujenzi pamoja na malipo kwa mafundi ambapo ujenzi huo unatumia mfumo wa “Force Account” kutekeleza kazi hiyo.

Mkuu wa Mkoa wa Rukwa Mh. Joachim Wangabo (wa mbele) akiongoza ukaguzi wa ujenzi wa kituo cha Afya cha Kanyezi, Wilayani Kanyezi, Wilaya ya Kalambo. 

Mkuu wa Mkoa wa Rukwa Mh. Joachim Wangabo (wanne toka kushoto) akiwa na wataalamu wa ofisi yake na wa halmashauri pamoja na wananchi wakikagua ujenzi wa kituo cha afya cha Kanyezi. 

Moja ya majengo ya Kituo cha Afya cha Kanyezi katika kijiji cha kanyezi, kata ya Kanyezi Wilayani Kalambo. 

“Sasa wewe afisa mipango, Mkurugenzi, kuanzia sasa hivi nataka muwe mnanipa taarifa “on weekly basis” (za kila wiki) kwamba nini kinachoendelea katika ujenzi huu, nisingependa tabia hii ya kusua sua iendelee, muiache mara moja, mnaumiza hawa wajenzi, halafu hamuwezi kuwalipa fidia, ingekuwa hawatimizi wajibu wao ingekuwa kitu kingine, kama ilivyotokea kule Kijiji cha Legeza mwendo fundi akakimbia ni kwasababu ya namna hii ubabaishaji wa malipo, mjipange,” Alisisitiza.

Aliyasema hayo alipofanya ziara ya kushtukiza katika kuangalia maendeleo ya ujenzi wa kituo hicho cha afya ambacho kimepandishwa hadhi kutoka kuwa zahanati ya kijiji cha Kanyezi na kukuta zimebaki siku 15 kutakiwa kukabidhi majengo hayo lakini bado wapo katika hatua ya linta.

Kwa upande wake Afisa Mipango wa halmashauri hiyo Bw. Erick Kayombo aliahidi kuwa pamoja na kucheleweshewa kupata fedha lakini halmashauri tayari imeshaagiza vifaa vyote vinavyotakiwa kwaajili ya kumalizia ujenzi.

Kauli hiyo ya Mh. Wangabo ilikuja baada ya mmoja wa vibarua bw. Hamisi Pesambili kumlalamikia Mkuu wa Mkoa juu ya kucheleweshewa vifaa kwaajili ya kuendelea na ujenzi hali inayowafanya waishi kwa taabu huku wakiwa wameacha familia zao mjini sumbawanga na kwa siku kulipwa shilingi 10,000 fedha ambayo hawaridhiki nayo.

Katika kulirekebisha hilo, Mh. Wangabo alimuagiza mhandisi wa Halmashauri ambaye pia ni msimamizi wa jengo hilo kuhakikisha kuwa wanasimamia malipo ya mafundi wadogo kutoka kwa mafundi wao na sio kuishia kuwalipa mafundi huku hawajui kama vibarua hao wanalipwa kama walivyokubaliana na mafundi wao na kuongeza kuwa kutolipwa vizuri kwa vibarua kunaweza kupelekea majengo kutokuwa na ubora unaotarajiwa.

Serikali ya awamu ya tano imefanikiwa kujenga vituo vitatu vya afya katika halmashauri ya Wilaya ya Kalambo na kutumia zaidi ya shilingi bilioni moja kwaajili ya ujenzi na utanuzi huo huku ikielekeza shilingi bilioni 1.5 kwaajili ya ujenzi wa hospitali ya wilaya.

RC Wangabo atoa njia mbadala kuwanufaisha wavuvi


Mkuu wa mkoa wa Rukwa Mh. Joachim Wangabo amewashauri wakazi wa mwambao wa ziwa Tanganyika katika Wilaya ya Nkasi na Kalambo kuchangamkia fursa ya kibiashara iliyojitokeza baada ya operesheni ya kukamata wavuvi haramu na wasafirishaji wa samaki wanaotumia magari ya abiria kuzuiwa kufanya hivyo kwa mujibu wa sheria ya uvuvi namba 22 ya mwaka 2003.

Amesema kuwa sheria hiyo hairuhusu mabasi ya abiria kupakiza samaki wanaozidi kilo 20 ambao katika hali ya kawaida ni samaki wa kitoweo nyumbani tofauti na hapo ni samaki wa biashra ambao mwananchi anatakiwa kulipia ushuru na kuongeza kuwa bidhaa hizo zinakuwa na magari yake maalum kwaajili ya kazi hiyo ambayo kwa sasa hayapo katika kusafirishia samaki kutoka mwambao hadi sumbawanga mjini.

“Kuna mazingira ambayo lazima sisi wenyewe tuanze kuyawekea utayari na watu wengine wachukulie kama fursa, kama unaambiwa samaki wasafirishwe kwa chombo fulani kilicho maalum, basi wafanyabiashara wengine chukueni hiyo ni fursa kwenu, nunueni hilo gari, sio kwamba wote ni wafanyabiashara wadogo hapa wapo wenye uwezo, lakini pia mnaweza kuungana mkakopa hilo gari na sisi tutawadhamini,” Alisisitiza.

Alitoa kauli hiyo baada ya wavuvi kumlalamikia Mkuu wa Mkoa kuhusu kuzuiwa kusafirisha samaki kwa kutumia magari ya abiria jambo ambalo ni kinyume na sheria.


Mkuu wa mkoa wa Rukwa Mh. Joachim Wangabo akiongea na wananchi wa kijiji cha Kirando, Wilayani Nkasi chini ya mwembe maarufu kwa jina la "kijiwe cha BBC"

Wednesday, October 31, 2018

Milioni 151 zatumika kuongeza nguvu ya kupambana na Ukimwi Rukwa.


Ofisi ya mkuu wa mkoa wa Rukwa kwa kushirikiana na mradi wa Military HIV Research Program (MHRP) umetumia Shilingi 151,109,042 kununua gari aina ya Land Cruiser Hardtop kwaajili ya shughuli zinazohusiana na mapambano dhidi ya Ukimwi.

Gari hiyo ambayo alikabidhiwa kwa Mkurugenzi Mtendaji wa halmashauri ya Wilaya ya Kalambo Bw.Msongela Palela na mkuu wa mkoa wa Rukwa Mh. Joachim Wangabo imenunuliwa kutokana na fedha zilizovuka mwaka 2016/2017 ikiwa ni makubaliano baina ya katibu tawala na mradi juu ya fedha zilizovuka mwaka kupangiwa matumizi yanayolenga kuboresha huduma za Ukimwi.
Mwakilishi wa Mradi wa MHRP Bw. Riziki Kasimu (kulia) akimkabidhi funguo za gari litakalotumika kuongeza nguvu za mapambano dhidi ya maambukizi ya Ukimwi kwa Mkuu wa Mkoa wa Rukwa Mh. Joachim Wangabo (kushoto) mbele ya wadau dhidi ya maambuzi hayo. 


Mkuu wa Mkoa wa Rukwa Mh.Joachim Wangabo akiwasha gari lililokabidhiwa kupitia ushirikiano wa Ofisi yake na Mradi wa MHRP kwaajili ya mapambano dhidi ya maambukizi ya Ukimwi.

Wakati akikabidhi gari hiyo Mh. Wangabo alitahadharisha matumizi ya gari hiyo huku akipiga mfano wa gari ya Mpango wa Kunusuru Kaya Masikini (TASAF) ya halmashauri ya Wilaya ya Kalmabo iliyokuwa na mazoea ya kwenda kwenye sehemu za starehe kuwa mshauri wa mradi huo tayari ameshachukuliwa hatua za kinidhamu.


“Tarehe 7 mwezi wa 10 gari hii tulilishika hapa Sumbawanga likiwa eneo la starehe na huyo mshauri wa mradi huo ndiye aliyekuwa anaendesha gari hilo, tulichukua hatua kali za kumuondoa na kumrudisha kwa mwajiri wake kwaajili ya hatua nyingine za kinidhamu, nitoe wito kwa madereva wa serikali kutumia magari kwa mambo yao binafsi, suala hili lisijitokeze, hatua kali zitachukuliwa,” alisisitiza.

Kwa upande wake mwakilishi wa Mkurugenzi wa mradi huo Bw. Riziki Kasimu ameshukuru ushirikiano anaoupata kutoka katika halmashauri na serikali ya Mkoa ili kuhakikisha wanashusha na kutokomeza maambukizi ya Ukimwi na ameiomba serikali ya Mkoa wa Rukwa kutoa kipaumbele kwa kazi za Ukimwi katika matumizi ya gari.

“Pamoja na Kazi zote zilizopo Mkoani, tungependa kazi za mradi zipewe kipaumbele katika matumizi ya gari, ni kweli kwamba tuna kazi nyingi ama majukumu mengi ambayo hayo magari yangepaswa kufanya na sisi kama washirika kwenye maendeleo hatuwezi kusema gari hili litumike moja kwa moja kwa Ukimwi tu, lakini pale tunapokuwa na majukumu ya msingi ya Ukimwi tungependa msisitizo utolewe huko,”Alisema.

Mtadi huo tayari umeshatoa gari 7 katika Mkoa wa Rukwa, 4 katika Halmashauri zote za Mkoa na 3 katika ofisi ya Mkuu wa Mkoa jambo lililosaidia kurahisisha shughuli za kupambana na maambukizi ya Ukimbwi na hatimae kushuka kutoka asilimia 6.2 mwaka 2015 hadi asilimia 4.4 mwaka 2018.

Jazia kupunguza uhaba wa Dawa Rukwa


Serikali kupitia ofisi ya Rais Tawala za Mikoa na Serikali za Mitaa imeanzisha mfumo wa Jazia Prime vendor kwaajili ya kupata dawa na vifaa tiba pale vinapokosekana katika Bohari ya Dawa (MSD), mfumo ambao unakuwa na mzabuni mmoja atakayesambaza dawa na vifaa tiba ndani ya mkoa mzima.

Kupitia utaratibu huo Ofisi ya mkuu wa mkoa wa Rukwa kupitia katibu tawala wa mkoa Bernard Makali wamewekeana saini na mzabuni ambaye ni kampuni ya Maranatha Pharmacy Ltd,  atakayesambaza dawa na vifaa tiba hivyo kuanzia katika ngazi ya zahanati katika halmashauri nne za mkoa, ili kuongeza upatikanaji wake.

Akifungua hafla hiyo fupi ya kuwekeana saini mkuu wa mkoa wa Rukwa Mh. Joachim Wangabo amesema kuwa mfumo huo utawezesha na kuongeza upatikanaji wa dawa na vifaa tiba muhimu pale ambapo vitakuwa havipatikani MSD.
Katibu Tawala wa Mkoa wa Rukwa Bw. Bernard makali (Kulia) pamoja na Mkurugenzi wa Maranatha Pharmacy Ltd. Bw. Stephen Lengeni (kushoto) wakiweka saini katika mkataba wa kusambaza dawa na vifaa tiba kwa mkoa wa Rukwa. 

“Mfumo huu unaendeshwa kwa kumlipa mzabuni fedha mara tu baada ya vituo husika kuchukua dawa na vifaa tiba na si kwa mkopo. Maana yake vituo vya kutolea huduma za afya vinatakiwa kuhakikisha vina fedha kabla ya kupeleka mahitaji yao kwa mzabuni,” Alisema.


Aidha alitoa wito kwa wakurugenzi wa halmashauri kuhakikisha wanasimamia vyema mapato na matumizi ya fedha kutoka katika vyanzo mbalimbali kwenye vituo vya kutolea huduma za afya na kuhakikisha fedha zilizotengwa kwaajili ya ununuzi wa dawa na vifaa tiba zinatumika kwa mujibu wa miongozo iliyopo.

Kwa upande wake mkurugenzi wa Maranatha Pharmacy Ltd alisema kuwa anaishukuru serikali kwa kuiamini kampuni yake ambayo hadi sasa imeingia mikataba na mikoa ya Iringa, Ruvuma, Mbeya pamoja na Rukwa ambapo mara ya mwisho kufanya kazi na serikali ilikuwa mwaka 2006 wakati ambao mifumo ilikuwa haiku sawa.

Mbali na kutoa huduma kwa wananchi wa mkoa mfumo huu unatarajiwa kuboresha huduma kwa wazee, ambapo mkoa una jumla ya wazee 14,832 waliopatiwa vitambulisho vya kupatiwa matibabu bure.


Monday, October 29, 2018

Rukwa wajipanga kutumia Mkaa mbadala kuokoa mazingira.


Mkoa wa Rukwa umejipanga kupambana na uharibifu wa mazingira kwa kuhakikisha wanatumia rasilimali za makaa ya mawe yanayopatikana katika kijiji cha Nkomolo tu, Wilayani Nkasi kuwa mkaa mbadala na kuanza kutumika majumbani.

Mkaa wa Mawe unavyowaka katika jiko la kawaida. 



Mkakati huo ulioanza kwa mafunzo ya siku mbili yaliyoendeshwa na mtaalamu wa makaa hayo kutoka katika ofisi ya Mkuu wa Mkoa wa Songwe bi. Halima Mpita ukiwakutanisha makatibu tawala wa wilaya, wakurugenzi wa halmashauri, madiwani, wataalamu wa mazingira kutoka katika halmashauri, mashirika yasiyo ya kiserikali yanayoshughulikia mazingira pamoja na wazee maarufu.

Akiongea wakati wa ufunguzi wa mafunzo hayo ya nishati mbadala inayotokana na makaa ya mawe mkuu wa mkoa wa Rukwa Mh. Joachima Wangabo amesema kuwa tunafanya kila liwekanalo kuokoa kile kilichopo na kuhakikisha kwamba mazingira hayaendelei kuharibiwa kwa namna yoyote hasa masuala ya kukata miti kwaajili ya kuni na mkaa.

“Makaa ya mawe yapo kilomita 45 toka hapa tulipo (sumbawanga mjini), yale makaa yam awe tunaweza kuyatumia kama mkaa mbadala kwa matumizi ya majumbani, na hili ndio lengo la mafunzo ya leo, mtaalamu wetu atatueleza kule Songwe wanafanyaje, kile wanachofanya kule watatumegea hapa uzoefu wao, na sisi tutaona na kujipanga tufanye nini na haya makaa yam awe tuliyonayo,” Alisema.

Ameongeza kuwa endapo mafanikio yatapatikana na kuanza kutumia makaa ya mawe majumbani, kiwango kikubwa cha uvunaji wa miti kitaokolewa na kutahadharisha kuwa mpango huo ukifanikiwa gharama za kununua bidhaa hiyo isiwakatishe tamaa wanunuzi ili wasirudi tena kukata miti na hatimae kutofikia lengo.

Kwa upande wake Bi. Mpita alisifu muitikio wa wadau wa mazingira wa mkoa wa Rukwa na kusema kuwa endapo nguvu hiyo itafikisha elimu kwa wananchi basi mkoa wa Rukwa utakuwa wa kuigwa na kuongeza kuwa atashirikiana bega kwa bega ili kuhakikisha mafanikio yanapatikana kwa faida ya kizazi hiki na kijacho.

Akieleza faida za mkaa unaozalishwa na makaa yam awe alisema, “Haya makaa ni suluhisho la kudumu juu ya matumizi mbadala la mkaa wa miti kwa kuwa miamba ya makaa ya mawe ni ya asili na inaweza kuvunwa zaidi ya miaka 500. Pia unaweza kuwaka kwa saa 3 hadi 4  mfululizo na hautoboi wala kuchafua sufuria, ni mkombozi wa ajira maana uanzishaji wa kiwanda chake ni rahisi na majivu yake hustawisha mimea,” Alisisitiza.

Ili kuuwasha Mkaa wa makaa ya mawe unahitaji jiko la mkaa lililotengenezwa kwa udongo, utawasha vijiti viwili maalum vya kuwashia moto utaweka vipande 4 hadi 5 acha viwake pamoja kwa dakika 3, ongeza mkaa na uache uko kwa dakia 15 hadi makaa ubadilike na kuwa rangi nyekundu kuanzia chini. Vipande 34 vya mkaa vinatosha kumaliza mapishi ambapo mkaa huo huwaka kwa masaa 3 hadi 4.


Wednesday, October 24, 2018

Barabara za ULGSP zapendezesha mji wa Sumbawanga

RC Wangabo aagiza kushughulikia udumavu kuongeza ufaulu.


Mkuu wa Mkoa wa Rukwa Mh. Joachim Wangabo amewaagiza wakurugenzi kushirikiana na madiwani kuhakikisha suala la kupunguza udumavu katika mkoa wa Rukwa linakuwa ni ajenda ya kudumu katika vikao vya mabaraza ya madiwani pamoja na mikutano ya hadhara katika kuwaeleimisha wananchi juu ya athari ya udumavu.

Mkuu wa Mkoa wa Rukwa Mh. Joachim Wangabo

Amesema kuwa suala la udumavu lisisahaulike pindi tunapoangalia ufaulu wa watoto wetu mashuleni, na kuwa mstari wa mbele kutoa ahadi za kuhakikisha watoto wanaongeza ufaulu huku udumavu ukiwa bado haujashughulikiwa.

“Tuone kwamba kama huna hali mbaya ya matokeo ya kielimu yanachangiwa pia na udumavu kwasababu udumavu umekuwa wa muda mrefu na kama tunaukubali upo, sasa kwanini usikubaliane pia na matokeo yanayotokea, tuweke jitihada kubwa sana kuondoa udumavu ili watoto wetu waongeze ufaulu,” Alisisitiza.

Ameongeza kuwa kama si hivyo basi itabidi takwimu udumavu ziangaliwe upya, ama kama kwenye elimu kuna kupasi sana basi kuna wizi wa mitihani ama kuna wageni wengi sana wanaotoka nje kuja kusoma Kwetu.

Mwanzoni mwa mweze wa nane Mh. Wangabo aliingia mkataba wa utendaji kazi na kusimamia shughuli za lishe baina ya Ofisi yake pamoja na wakuu wa wilaya ambapo ni utekelezaji wa maagizo ya Wizara ya Ofisi ya Rais Tawala za Mikoa na Serikali za Mitaa kwa mikoa juu ya kupunguza utapiamlo ambao kitaifa ni asilimia 34.

Kwa upande wake mganga Mkuu wa mkoa wa Rukwa Dkt. Boniface Kasululu alisema kuwa utapiamlo unasababisha udumavu wa akili na mwili na ubongo wa mtoto unaendelea kukua tangu ujauzito mpaka anapofikisha miaka mitano.

“Wananchi wengi hawana uelewa wa kutosha juu ya masuala ya lishe bora na athari za utapiamlo.  Pamoja na kuwa Mkoa unazalisha vyakula vya aina mbalimbali tena kwa wingi, lakini wananchi wengi bado wanatumia aina moja au aina za vyakula vilivyozoeleka kwa muda mrefu bila kuchanganya na aina nyingine za vyakula ili kufikia mahitaji halisi ya virutubishi.” Alisema.

Mkoa wa Rukwa una kiwango cha utapiamlo cha asilimia 56.3 wakati kitaifa ni asilimia nne, na kitaifa mkoa wa rukwa umeshika nafasi ya 19 mwak huu tofauti na mwaka jana ulikuwa wa 15 kitaifa katika matokeo ya darasa la saba.




Tuesday, October 23, 2018

DC Sumbawanga aeleza mikakati ya kukitangaza Chuo cha VETA


Mkuu wa Wilaya ya Sumbawanga Dkt. Khalfan Haule ameeleza mikakati yake ya kufanya ziara wilaya nzima yenye kata 48 kwa lengo la kukitangaza Chuo cha Ufundi Stadi (VETA) kinacheondelea kujengwa katika Manispaa ya Sumbawanga kwa lengo la kuwaweka tayari wazazi na wanafunzi watakaokuwa na sifa ya kujiunga na chuo hicho.

Amesema kuwa anataka chuo hicho kiwafaidishe wazawa wa Mkoa wa Rukwa kwasabau chuo hicho kitatumiwa na vijana kutoka katika mikoa mbalimbali hivyo ni vyema vijana wazawa wakapata elimu na kuweza kuusaidia Mkoa kufikia lengo la Tanzania ya viwanda hadi ifikapo mwaka 2025.

Pia katika kuhakikisha jambo hilo linafanikiwa Dkt. Haule amekubaliana na Mstahiki Meya pamoja na Mwenyekiti wa Halmashauri ya Wilaya ya Sumbawanga kuwa ajenda ya Chuo cha VETA iwe ni ya kudumu kwenye vikao vyao vya madiwani.

 “Hatutaki tena watu wabebe mageti kutoka Ilemba wayalete hapa mjini, watengenezee kule kule na pia fursa za viwanda kwa mafundi wa mashine za kukobolea mpunga wapate amfunzo hapa na kuweza kutumia ujuzi kule vijijini,” Alisema.

Ameyasema hayo wakati wa ziara ya kujua maendeleo ya ujenzi wa chuo hicho akiwa na Mkuu wa mkoa wa Rukwa Mh. Joachim Wangabo pamoja na wataalamu wengine kutoka katika Halmashauri ya Manispaa ya Sumbawanga wakiongozwa na Mkurugenzi wa Manispaa hiyo pamoja na Mstahiki Meya.

Kwa upande wake Mh. Wangabo alitoa msisitizo kwa wanafunzi juu ya kuzingatia masomo ya sayansi ambayo ndio kipaumbele cha elimu nyingi za ufundi zitakazoanzishwa katika Chuo hicho cha VETA.

“Nitoe rai pia kwa upande wa wanafunzi wenyewe, ili uje kusoma kwenye chuo hiki, fursa ipo kwa wale wanafunzi wa masomo ya sayansi, kwasababu ufundi unaendana na masomo ya sayansi na hisabati, basi wanafunzi watilie umuhimu sana masomo ya sayansi, kwasababu haya ndio yanayotupeleka katika uchumi wa kati wa viwanda,” Alisema.
Mkuu wa Wilaya ya Sumbawanga Dkt. Khalfan Haule (katikati) akizungumza na wananchi (hawapo pichani) katika moja ya mikutano ya hadhara ya kukitangaza chuo cha Ufundi Stadi (VETA). Wa Kwanza kuanzia kushoto ni Mstahiki Meya wa manispaa ya Sumbawanga mh. Justin Malisawa, akifuatiwa na Mkuu wa Mkoa wa Rukwa Mh. Joachim Wangabo. baada ya Mkuu wa Wilaya anafuata Mkurugenzi wa Halmashauri ya manispaa ya Sumbawanga Jacob Mtalitinya na Katibu tawala wa Wilaya ya Sumbawanga Christina Mzena. 

Ujenzi ukikamilika chuo kitaweza kuchukua wanafunzi 900 wa kozi ndefu na 600 wa kozi fupi hivyo, kitakuwa na uwezo wa kuchukua jumla ya wanafunzi 1,500.

Monday, October 22, 2018

Mkurugenzi aondoa sintofahamu kuhusu Sumbawanga mpya


Mkurugenzi wa Manispaa ya Sumbawanga Jacob Mtalitinya ameondoa sintofahamu iliyokuwa imesambaa juu ya maagizo na maelekezo mablimbali aliyoyatoa katika kuboresha huduma kwa kukusanya mapato na kumsaidia mwananchi mmoja mmoja kujiboreshea maisha katika manispaa hiyo.

Mtalitinya alisema kuwa sula la vibali vya ujenzi na leseni za makazi imetafsirika tofauti lakini azma ni kuipima Manispaa kwa asilimia 100 na kuwa huo ni mwendo wa kufanya upimaji.

Mkurugenzi wa Manispaa ya Sumbawanga Jacob Mtalitinya. 


Tangu kuwasili kwa Mkurugenzi huyo mapema mwezi wa nane mwaka huu wananchi wengi wamekuwa wakipotosha maelekezo anayoyatoa na matokeo yake kueleweka vibaya kwa wananchi wengi wa Manispaa ya Sumbawanga.


 “Unapotaka kujenga jengo lako, unashauriwa kuepuka usumbufu, upate kibali kutoka ofis ya Mkurugenzi na utaratibu wa jengo utakaolifanya, tumeweka nguvu sana kwenye kata za mjini lakini haimaanishi hata kata hizi za pembezoni hazitakiwi kutii sheria hiyo. Leseni ya makazi tunakusudia kuipima Manispaa yetu kwa asilimia 100,” Alibainisha.

Pia alizitaja faida za leseni ya makazi ikiwa ni pamoja na kuwa mmiliki halali wa eneo, kurasimisha makazi ili kupata huduma za msingi kama vituo vya afya, barabara na maeneo ya wazi pamojanna kupata hatimiliki itakayodumu kuanzia mika 33 hadi 99.

Ameyasema hayo katika mkutano wa hadhara uliofanyika katika soko la Kaswepepe, kata ya Sumbawanga Asilia, Wilayani Sumbawanga jambo ambalo lilipendezwa na wananchi waliohudhuria katika mkutano huo na hatimae kuelewa lengo la Mkurugenzi.

Mmoja wa wananchi waliohudhuria Ditmali Mwageni alisema kuwa walishangazwa na kitendo cha mkurugenzi huyo kuwaamuru watu kupaka rangi mabati kulingana na maagizo ya kila kata kuwa na rangi yake, lakini kwa ufafanuzi alioutoa nadhani ameeleweka vyema na wananchi waliohudhuria.

“Kusema kwake kuwa agizo hilo linawahusu wale tu ambao wanaanza kujenga sasa, hapo tumeelewa kuliko tulivyokuwa tunasikia kwamba watu wote wapake rangi za mabati kulingana na rangi ya kila kata, kwakuwa tu ni agizo la mkurugenzi, hiyo haikuwa sawa, nyumba zenyewe za zamani, mabati yamechoka, utekelezaji wake ungekuwa mgumu, lakini kama katoa miaka mitano Kwetu basi sawa,” Alisema.

Miongoni mwa masuala yaliyozua mzozo ni agizo la kila kata kuwa na rangi yake ya bati, kupata kibali cha ujenzi kabla ya kuanza ujenzi, kuwa na leseni ya makazi pamoja na mazoezi mbali mbali ya upimaji yanayoendelea katika manispaa hiyo.


RC Wangabo achangia mifuko 10 ya Saruji ujenzi wa Choo Kaswepepe.


Mkuu wa Mkoa wa Rukwa Mh. Joachim Wangabo amechangia mifuko 10 ya saruji kwaajili ya ujenzi wa choo kilichopo katika soko la mtaa wa Kaswepepe, kata ya Sumbawanga asilia, Mjini Sumbawanga ili wafanyabiashara wasipate shida ya huduma hiyo.

Mh. Wangabo amesema kuwa ameamua kuwekeza kwa wananchi na kuweza kumfuatilia Mkurugenzi ili kuona kama anatoa huduma stahiki kwa wananchi.

Ametoa ahadi hiyo baada ya kusimamisha msafara uliokuwa ukipita katika mtaa huo na kuona soko likiwa limeanzishwa kwenye barabara na kutaka kujua changamoto wanazokutana nazo katika shughuli zao za kila siku, ndipo mmoja wa wananchi hao alipotaja changamoto ya choo.

“Kama alivyosema Mkurugenzi, najua manispaa imeshajiandaa, na mimi nitatoa mifuko 10 ya “Cement” kuwaunga mkono na ninatoa hiyo mifuko 10 ili huyu mkurugenzi asinichenge kwasababu na mimi ni mdau nimekwisha wekeza hapo kwenye soko ili hawa kinamama wapate amahali pazuri pa kufanya biashara zao kwenye kivuli, wasinyanyaswe kwasababu wako kwenye maeneo kama haya,” Alisema.

Kwa upande wake Mkurugenzi wa Manispaa ya Sumbawanga Jacob Mtalitinya alikiri kuwa uongozi wa soko hilo ulifika ofisini kwake ili kutatuliwa shida hiyo ya choo na kuelekeza kuwa ipo kwenye mpango wa kuboresha masoko katika kata 19 za Manispaa ya Sumbawanga.

“Kwasababu wao tayari wana eneo, tulisema suala la choo tutalishughulikia, tufanye ukamilishaji wa hicho choo, ili wananchi sasa kwa hiyari yao bila ya kuwalazimisha wala kuleta vurugu, tuwaombe waende eneo ambalo ni la soko kwaajili ya kupunguza hatari inayoweza kujitokeza,” Alibainisha.
Baadhi ya kinamama wakiendelea na biashara zao huku Wakimsikiliza mkuu wa Mkoa wa Rukwa Mh. Joachim Wangabo (hayupo pichani) katika soko la Kawepepe, Sumbawanga mjini. 

Mkuu wa Mkoa wa Rukwa Mh. Joachim Wangabo (wa pili kutoka kushoto) akiongea na wananchi wa soko la kaswepepe, Kata ya Sumbawanga Asilia, Mjini Sumbawanga. 

Mkuu wa Mkoa wa Rukwa Mh. Joachim Wangabo pamoja na Mkuu wa Wilaya ya Sumbawanga Dkt. Khalfan Haule (waliosimama) wakiulizana juu ya vitu vya kununua katika Soko la Kaswepep. 

Suala hilo la choo liliibuliwa na mmoja wa wananchi wa mtaa huo Ditmali Mwageni ambae alimueleza Mkuu wa Mkoa juu ya sababu ya wao kufanya kazi pembeni ya barabara hadi kukutwa na msafara wake ni kutokuwa na choo katika eneo la soko jambo ambalo tayari wameshalifika katika Ofisi ya mkurugenzi wa Manispaa.

Friday, October 19, 2018

RC Wangabo amtaka DED Kuhamishia ofisi zake karibu na wananchi.


Mkuu wa Mkoa wa Rukwa Mh. Joachim Wangabo amemtaka Mkurugenzi wa Halmauri ya Wilaya ya Sumbawanga kuhakikisha anahamishia ofisi zake karibu na wananchi ambao wanishi katika mipaka ya halmashauri yake na sio kubaki mjini.

Amesema kuwa kwa kufanya hivyo mji utatanuka na maendeleo yatapatikana na pia kupunguza gharama za kuwahudumia wananchi pindi majanga yanapotokea kwani kuwa nao karibu kutasababisha kutotumia pesa nyingi kuwafuata na wao kupata urahisi wa kufika katika ofisi hizo.

“Rai yangu mkurugenzi mtafute mahala kwingine kwa kujenga ofisi za halmashauri ya wilaya, mahala pengine ambapo ni ndani ya halmashauri ya wilaya ya Sumbawanga na sio ndani ya manispaa, ofisi hii inapaswa iwe nje ya eneo la manispaa, faida yake ni kupanua huduma kuliko kila kitu kufikiria manispaa,” Alisema

Ameyasema hayo alipokwenda kukagua jengo jipya la halmashauri hiyo ambalo lilianza kujengwa mwaka 2012 na kutegemewa kumalizika mwaka 2013 japokuwa bado kukamilika ambapo serikali ilitenga shilingi bilioni 2.3 lakini hadi kufikia katika hatua ya sasa, tayari shilingi bilioni 1.6 zimeshatumika kupitia fedha za Ruzuku ya Miradi ya Maendeleo (CDG) ambapo kwa sasa imefutwa.

Mkuu wa Mkoa wa Rukwa Mh. Joachim Wangabo (mbele) akikongoza ukaguzi wa jengo lililojengwa kwa madhumuni ya kuhamia ofisi ya Halmashauri ya Wilaya ya Sumbawanga. 


Mkuu wa Mkoa wa Rukwa Mh. Joachim Wangabo (mbele kulia) pamojana na Mkuu wa Wilaya ya Sumbawanga Dkt. Khalfan Haule wakikagua jengo lililojengwa kwa madhumuni ya kuhamia ofisi ya Halmashauri ya Wilaya ya Sumbawanga. 



Jengo lililojengwa kwa madhumuni ya kuhamia ofisi ya Halmashauri ya Wilaya ya Sumbawanga. 


Mkuu wa Mkoa wa Rukwa Mh. Joachim Wangabo  (katikati) akiwa na Mkuu wa Wilaya ya Sumbawanga (kulia) na Mstahiki Meya Manispaa ya Sumbawanga Mh. Justin Malisawa (Kushoto)


Awali akitoa taarifa ya jengo hilo Mkurugenzi wa halmashauri ya Wilaya ya Sumbawanga John Msemakweli amesema kuwa halmashauri tayari imekwisha tuma andiko maalum na kupeleka wizara ya fedha na OR – TAMISEMI ili kuwezeshwa kumalizia jengo hilo litakalokuwa na ofisi 76 na kumbi 2.


“Hadi sasa tumeandika andiko maalum la jumla ya shilingi 716,933,989 ili kukamilisha mradi huu, tunategemea jengo hili likikamilika litakuwa na ofisi 76 na kumbi 2 ambazo zitakuwa zinatosheleza mahitaji ya ofisi za watumishi wote walio katika makao makuu ya Halmashauri ya Wilaya,” Alibainisha.

Jengo hilo ambalo lipo karibu na jengo la Manispaa ya Sumbawanga halijatengewa fedha za kuliendeleza tangu mwaka wa fedha 2015/2016 hadi sasa.

Katika hatua nyingine, Mh. Wangabo alimuagiza Mkurugenzi huyo kuunda timu ya kuhakikisha wanapambana na mifugo inayoharibu barabara kwani serikali inatumia mabilioni kuzitengeneza na kuzikarabati na hivyo si vyema uharibifu huo ukaendelea.



Thursday, October 18, 2018

RC Wangabo ataka “work plan” ujenzi wa VETA wenye thamani ya Bil.10.7


Mkuu wa mkoa wa Rukwa Mh. Joachim Wangabo ametaka kupewa mpango kazi wa ujenzi unaoendelea wa Chuo cha Ufundi Stadi (VETA) cha Mkoa, kinachojengwa katika mtaa wa Kaswepepe, kata ya Sumbawanga asilia, Wilayani Sumbawanga ili kufuatilia kwa ukaribu na kuweza kukosoa pale mkandarasi atakapokwenda kinyume na alichokiandaa.

Amesema kuwa kwa kufanya hivyo, itasaidia kukosoa maendeleo ya ujenzi mapema kabla mambo hayajaharibika na si kulalamika baada ya kukamilika kwa ujenzi na kulaumu ubadhirifu uliojitokeza wakati fursa ya kufuatilia ilikuwepo.

“Ningependa nipatiwe “Work plan” mpango kazi ambao mnao, hatua kwa hatua ili na mimi nikikaa kule najua mwezi lazima mko hatua Fulani, nikiona inafaa ntakuja kukagua, mwenyekiti wa ulinzi na usalama Wilaya nae apewe mpango kazi, Mstahiki Meya nae apewe ili tufuatilie kwa pamoja ili kama kuna mapungufu tuambiane mapema, tusingoje kuviziana kwamba hili limeharibika,” Alisisitiza.


Ziara ya ukaguzi wa ujenzi wa Chuo cha Ufundi Stadi (VETA) Mkoa wa Rukwa. 



Mkuu wa Mkoa wa Rukwa Mh. Joachim Wangabo (mbele kulia) akitoa akitaka ufafanuzi juu ya uwakilishi wa  majengo kwa mashimo yaliyochimbwa. 





Mkuu wa Mkoa wa Rukwa Mh. Joachim Wangabo (kulia) akitaka ufafanuzi juu ya uwakilishi wa majengo kwa mashimo yaliyochimbwa.





Mkuu wa Mkoa wa Rukwa Mh. Joachim Wangabo akiangalia ubora wa matofali yatakayotumika katika ujenzi wa Chuo cha Ufundi Stadi (VETA) ambapo Mkandarasi alisemakuwa anatumia mfuko mmoja wa saruji kutoa matofali 20. 

Ameongeza kuwa kwenda vibaya kwa mambo na kufika mwisho itashindikana kurudisha nyuma na matokeo yake ni kumfunga mhusika aliyesababisha uharibifu wakati fedha za serikali zimekwishapotea na huku wananchi bado wanahitaji maendeleo. Ameyasema hayo alipofanya ziara ya kukagua ujenzi wa chuo hicho.


Kwa upande wake akisoma taarifa ya ujenzi Mkadiriaji majengo wa ujenzi huo Faraji Selemani alisema kuwa ujenzi huo utagharimu shilingi bilioni 10.7 hadi kukamilika kwake ambapo kutakuwa na majengo tisa yatakayohusisha fani mbalimbali pamoja na jengo la utawala.

“mradi utakuwa na majengo yafuatayo, majengo ya utawala, madarasa pamoja na maktaba, “workshops” mbali mbali 9, mabweni ya wanafunzi wa kike na wakiume, vyumba vya waalimu na makazi yao na sehemu ya kufanyia mazoezi kwa vitendo,” Alimalizia.

Ujenzi huo ambao umeanza mapema mwezi wa tisa mwaka huu baada ya makabidhiano baina ya VETA makao makuu Dar es Salaam, VETA kanda ya nyanda za juu kusini Mbeya pamoja na Ofisi ya mkuu wa mkoa wa Rukwa kumkabidhi mkandarasi TENDER Intarnational kwaajili ya ujenzi wa chuo hicho huku mshauri elekezi akiwa Sky Architect Consultancy Ltd.

Ujenzi ukikamilika chuo kitaweza kuchukua wanafunzi 900 wa kozi ndefu na 600 wa kozi fupi hivyo, kitakuwa na uwezo wa kuchukua jumla ya wanafunzi 1,500.