Tuesday, September 24, 2019

Vihenge vya NFRA vyavutia uwekezaji eneo maalum la viwanda Sumbawanga


Mkuu wa mkoa wa Rukwa Mh. Joachim Wangabo amesifu ujenzi wa vihenge vya kuhifadhia chakula unaoendelea kujengwa katika eneo maalum lililotengwa na Manispaa ya Sumbawanga kwaajili ya uwekezaji wa viwanda pamoja na maghala lililopo Kanondo katika Kata ya Ntendo na hivyo kuwataka wamiliki wengine walionunua viwanja katika eneo hilo kuhakikisha wanawekeza ili kuongeza ajira.

Amesema kuwa ujenzi huo wa vihenge ni mkubwa na unagemewa kutoa ajira mbalimbali na hivyo kuwataka wananchi wa mji wa sumbawanga na maeneo mengi  ya Mkoa kutoa kuchangamkia fursa ya ajira katika ujenzi utakaogharimu karibu shilingi bilioni 15 na hivyo kuwataka Wakala wa Taifa wa hifadhi ya Chakula (NFRA) Sumbawanga kuhakikisha wanasimamia vizuri kwa msaada na ushauri kutoka Wakala wa Majengo Tanzania wakihakikisha mkandarasi hafanyi makosa.
Mkuu wa Mkoa wa Rukwa Mh. Joachim Wangabo alipotembelea eneo maalum la viwanda la Kanondo linalojengwa Vihenge vya Kisasa vya kuhifadhia mahindi kwa zaidi ya tani 25,000 na NFRA

“Tulichelewa kuanza huu ujenzi lakini tulitaka huu ujenzi wa vihenge uje katika eneo hili la viwanda la Kanondo, Hii kazi naona mmeanza vizuri pamoja na kuchelewa tangu mwezi wa saba, tunategemea mwezi wa saba mwakani hivi vihenge sita viwe vimekamilika pamoja na ghala lake moja na uwezo wa vihenge pamoja na ghala ni kuhifadhi tani 26,000 na vikikamilika NFRA watakuwa na uwezo wa kuhifadhi tani 59,500 hii ni mara mbili ya uwezo tulionao sasa hivi, hivyo tunawahamasisha wakulima walime mahindi kwa wingi, uhakika wa soko upo,” Alisisitiza.

Wakati akitoa taarifa ya ujenzi huo Meneja wa NFRA kanda ya Sumbwanga Abdillah Nyangasa alisema kuwa NFRA wana maghala katika maeneo matatu ndani ya mkoa wa Rukwa moja likiwa Halmasharu ya Wilaya ya Sumbawanga katika mji mdogo wa Laela na mawili yakiwa katika Manispaa ya Sumbawanga katika eneo la Mazwi pamoja na eneo la Kanondo.

“Kwa upande wa Mazwi tuna maghala yenye uwezo wa kuhifadhi tani 18,500 ambapo hali yake mengi ni machakavu yanahitaji ukarabati pia mazwi hapo hapo tuna ghala la tani 4000 ambalo nalo ni chakavu na lilitakiwa kufanyiwa ukarabati kama mradi huu ungefanyika pale lakini hapo mazwi kuna maghala mawili ya tani 3000 na kufanya tani 6000 ambayo hayo hayahitaji ukarabati na ndipotulimohifadhia mahindi, lakini kuna ghala la Laela ambalo lina uwezo wa kuhafadhi tani 5000 hili linahitaji ukarabati kidogo kwa ndani, lakini pia kuna mradi huu mpya wa kanondo,” Alisema.

Kwa upande wake Mkurugenzi wa manispaa ya Sumbawanga Jacob Mtalitinya alisema kuwa Eneo hilo la Viwanda na maghala lina viwanja 103 na viwanja 43 tayari vimeshauzwa na kuongeza kuwa ujio wa ujenzi wa vihenge hivyo utasaidia kuongeza thamani ya eneo hilo kwasababu ilikuwa inaonekana miundombinu bado haijafika lakini kutokana na ujenzi wa vihenge hivyo halmashauri imefanikisha kufikisha umeme na maji katika eneo hilo na kuongeza kuwa Manispaa inamradi mkubwa wa maji unaotarajiwa kusambaza maji katika eneo hilo.

“Tunawaomba wananchi wa Sumbawanga na wawekezaji kutoka nje kuja kuwekeza kwani sasa eneo letu lipo hai na limeanza kufanyiwa kazi, waje wawekeze viwanda mbalimbali, hata wafanyabiashara wetu wa pale mjini lakini mheshimiwa mkuu wa mkoa kwa kuongeza tunategemea nasi Manispaa kuchukua viwanja viwili ambapo tutajenga sehemu kwaajili ya wafanyabiashara wadogowadogo walipo pale mjini waweze kuhamia hapa,” Alimalizia.

 Ujenzi huo wa vihenge vipya vya kisasa unaojengwa na mkandarasi Elerai Construction Company Limited kwa ufadhili wa Serikali ya Poland wenye thamani ya Shilingi bilioni 13.6 unatarajiwa kumalizika mwezi July, 2020 na kuongeza uwezo wa kuhifadhi chakula kutoka tani 33,500 za sasa hadi kufikia tani 59,500 na hivyo kuongeza ununuzi wa zao la mahindi wa NFRA kutoka kwa wakulima. 


Friday, September 13, 2019

Mkurugenzi Manispaa ya Sumbawanga apita masokoni kuhamasisha vikundi kuomba mikopo.


Mkurugenzi wa Manispaa ya Sumbawanga James Mtalitinya ameendelea kuwahamasisha vijana, wanawake na watu wenye ulemavu kuhakikisha wanajiunga katika vikundi ili kuweza kupata fursa ya kupewa mikopo ili kuweza kujiajiri hali itakayopelekea kupunga wimbi la wasio na ajira na hatimae kujiongezea kipato.

Amesema kuwa moja ya majukumu ya Halmashauri ya Manispaa ya Sumbawanga ni kutoa mikopo ya asilimia 10 kwa wanawake, vijana na watu wenye ulemavu na kuongeza kuwa katika mwaka wa fedha 2018/2019 halmashauri ilitoa shilingi milioni 253 na kusisitiza kuwa bado kuna milioni 32 zilizovuka mwaka ambapo kwa mwaka wa fedha 2019/2020 halmashauri inatakiwa kutoa shilingi milioni 230.

“Kufikia Mwezi wa 10 tarehe 15 tunategemea kutoa kiasi cha shilingi milino 120 ikiwa ni makusanyo ya robo ya kwanza kwa maana ya Julai – Septemba, kwahiyo tunaomba wananchi wa bangwe pamoja na wananchi wa Sumbawanga wajiunge katika vikundi visivypongua watu watano mpaka kumi halafu waainishe shughuli wanayofanya na waje waombe mkopo wa kiasi chochote, tutawakagua na baada ya hapo tutawapatia mkopo,” alimalizia.

Mkurugenzi wa manispaa ya Sumbawanga Jacob Mtalitinya

Ameyasema hayo wakati wa ziara ya Mkuu wa Mkoa wa Rukwa Mh. Joachim Wangabo walipokuwa wakitembelea masoko yaliyopo katika mji wa Sumbawanga ili kujionea hali halisi ya maendeleo ya biashara na kujua changamoto mbalimbali wanazokumbana nazo wananchi katika masoko hayo.


Rais Magufuli atekeleza 79% ya ahadi za barabara katika mji wa Namanyere Rukwa.


Mkuu wa mkoa wa Rukwa Mh. Joachim Wangabo amesifu juhudi za Rais Dkt. John Pombe Magufuli kuhakikisha anatekeleza ahadi zake alizoahidi kipindi cha kampeni baada ya kutembelea barabara zinzoendelea kujengwa katika mji mdogo wa Namanyere, Wilayani Nkasi na kuona kasi ya ujenzi wa barabara hizo ikiendelea vizuri.

Amesema kuwa ahadi ya mheshimiwa rais ni kujenga barabara zenye jumla ya kilometa tano katika mji na mpaka kufikia mwezi Disemba mwaka 2019 zitakuwa zimefikia jumla ya kilometa 3.95 ambayo ni sawa na asilimia 79 ya utekelezaji wa ahadi zake na hivyo kumtaka mkandarasi nayeendelea na ujenzi wa barabara ya kilometa moja afanye haraka kumalizia ujenzi huo ili wananchi waweze kutumia barabara ambazo zimefungwa kwa muda wa mwaka ili kupisha ujenzi.
Mkuu wa Mkoa wa Rukwa Mh. Joachim Wangabo (wa tatu toka kushoto) akiwa na wataalamu mbalimbali wakati wa ukaguzi wa barabara zilizopo chini ya usimamizi wa Wakala wa barabara za Mjini na Vijijini Tanzania (TARURA) katika mji wa Namanyere katika Wilaya ya Nkasi.

“Huyu mkandarasi anayejenga kilometa moja kwa kiwango cha lami kazi yake inasuasua kwasababu mradi huu ulipaswa kukamilika mwezi wa sita mwaka huu na sasa ni mwezi wa tisa, kazi haijakamilika lakini pia kuna kero ambazo zipo ndani ya barabara hizi, kuna vivuko vimewekwa vya muda na kwengine hakuna, watu wanapata shida kuvuka mitaro kwenda kufanya biashara zao lakini pia kwenye matolea ya barabara kuna vifusi, hivyo nakupa siku 12 utoe vifusi na ujenge vivuko kwenye mitaro,” Alisisitiza.

Awali akitoa taarifa ya utekelezaji wa ujenzi wa barabara hizo ili kutimiza ahadi za Mheshimiwa Rais Mratibu wa Wakala wa Barabara za Mijini na Vijiji (TARURA) Mhandisi Boniface William alisema kuwa mbali na kujitahidi kuhakikisha barabara hizo zinajengwa kwa wakati lakini kumekuwa na changamoto ya ufinyu wa bajeti pamoja na upatikanaji wa malighafi za ujenzi wa barabara hizo hasa kokoto.

“katika utekelezaji wa hii miradi kumekuwa na changamoto mbalimbali, changamoto mojawapo ni ufinyu wa bajeti, fedha tunayotengewa kulingana na hali halisi ya ‘site’ unakuta ile fedha ni kidogo kiasi kwamba kama ile barabara ya salala ilikuwa tutengeneze kilometa moja lakini kwa milioni 350 tulishindwa kutengeneza kilometa moja kwahiyo tukaweza kutengeneza mita 700 pekee, tatizo jingine ni malighafi kwa maana ya kuwa na chanzo kimoja cha kokoto katika mkoa, hii inachelewesha kazi,” Alisema.

Katika hatua nyingine, Mh. Wangabo wakati alipomaliza kutrembelea barabara zenye jumla ya kilometa moja katika manispaa ya Sumbawanga amewataka wakandarasi wazawa wanaopewa kazi za ujenzi na TARURA kuhakikisha wanaheshimu na kuzingatia masharti ya mikataba ili kufanya kazi kwa wakati na kuongeza kuwa ikiwa wakandarasi hao hawataonyesha uaminifu katika kazi hizo ndogo itakuwa vigumu kwao kupewa miradi mingine mikubwa.

Katika mwaka wa fedha wa 2019/2020 Wakala wa Barabara za Mijini na Vijijini (TARURA) Wilaya ya Nkasi wametengewa bajeti ya shilingi milioni 500 wakati TARURA upande wa Manispaa ya Sumbawanga wametengewa bajeti ya shilingi milioni 460 ili kuendelea kukamilisha ujenzi wa barabara katika kutimiza ahadi za Rais Dkt. John Pombe Magufuli.


RC Wangabo ataka shida ya maji Namanyere ifanyiwe kazi kabla ya 2020


Mkuu wa Mkoa wa Rukwa Mh. Joachim Wangabo ameitaka Mamlaka ya Maji Safi Sumbawanga (SUWASA) kukaa na Wizara ya Maji kuona namna ya kuweza kumaliza shida ya maji katika mji mdogo wa Namanyere, Wilayani Nkasi ili wananchi waweze kuepukana na shida hiyo ya muda mrefu na hatimae kuwa na Imani na serikali juu ya utekelezaji wa ahadi zake kwa wananchi.

Amesema kuwa awali wananchi waliaminishwa kuwa baada ya upanuzi wa bwawa la mfili shida ya maji ingekuwa imekwisha, lakini matokeo yake baada ya upanuzi huo bado shida ya maji imeendelea kuwepo ambapo sasa kuna mradi wa ujenzi wa matenki mapya ambayo hayatakidhi mahitaji ya maji katika mji huo unaokuwa kwa kasi na hivyo kuwataka kujipanga kumaliza tatizo hilo.

“Ilani ya Uchaguzi ya Chama cha Mapinduzi inasema huku kwenye miji mikuu ya wilaya inatakiwa kupata maji kwa asilimia 85, ninyi mtatoa asilimia 46, sasa SUWASA mkae na Wataalamu wa Wizara husika ya Maji muandae utaratibu ukae tayari tayari juu ya namna gani ya kuweza kukimbiza huu mradi, watu wamechoshwa na subiri subiri hata waswahili wanasema ngoja ngoja yaumiza matumbo,” Alisisitiza.

Ameyasema hayo alipotembelea mradi wa uboreshaji wa huduma ya maji safi unaoendelea kujengwa katika mji mdogo wa Namanyere ili kujionea maendeleo ya mradi huo pamoja na kujua changamoto zinazoukabili na hatimae kuona namna ya kuupatia ufumbuzi huku akiwa ameambata na kamati ya ulinzi na Usalama ya mkoa pamoja na wataalamu wengine kutoka ofisi ya mkuu wa mkoa wa Rukwa.

Awali akisoma taarifa ya mradi huo meneja wa SUWASA Mhandisi Gibon Nzowa alisema kuwa shida inayosababisha mradi huo kutofikia asilimia 85 ya upatikanaji wa maji katika mji huo ni kutokana na kutokuwepo kwa mtandao wa kuyasambaza maji hayo kwa kilomita 15 lakini maji yalipo katika chanzo yanatosheleza kwa asilimia 85 endapo tatizo la mtandao litatuliwa na kisha kueleza shughuli za mradi huo.

“Kazi zinazotekelezwa ni ununuzi na ufungaji wa pampu mbili za kusukumia maji, ulazaji wa bomba kuu kutoka bwawa la mfili hadi kwenye tenki takriban kilomita 3.7, pia ujenzi wa tenki la lita 500,000 ambalo limeinuliwa kwa mita 12 ili kuwezesha maeneo mengi ya Namanyere kupata maji, ulazaji wa mtandao wa usambazaji maji kwa kilomita 6.5, vile vile katika mradi huu kutakuwa na dira za maji za kuunganishia wateja,” Alimalizia

Kwa upande wake Mkuu wa Wilaya ya Nkasi Mh. Said Mtanda wakati akielezea hatua walizochukua kupambana kumaliza tatizo hilo la upatikanaji wa maji katika mji wa Namanyere alisema kuwa kama wilaya walikaa na kuandika andiko na kuhitaji Shilingi Bilioni 2.5 na kuliwasilisha wizarani ambapo fedha hiyo ilipunguzwa hadi kufikia shilingi Bilioni 1.5 hali iliyopunguza asilimia ya upatikanaji wa maji katika mji huo.

“Tulitafuta wataalamu wakaandika huu mradi, wakaleta kwangu tukapitia tukaona ni mradi wa Shilingi bilioni 2.5 ambayo hiyo ingetuwezesha kusambaza maji maeneo yote yenye upungufu wa maji katika mji wetu, kwahiyo Waziri alipokuja tulimkabidhi akasema tuwape SUWASA nao baada ya kuipiti walipeleka wizarani ambapo wakapunguza kiwango cha fedha, huu mradi ulikuwa ni wa Bilioni 1.8 lakini Mheshimiwa waziri akasema ipungue hadi kufikia shilingi bilioni 1.5 lakini kama ingekuwa ule mradi wetu wa Shilingi bilioni 2.5 tungekuwa na mtandao wa kilomita 15 kuliko huu wa sasa wa kilomita 6,” alisema.

Mkuu wa mkoa wa Rukwa Mh. Joachim Wangabo.

Mradi huo wa uboreshaji wa huduma ya maji safi katika mji wa Namanyere unatarajiwa kumalizika mwezi Mei mwaka 2020 na kugharimu shilingi Bilioni 1.58 fedha zinazotolewa na serikali huku ukitarajiwa kuhifadhi maji kutoka lita 350,000 hadi lita 850,000 na kufikia asilimia 46 ya uaptikanaji wa maji katika mji huo.

Tuesday, September 10, 2019

RC Wangabo avitaka vyama vya Ushirika kujiepusha na madeni


Mkuu wa mkoa wa Rukwa Mh. Joachim Wangabo amevitaka vyama vya msingi vya ushirika mkoani Rukwa kuhakikisha wanalipa madeni wanayodaiwa na wadau wa kilimo ikiwemo mabenki pamoja na wauzaji mbalimbali wa pembejeo ili wadau hao waweze kuendeleza uaminifu na hatimae kuwa na mahusiano mazuri yatakayoleta maendeleo ya wananchi katika mkoa.
Mkuu wa Mkoa wa Rukwa Mh. Joachim Wangabo 

Amesema kuwa kutolipa madeni chama kinajiweka katika mazingira ya kutokopesheka na wadau kukosa uaminifu hata kwa vyama vingine na kunasababisha wadau hao kushindwa kufikisha huduma kwa wakulima na hatimae kilimo kukosa tija, vyama vya ushirika kuyumba  na kuongeza kuwa dawa pekee ya kukopa ni kulipa.

“ Vyama vya Msingi vina madeni tena madeni makubwa, kwa mfanokuna kile chama cha Katazi AMCOS pamoja na Rukwa Farmers vyote vipo kule Wilaya ya Kalambo vinadaiwa shilingi milioni 395, vyama viwili sijajua kwengine lakini pale Mpui wanadaiwa Shilingi Milioni 485 au 490, lakini wao wamejipanga nilikuta mzigo mkubwa sana wa mahindi, tani zaidi ya 600, na waliniambia deni wanamaliza, lakini vile vyama viwili hata mahindi yaliyoko kwenye maghala yalikuwa hayazidi magunia 250 sasa watalipaje deni, ukiuliza wanasema kwamba hawakupata mavuno ya kutosha, lakini nje ya hapo wanauza” Alieleza.

Hivyo alitoa rai kwa vyama vya ushirika kuliangalia jambo hilo kwa karibu kwa kuchambua vyama vyote vinavyodaiwa, wadau wanaowadai, siku waliyokopa na siku wanayotakiwa kurudisha mikopo, aina ya mikopo,  walichorejesha tangu kukopa ili kuwa na orodha kamili na kuwafuatilia katika urejeshaji wa mikopo hiyo kwani kwa kufanya hivyo watajenga Imani kwa wanaowakopesha na hatimae kukopesha zaidi.

Mh. Wangabo aliyasema hayo alipokuwa akifungua mkutano wa Chama Kikuu cha Ushirika cha Ufipa Cooperative Union Ltd (UCU) katika mkutano uliowajumuisha wadau wa kilimo katika mkoa ili kuona namna ya kuinua kilimo chenye tija pamoja na kuhuisha ushirika ndani ya mkoa.

Aidha, Wakati akiwasilisha mada yake kwa wakulima Meneja wa Benki ya Manedeleo ya Kilimo Tanzania (TADB) Kanda ya Nyanda za juu Kusini Dickson Pangamawe alisema kuwa viongozi wa shirika ndio nguzo ya wanaushirika, hivyo ni jukumu lao kuhakikisha kuwa wanachama wanafaidika na ushirika huo na kuhakikisha kuwa mikopo wanayoipata inawafikia wakulima wao.

“ Nyinyi ndio mtakaotujengea uamini kule kwa wakulima, sisi kama benki ya kilimo tuna fursa ya mikopo ya aina zote, kama wakulima wapo ‘serious’ na uongozi wao utasimama imara, tutawakopesha wataweza kufanya shughuli zao za kilimo bila ya shida yoyote, kwahiyo nitoe rai kwa viongozi wa ushirika, mara nyingi kumekuwa na shida na wakulima wanashindwa kuwa waaminifu kwasababu wanashindwa kusimamiana vyema katika vyama vyao, kwahiyo nyie muwe imara ili kuturuhusu sisi tuweze kuwawezesha,” Alisisitiza.

Kwa upande wake Meneja wa Kanda wa Wakala wa Taifa wa Hifadhi ya Chakula (NFRA) Sumbawanga Abdillahi Nyangasa alishauri kuwa ili wakulima waweze kujikomboa alitaja mambo matatu makubwa ikiwemo Fedha, Masoko na Mkulima mwenyewe na kuongeza kuwa wao kama NFRA wanasimama katika kumhakikishia mkulima masoko na hivyo wakulima wanahitaji fedha za mikopo kutoka katika mabenki na wao kuwa tayari kutumia fedha hizo kwaajili ya manufaa ya kilimo chao.

“Mtazamo wa NFRA ni kuwafanya Wana Rukwa na Watanzania wengine tubadilike tuwe na uwezo wa kuuza bidhaa zetu za mazao ndani na nje ya nchi, bahati nzuri mkoa umeshaweza kulichukua hili na kulifanyia mkakati kwa maana ya ndugu zetu maafisa ugani, kazi ianzie shambani, tuna kiwango kikubwa sana tunachokipoteza cha mahindi tunayolima kwa hatua ya mwisho ya ubora, asilimia 30 mpaka 40 wakati mwingine mazao yanaharibika kwasababu ya kutozingatia kilimo chenye tija,” Alisitiza.  

Mkoa wa Rukwa una matrekta 124 yanayomilikiwa na wakulima binafsi hali iliyopelekea Mh. Wangabo kuvitaka vyama vya ushirika kusimamia kauli mbiu yao ya “ Ushirika, Pamoja tujenge uchumi” kwa kuanza na kumiliki matrekta ili kuwawezesha wanachama wao waweze kulima kwa tija na kuongeza mazao na sio kutegemea kilimo cha majembe au kutumia wanyama.


Thursday, August 29, 2019

RC Wangabo ataka ujenzi wa VETA Sumbawanga kuharakishwa ili kuanza kudahili wanafunzi.


Mkuu wa Mkoa wa Rukwa Mh. Joachim Wangabo amemtaka mkandarasi wa Kampuni ya Tender International kuhakikisha anamaliza ujenzi wa Chuo cha Ufundi VETA kilichopo Kata ya Sumbawanga Wenyeji Wilayani Sumbawanga ndani ya mwaka huu ili kufikia mwezi Januari mwaka 2020 kianze kudahili wanafunzi katika fani mbalimbali za ufundi.

Chuo hicho ambacho ujenzi wake ulitakiwa kumalizika Septemba 21, 2019 bado haujakamilika kutokana na Mkandarasi huyo kutegemea fedha za ujenzi kutoka serikalini na hivyo kuomba kuongezewa muda wa miezi minne ili aweze kumalizia ambapo hadi sasa ameshalipwa shilingi bilioni 2.6 kwaajili ya ujenzi wa majengo 22 ikiwemo karakana mbalimbali za mafunzo, mabweni, madarasa na nyumba za watumishi.

Mbali na changamoto hiyo Mh. Wangabo pia amepongeza kiwango cha ubora wa majengo hayo ambayo kwasasa yapo katika hatua ya kupauliwa na kuongeza kuwa kama kamati ya Ulinzi na Usalama ya Mkoa imeridhishwa na kiwango cha majengo ya chuo hicho hadi hapo kilipofikia.

“VETA hii ilianza kujengwa mwaka jana mwezi wa tisa na ilitegemewa iwe imemalizika mwaka huu, kipindi cha mwaka mmoja. Lakini kumekuwa na changamoto za hapa na pale upande wa mkandarasi n ahata upande wa wizara inayohusika, basi hizi changamoto zimefikia kwenye hatua ambayo sasa tunaweza kwenda vizuri, Mkandarasi ameomba kuongezewa miezi minne na hii mimi nitaifuatilia, kuhakikisha kwamba hii ‘extention’ inakwenda haraka ili ikamilike ili ianze kuchukua wananfunzi Januari 2020,” Alisema.

Ameyasema hayo leo tarehe 29.8.2019 alipotembelea katika eneo la Ujenzi wa Chuo hicho kinachotarajiwa kudahili wanafunzi 600 wa masomo ya muda mrefu na wanafunzi 2000 wa masomo ya muda mfupi katika fani za umeme wa majumbani, umeme wa magari, ushonaji, mapishi, ufundi wa kompyuta, ufundi wa magari, useremala, na usindikaji wa chakula.

Awali akizungumza wakati wa kutoa taarifa ya ujenzi wa Chuo hicho karani wa Mradi Mhandisi Jeremiah Longido alisema kuwa endapo serikali italipa fedha za ujenzi kwa wakati wana uhakika kwamba majengo hayo yatakamilika katika kipindi hicho cha miezi minne waliyoiomba na hatimae kufikia mwezi January, 2020 kuanza kudahili wanafunzi.

“Kama ‘Cash flow’ itakwenda vizuri, hii miezi minne kama kazi itafanyika kwa nguvu tunaweza kumaliza kazi, kwasababi amelipwa ‘certificate’ namba nne ambayo ni kama milioni 130 lakini kuna ‘certificate’ namba tano kama milioni 640 amabyo ipo tayari ambapo mda wowote anaweza kulipwa kwahiyo kama hiyo atapokea inamaanisha tutakuwa vizuri,” Alisema.

Katika Hatua nyingine, Mh. Wangabo amesikitishwa na kasi ya konokono katika ujenzi wa hospitali za Wilaya ambazo kwa mujinbu wa tarehe za Ofisi ya Rais Tawala za Mikoa na Serikali za Mitaa, hospitali hizo ziliongezewa muda wa kuisha kwake na zilitakiwa kumalizika na kukabidhiwa tarehe 31.8.2019 kwaajili ya kuanza kutumika.

“Kasi yenu ni ndogo, kasi ya konokono, vifaa havipo hata ujenzi katika jengo hili la utawala hakuna, hali kwakweli ni hovyo na si nzuri ni mbaya muda umekwishaisha, kwahiyo nashindwa hata kuwaambia kuna siku za nyongeza kwasababu kuna ‘deadline’ ya TAMISEMI. Sasa fanyeni juu chini kwa siku zilizobakia mmalize hapa sasa sijui mtaweka hema ama mtafanyaje lakini fanyeni juu chini hii kazi iishe,” Alisisitiza

Ameyasema hayo baada ya kukagua ujenzi wa hospitali ya Wilaya ya Sumbawanga akiwa na kamati ya Ulinzi na Usalama ya mkoa, viongozi na wataalamu wa wilaya ya Sumbawanga ambapo kabla ya kufika hapo pia alitembelea hospitali ya Wilaya ya Nkasi na hospitali ya Wilaya ya Kalambo.


Wanaoharibu Miundombinu ya Daraja la Shilingi biloni 17.7 Kukamatwa


Mkuu wa Mkoa wa Rukwa Mh. Joachim Wangabo ameliagiza jeshi la polisi mkoa wa Rukwa kuhakikisha wanafanya msako kwa wale wote waliohusika kuharibu na kung’oa ‘reflectors’ zilizowekwa kwenye vyuma vya kingo za barabara katika darala la Momba lililopo mpakani mwa Mkoa wa Rukwa na Mkoa wa Songwe katika Bonde la Ziwa Rukwa, Wilaya ya Sumbawanga.

Amesema kuwa ung’oaji huo wa ‘reflectors’ hizo unaweza kusababisha ajali itakayopelekea kupoteza maisha ya watu nyakati za usiku na kupoteza malengo ya ujenzi wa daraja hilo na kuonya kutoendelea kwa uharibifu huo wenye lengo la kurudisha nyuma maendeleo ya wananchi, mkoa na nchi kwa ujumla.

“Jeshi la Polisi mzisake bodaboda zote ambazo zikikutwa zina ‘reflector’ hizi, kwasababu zinafahamika kama hamjui, iwe kwenye bodaboda, iwe kwenye baiskeli, kamata na fikisha mahakamani, hatuwezi kufumbia macho uharibifu huu, utakuja kesho utakuwa wameng’oa kila kitu wataharibu. Kumbukeni kwamba bilioni 17.7 zimelala hapa, na manufaa yote mmeyasikia na ninyi mnajua zaidi, sasa mnataka kuturudisha wapi, hatutakubali uharibifu wa aina yoyote ile,” Alisisitiza.

Mh. Wangabo aliyasema hayo tarehe 28.8.2019 alipotembelea daraja la Mto Momba kuona maendeleo ya daraja hilo lililojengwa na mkandarasi Jianxi Geo – Engineering (Group) Corporation kutoka China na kusimamiwa na Wakala wa Barabara Tanzania (TANROADS) kupitia kitengo chake cha ushauri wa miradi TANROADS Engineering Consulting Unit (TECU) ambapo hadi sasa daraja hilo limeshakamilika kwa asilimia 100.

Wakati akitoa taarifa ya ujenzi wa Daraja hilo Kaimu Meneja wa Wakala wa Barabara (TANROADS) Mkoa wa Rukwa Mhandisi Jetrovas August alisema kuwa kazi ya nyongeza ambayo ilikuwa nje ya mkataba ni kuweka taa katika barabara ya km 1.125 ambayo ni kiunganisho cha mikoa ya Songwe na Rukwa na kuongeza kuwamiongoni mwa changamoto ni un’goaji wa ‘reflector’ katika barabara hiyo.
 
“Pamoja na Mkandarasi kumaliza na kukabidhi mradi kwa serikali kumeanza kujitokeza uharibifu wa baadhi ya miundombinu ya barabara, moja ya uharibifu ambao tayari umeanza kujitokeza ni ung’oaji wa ‘reflector’ zilizowekwa kwenye vyuma (guardrail) vya kingo la tuta la barabara kwaajili ya kuongozea magari na vyombo vingine vya usafiri wakati wa usiku,” Alisema.

Katika Hatua nyingine, Mh. Wangabo amewapongeza wakandarasi pamoja na Mhandisi Mshauri wa  ya ujenzi wa barabara ya kutoka Sumbawanga – Matai – Kasanga yenye urefu wa Km 107 ambayo imefikia asilimia 91 ya ujenzina kubainisha kuwa barabara hiyo imetimiza miaka tisa tangua kuanza kwa ujenzi wake lakini pamoja na mambo mengine yaliyosababisha hayo ni maelewano mabovu yaliyokuwepo baina ya Mkandarasi na Mshauri jambo ambalo hivi sasa limemalizika na kazi inakwenda vizuri.

“Mkandarasi pamoja na ‘Consultant’ hay ani matokeo ya kuelewana, ‘Consultant’ na Mkandarasi wameelewana na wanafanya kazi usiku na mchana na matokeo yake mnayaona kazi imefanyika vizuri sana mimi nawapa pongezi sana, kwahiyo mimi nategemea kama mlivyoniambi kwenye taarifa yenu kwamba kufikia tarehe 30 mwezi Septemba barabara hii itakuwa imekwishafika bandarini kasanga na tutakuwa tumemaliza mchezo lambda marekebisho ya hapa na pale,” Alieleza.
Mradi huo wa barabara ya Sumbawanga – Matai – Kasanga unafadhiliwa na Serikali ya Tanzania na kugharimu Shilingi Bilioni 133.2 ambapo ujenzi wake unategemewa kumalizika mwezi Septemba mwaka 2019 chini ya Mkandarasi Joint Venture of China Railway 15G/New Century Company Ltd.

Stendi ya Mabasi Sumbawanga Kuwa ya Mfano Mikoa ya Nyanda za juu kusini


Mkuu wa Mkoa wa Rukwa Mh.Joachim Wangabo amewataka wananchi wa Mji wa Sumbawanga pamoja na wakandarasi wa ujenzi wa stendi ya mabasi katika mji wa Sumbawanga kutohujumu miundombinu ya eneo hilo na badala yake wasaidie kuimarisha ulinzi na wakandarasi kujenga kwa uzalendo ili kituo hicho kiweze kuwa nembo ya mkoa wa Rukwa.
Mhandisi wa Manispaa Suleiman Mziray (T-shirt ya Zambarau) akitoa maelezo ya uzio unaozunguka stendi ya Mabasi Sumbawanga Kwa Mkuu wa Mkoa na Kamati ya ulinzi na Usalama pamoja na viongozi na wataalamu wengine waliofika kukagua ujenzi wa stendi hiyo. 

Amesema kuwa hajawahi kuona ndani ya jengo lastendi kukiwa na vyumba vya kulala wageni, migahawa,  mabanda ya mamalishe, sehemu ya kuegeshea bodaboda na bajaji pamojana mabasi  na kufananisha eneo hilo na kiwanda kwakutarajiwa kuzalisha ajira kwa wananchi wa mkoa wa Rukwa.

“Stendi hii katika Manispaa ya Sumbwanga itakuwani nembo ya Mkoa wa Rukwa, Sisi Wana Rukwa tutajivunia sana hii stendi , stendi ambayo sijaona popote ambapo kuna vyumba vya kulala ndani ya stendi, iko hapa, kuna ‘restaurant’ kuna mabanda ya mama lishe kuna sehemu ya bodaboda, bajaji, kuna mabasi, kuna kila aina ya mambo inajitosheleza, hiki kitakuwa nikama kiwanda kidogo maana kitaajiri watu wengi sana hapa, wale wanaojenga hapa wasihujumu miundombinu hii,” Alisema.

Ameyasema hayo leo tarehe 28.8.2019 alipotembelea stendi hiyo ya mabasi yam ji wa Sumbawanga iliyoanza kujengwa mwanzoni mwa mwezi wa tano mwaka 2019 na kutarajiwa kumalizika mwezi Disemba mwaka huu akiwa ameambatana na Kamati ya ulinzi na Usalama ya Mkoa, Mkuu wa Wilaya ya Sumbawanga pamoja na Wataaalamu wengine kutoka Ofisi ya mkuu wa Mkoa na Manispaa ya Sumbawanga.

Akitoa taarifa ya ujenzi huo Mhandisi wa Manispaa ya Sumbawanga Suleimani Mziray alisema kuwa kutokana na ufinyu wa fedha stendi hiyo itajengwa kwa awamu mbili na mpaka sasa ujenzi huo umefikia asilimia 40 na bado mkandarasi anaendelea na ujenzi na kuongeza kuwa katika jengo hilo kutakuwa na eneo la kuwahifadhi abiria zaidi ya 400 watakaokuwa wakisubiri safari zao za nje na ndani ya mkoa.

“Kutokana na Ufinyu wa fedha ujenzi wa kituo cha mabasi eneo la katumba Azimio utafanyika kwa awamu mbili ambapo mpaka sasa kazi zimekwishafanyika kwa asilimia 40 na bado inaendelea kwenye maeno tofauti kulinngana na Mkataba, jengo Kubwa litakuwa nae neo kwaajili ya kusubiria abiria ambalo litakuwa na uwezo wa kubeba abiria 400,” Alisema

Aidha Msimamizi wa ujenzi huo kwa upande wa Mkandarasi Said Rajabu Mbelwa ameongeza kuwa ili kufika kwenye ghorofa ya kwanza ya jengo hilo kutakuwa na Lifti ili kuwasaidia walemavu na wale ambao afya zao haziruhusu kutumia ngazi

“Hapa kuna Lifti ambayo itatumika kwaajili ya Walemavu n ahata ukiwa mgonjwa kwasababu itakuwa siyo rahisi kupita kwenye ngazi ya kupanda kwa mguu kama una matatizo ya afya, kwahiyo imewekwa kwaajili ya walemavu na watu amba afya zao si nzuri sana,” Aliongezea.

Hadi kufikia hatua hiyo mkandarasi SUMRY ENTERPRISES LTD tayari ameshalipwa Shilingi Bilioni 1.72 ambayo ni sawa na asilimia 28.89 ya Shilingi bilioni 5.95 ambayo ni gaharama ya ujenzi wa stendi hiyo, ambayo inategemewa kuwa na vyumba vya kulala waheni, vymba maalumu vya kufanyia mazoezi(Gym), kituo cha polisi, sehemu ya migahawa mikubwa na mama lishe na sehemu za kuegeshea Baiskeli, Bodaboda, Bajaji, Teksi na mabasi yanayosafirisha abiria ndani ya Mkoa na nje ya Mkoa.


Saturday, August 17, 2019

Wananchi Rukwa waendelea kujitolea damu kwaajili ya majeruhi ajali ya Morogoro


Timu ya Afya ya mkoa wa Rukwa inayojishughulisha na ukusanyaji wa damu kutekeleza maelekezo ya mkuu wa mkoa huo Mh. Joachim Wangabo ijumaa hii iliweka makazi yake nje ya Ofisi ya mkuu wa mkoa ili kukusanya damu kutoka kwa watumishi wa ofisi hiyo pamoja na wananchi mbalimbali wanaofika hapo kupata huduma mbalimbali.
Mkuu wa Wilaya ya Sumbawanga Dkt. Khalfan Haule akiwa amelala katika kitanda maalum kwaajili ya kujitolea damu kusaidia ili kuunga mkono juhudi za mkoa wa Rukwa kusaidia majeruhi wa ajali ya Morogoro iliyoua zaidi ya watu 90

Mkuu wa Wilaya ya Sumbawanga Dkt. Khalfan Haule (kushoto) akiendelea kuwahamasisha watumishi wa Ofisi ya Mkuu wa mkoa wa Rukwa kujitolea damu ili kuunga mkono juhudi za mkoa pamoja na kufuata maelekezo ya mkuu wa mkoa huo katika kuwasaidia majeruhi waliungua kutokana na kulipukwa kwa lori katika eneo la msamvu mkoani Morogoro na kusababisha vifo vya watu zaidi ya 90. 

Mmoja wa Watumishi wa Ofisi ya mkuu wa mkoa wa Rukwa Joyce Mwanandenje akiendelea kujitolea damu kuunga mkono juhudi za mkoa kusaidia majeruhi waliopata ajali Mkoani Morgoro kutokana na kulipuka kwa lori la mafuta wiki moja iliyopita. 

Timu hiyo inayoongozwa na mganga mkuu wa mkoa ilianza kutekeleza maelekezo hayo tangu tarehe 14.8.2019 kwa kupita katika maeneo mbalimbali ya mji wa Sumbawanga kukusanya damu hiyo kwa kushirikiana na timu nyingine za Afya katika ngazi ya halmashauri ambazo nazo zinaendelea na zoezi hilo katika halmashauri nne za mkoa huo.

Taarifa hiyo imethibitishwa na mganga mkuu wa mkoa wa Rukwa Dkt. Boniface Kasululu wakati alipokuwa akiongea na vyombo vya habari huku akiendelea kuwahamasisha watumishi wa serikali, waumini wa madhehebu mbalimbali ya dini, viongozi wa kisiasa pamoja na wananchi wenye mapenzi mema kujitolea kutoa damu ili kuweza kuwasaidia majeruhi walioungua kutokana na kulipuka kwa lori la Mafuta katika eneo la Msamvu mkoani Morogoro Wiki moja iliyopita.

“Sisi kama wataalamu tumejipanga baada ya mheshimiwa mkuu wa mkoa kutoa haya maelekezo, kazi hii inafanyika katika halmashauri zote nne za mkoa wa Rukwa na katika halmashauri zetu kuna timu maalum ya ukusanyaji wa damu, kwahiyo toka agizo limetolewa timu zetu katika halmashauri zinaendelea na hiyo kazi,” Alisema.

Akimuwakilisha Mkuu wa mkoa wa Rukwa katika zoezi hilo la kuwahamasisha watumishi wa serikali kujitolea damu, mkuu wa wilaya ya Sumbawanga Dkt. Khalfan Haule ameendelea pia kuwahamasisha wananchi kuanzia ngazi za mitaa na vijiji waendelee kujitolea damu kupitia timu hiyo ya mkoa pamoja na timu za halmashauri zilizoteuliwa maalum kwaajili ya zoezi hilo lakini pia kufika katika hospitali ya mkoa kushiriki kujitolea damu.

“Damu inahitajika tunawaomba wananchi waendelee kujitolea kama ambavyo ratiba ilivyotangazwa, hii timu itakuwa inapita kwenye mitaa yetu kwenye kata zetu lakini pia kwa wale ambao watakuwa wamekosa hiyo nafasi, bado hospitali yetu ya mkoa itaweza kuwapokea waweze kuchangia damu kwaajili ya kuwanuru wenzetu ambao wamepata ajali kule Morogoro,” Alieleza.

Aidha, mmoja wa watumishi waliojitolea kuchangia damu Elvira Malema alieleza kuwa mahitaji ya damu ni makubwa na kujitolea damu hiyo huenda kukaokoa majeruhi wengine waliobakia na kudhani kuwa kama damu ingelikuwa ya kutosha huenda vifo hivyo visingevuka idadi iliyopo na hivyo kuwaomba wananchi  ambao hawajafanya maamuzi ya kujitolea damu washiriki kufanya hivyo.
“Zoezi hili sikwamba linachukua muda mwingi, ni dakika tu unatolewa damu kama una uzito unaostahili, una damu ya kutosha, nawahamasisha watu wajitokeze kuchangia kwasababu leo unaweza ukaona ni kitu kinachotokea kwa mtu mwingine kwasababu hakijakufika kwenye familia yako ukadharau, kwahiyo nawahamasisha watu wajitokeze kuchangia,” Alisema.

Kwa upande wake mmoja wa madereva wa boda boda aliyefika katika ofisi hiyo kupata huduma Ayoub Wangoma ameishukuru serikali kwa kuwahamasisha madereva wa bodaboda kuchangia damu kwa kutanabahisha kuwa madereva hao wanahitaji damu kutokana na shughuli zao zinazowaweka barabarani kila kukicha na hivyo kuguswa na kampeni hiyo na hatimae kuamua kuunga mkono juhudi za mkoa kwa kujitolea damu.

“Sisi ka vijana tunaojishughulisha na bodaboda imetugusa sana na kujitoa kwa moyo kwasababu jambo kama lile waliopoteza maisha pale kuna ndugu zetu kuna wazazi wetu, kwahiyo tunapojitolea damu leo kwao kesho kwetu, inawezekana jambo kama lile tunaliongelea kwa udogo lakini mbeleni huko linaweza kutokea likatuhusu sisi wenyewe bodaboda kulingana na shughuli tunazofanya,” Alisema.

Zoezi la uchangiaji wa damu kwaajili ya kusaidia majeruhi wa ajali ya Morogoro inatarajiwa kuamalizika tarehe 18.8.2019 na taarifa ya jumla ya zoezi hilo kutolewa tarehe 19.8.2019 na hatimae damu hiyo kusafirishwa kwenda sehemu husika kulingaana na malekezo ya Mkuu wa mkoa wa Rukwa Mh. Joachim Wangabo.  

Thursday, August 15, 2019

RC Wangabo apania kufufua kasi ya vyama vya ushirika kuimarisha uchumi wa wananchi Rukwa


Mkuu wa mkoa wa Rukwa Mh. Joachim Wangabo amevitaka vyama vya ushirika katika Mkoa wa Rukwa kujiunga na chama kikuu cha Ushirika cha Mkoa ili kuwa na umoja na nguvu katika kutafuta masoko ya mazao yao, kuachana na walanguzi, kulima kwa tija na kuzalisha mazao bora kwa kupata pembejeo kwa wakati na hatimae kufanya kazi kwa karibu na wataalamu wa kilimo waliomo ndani ya mkoa.

Mkuu wa Mkoa wa Rukwa Mh. Joachim Wangabo. 
Amesema kuwa chama kikuu cha Ushirika cha Mkoa Ufipa Cooperative Union Ltd (UCU) ni chama kipya na kinahitahi nguvu ya vyama vya ushirika vya mkoa mzima ili kiwe na uongozi uliokamilika, kiweze kufanya kazi kwa ufanisi na kuweza kumnyanyua mkulima wa mkoa wa Rukwa kutoka alipo sasa na kuwa wakulima wa hadhi ya kimataifa.

“Mkulima ana mahangaiko makubwa sana, sasa huu ushirika ni chombo cha kumkomboa mkulima, ni chombo cha kunyanyua uchumi wa mkulima, ni chombo cha kuikomboa Rukwa, ni chombo cha kuikomboa nchi yetu ya Tanzania, nchi ambayo sasa inaelekea kwenye uchumi wa kati wa viwanda, sasa ushirika ni kitovu cha uzalishaji n ani kitovu cha viwanda, sasa kila tunachokifanya tuchote kwenye ngazi ya mkulima, lazima tujue namba moja kwenye viwanda ni uzalishaji na malighafi za kilimo zinatokana na wakulima, ni lazima azalishe na akizalisha zaidi tutakuwa na viwanda endelevu kutokana na uzalishaji mwingi” Alisisitiza

Ameongeza kuwa hali ya hewa ya mkoa wa Rukwa ni sawa na hali ya hewa za mikoa yote ya nyanda za juu kusini ambayo mikoa hiyo inaongoza kwa kulima matunda na mbogamboga na hivyo kuwa na mazao mengi mbadala kuliko kutegemea mahindi ambapo soko linaposhuka na wananchi wanakosa pa kukimbilia na hivyo kuwataka wajitafakari kutoka katika kilimo cha kutegemea mahindi na hatimae kuanza kulima mbogamboga na matunda ya kutosha kwaajili ya matumizi ya wana-Rukwa ili kupunguza udumavu pamoja na kuuza nje ya mikoa na hatimae nje ya nchi.

Mh. Wangabo ameyasema hayo katika Mkutano wa Vyama vya ushirika Mkoani humo aliouitisha ili kuwatafutia wanachama wapya chama kikuu cha Ushirika cha Mkoa pamoja na kusikia mipango yao waliyojiwekea kuanzia wa mawaka mmoja hadi miaka kumi katika kuelekea Tanzania ya uchumi wa kati chini ya Rais Dkt. John Pombe Magufuli.

Akitoa taarifa fupi ya hali ya vyama vya ushirika Kaimu Mrajisi vyama vya Ushirika wa mkoa wa mkoa wa Rukwa Anosisye Mbetwa amesema kuwa miongoni mwa mafanikio ya mkoa ni kuanzisha chama cha kikuu cha ushirika (UCU) ambacho kimesajiliwa tarehe 9.1.2019 kikiwa na wanachama 58 na kwa ujumla hadi kufikia tarhe 31.6.2019 mkoa umeweza kutoa mikopo yenye thamani ya Shilingi 17,781,678,000/=.

“Vyama vya Ushirika 81 vimeweza kukaguliwa na shirika la Ukaguzi la vyama vya Ushirika nchini (COASCO) na kuhusu masoko kwa mwaka 2018/2019 soko la Serikali kwa maana ya NFRA liliwezesha upatikanaji wa shilingi 3,010,467,520/= kwaajili ya ununuzi wa mazao ya wakulima kupitia vyama vya Ushirika vya msingi,” Alisema.

Akielezea mpango wa Miaka 10 ya Chama kikuu cha Ushirika Mkoani Rukwa Makamu Mwenyekiti wa UCU Gaspar Chipeta amesema kuwa lengo kuu la chama hicho ni kuwaleta pamoja wakulima wa mkoa wa huo, kuwa na sauti moja, kutambua mahitaji ya pembejeo kwa kila mkulima kupitia vyama vya msingi pamoja na kutafuta soko lenye bei nzuri ili kuweza kuinua uchumi wa wakulima.

“Mkakati mwingi ni kuhakikisha ndani ya hii miaka kumi kuna matokeo ya uboreshwaji wa miundombinu inayotumika katika kilimo, asilimia kubwa ya wakulima katika mkoa wa Rukwa hawatumii miundombinu ya kisasa, kama ulivyosema awali kwamab lazima twende kwenye kilimo cha kisasa, sisi kama chama kikuu tunataka walau kila chama cha ushirika cha msingi, Kila AMCOS iweze kumiliki walau Trekta ambalo litaweza kuwasaidia wakulima wa vyama hivyo,” Alisema.

Kwa upande wake Meneja wa kanda ya Sumbawanga Wakala wa Taifa wa Hiafadhi ya Chakula (NFRA) Abdillah Nyangasa ametahadharisha wakulima wengi wamekuwa wakilima eneo kubwa lakini mazao yanayopelekwa sokoni hayafanani na viwango na hivyo kuwataka kuzingatia ubora wa mazao katika hatua ya mwisho ambayo inapelekwa kwa mlaji, hali ambayo ipo katika mazao mengi yanayolimwa katika Mkoa.

“ Eneo la Ubora baada ya mavuno ni la msingi mno katika kupata soko zuri, wakati mwingine unaweza kuwa umevuna vizuri lakini unaleta mahindi yako sokoni utaambiwa pepeta, utaambiwa pembua mahindi yaliyooza, ondoa punji zilizoharibika na wadudu, ile ni hatua ya ziada mabayo uneifanya mwenyewe kwenye ngazi ya kaya na kwenye hatua ya chama cha msingi, tukazane kuhakikisha mazao yetu tunayaandaa vizuri kwaajili ya soko ili kupunguza gharama zisizo za lazima,” Alifafanua.


Mkoa wa Rukwa una jumla ya vyama vya Ushirika 172, kati ya hivyo 87 ni vyama vya ushirika wa Akiba na Mikopo (SACCOS), 74 ni vyama vya Mazao na Masoko (AMCOS), 4 vyama vya Uvuvi, 3 vyama vya Wafugaji, 1 chama cha Wafuga Nyuki, 3 vyama vya wauza Bidhaa/huduma na Chama Kikuu cha Ushirika kimoja vyenye jumla ya wanachama 19,321.

Tuesday, August 13, 2019

Wananchi Rukwa kushiriki kuchangia Damu kusaidia Majeruhi ajali ya Morogoro

Wananchi Rukwa kushiriki kuchangia Damu kusaidia Majeruhi ajali ya Morogoro


Mkuu wa Mkoa wa Rukwa Mh. Joachim Wangabo amewataka wananchi wa mkoa huo kushiriki katika zoezi la kuchangia damu litakalofanyika kwa muda wa siku tano kuanzia tarehe 14 hadi 18.8.2019 katika halmashauri nne za mkoa, ili kusaidia majeruhi walioungua na moto uliosababishwa na kulipuka kwa lori la Mafuta katika ajali iliyotokea eneo la Msavu mkoani Morogoro, na kusababisha vifo vya watu 76 na majeruhi 54.
Mkuu wa Mkoa wa Rukwa Mh. Joachim Wangabo

Mh. Wangabo amesema kuwa zoezi hilo litawajumuisha Waendesha Bodaboda na Bajaji, Madereva wa Magari, Vijana, Watumishi wa Serikali, Wanafunzi, Vyama za Siasa, Madhehebu ya Dini, Viongozi mbalimbali na wale wote wenye mapenzi mema na moyo wa kujitolea kwaajili ya majeruhi hao.

“Nafahamu kuwa mtu yeyote aliyeungua sehemu yoyote ya mwili, miongoni mwa madhara makubwa anayoyapata ni pamoja na kupoteza kiasi kikubwa cha maji mwilini (Dehydration) na kupungukiwa damu mwilini (Anaemia).  Kwa hiyo natoa wito na kuwaomba Wananchi wa Mkoa wa Rukwa kuchangia Damu kwa ajili ya wenzetu majeruhi wanaoendelea na matibabu.  Damu hiyo pamoja na salamu zetu za pole tutaiwasilisha kwa Dkt. Kebwe Steven Kebwe, Mkuu wa Mkoa wa Morogoro,” Alisema.

Aidha Mh. Wangabo kwa niaba ya Wananchi wa Mkoa wa Rukwa anaungana na Mhe. Dkt. John Pombe Joseph Magufuli, Rais wa Jamhuri ya Muungano wa Tanzania kutoa pole kwa Mkuu wa Mkoa wa Morogoro pamoja na Viongozi wa Mkoa huo, Familia za Marehemu, Ndugu, Jamaa na Marafiki kwa kuondokewa na Wapendwa wao.  Na kumuomba Mwenyezi Mungu awape Moyo wa Subira na Uvumilivu katika kipindi hiki kigumu.

“Mungu awape pumziko la milele waliopoteza uhai na awaponye Majeruhi wote wanaoendelea na matibabu katika Hospitali ya Taifa ya Muhimbili pamoja na hospitali ya Rufaa Mkoa wa Morogoro.  ‘Bwana Alitoa na Bwana Alitwaa Jina lake lihimidiwe’.” Alimalizia.

Mh. Wangabo ametoa maelekezo hayo kabla ya kuanza kwa kikao cha baraza la madiwani katika Halmashauri ya Manispaa ya Sumbawanga kilichohusu utekelezaji wa hoja za ukaguzi na mapendekezo ya mdhibiti na mkaguzi mkuu wa hesabu za serikali nchini.

Thursday, August 1, 2019

DC Mtanda awatahadharisha kinababa wenye tabia ya kunyonya maziwa ya mama


Mkuu wa Wilaya ya Nkasi Mh. Said Mtanda amewatahadharisha kinababa wenye tabia ya kunyonya maziwa ya kinamama wanaonyonyesha kwani hicho ni chakula maalum kwaajili ya mtoto aliyezaliwa na yeyote anayefanya hivyo anadhulumu haki ya mtoto ambaye hutegemea maziwa ya mama kwa muda wa miezi sita bila ya kula chakula cha aina yoyote.  

Amesema kuwa kazi kubwa ya kinababa ni kuwawezesha kinamama kupata lishe bora ili wawe na afya thabiti kutoa maziwa ya kutosha na kuweza kuwanyonyesha watoto wao na kuongeza kuwa katika mkoa wa Rukwa asilimia 81 ya watoto wenye umri chini ya miezi sita wanalishwa vyakula vingine vya ziada, jambo ambalo halikubaliki kwa maendeleo ya mtoto.

Mkuu wa Wilaya ya Nkasi Mh. Said Mtanda

“Ujumbe wa Leo ni kwamba watoto wadogo chini ya Miezi Sita ndio wanaotakiwa kunyonyeshwa, kwahiyo kinababa na wao wenye kupenda maziwa ya baba waache kwasababu hicho sio chakula chao ni lishe kwa watoto wachanga, tusidhulumu haki za watoto za unyonyeshaji, tuache tabia ya kunyonya maziwa ya mama kwa wasiohusika,” Alisisitiza.
Baadhi ya kinamama wanaonyonyesha wakipita kwa maandamano maalum mbele ya mgeni rasmi katika uzinduzi wa maadhimisho ya wiki ya Unyonyeshaji iliyofanyika katika kijiji cha Kisumba Wilayani Kalambo.

Aidha alisema kuwa tafiti zinaonesha kuwa asilimia 17 ya watoto wenye umri chini ya miezi 6 wananyonyeshwa maziwa ya mama pekee bila kupewa kinywaji au chakula kingine kama inavyoshauriwa na Shirika la Afya Duniani. Hii ina maana kuwa asilimia 83 ya watoto wenye umri huo hawanyonyeshwi ipasavyo.

Mh. Mtanda aliyasema hayo katika uzinduzi wa maadhimisho ya wiki ya unyonyeshaji kimkoa katika Kijiji cha Kisumba, kilichopo Wilaya ya Kalambo akimwakilisha aliyetakiwa kuwa mgeni rasmi wa uzinduzi huo Mkuu wa mkoa wa Rukwa Mh. Joachim Wangabo.

Kwa upande wake Kaimu Katibu Tawala wa Mkoa wa Rukwa Albinus Mgonya aliisifu timu ya afya ya Mkoa kwa kuwezesha kufanyika uzinduzi wa maadhimisho ya wiki ya unyonyeshaji katika Kijiji cha kisumba kutokana na Kijiji hicho kuwa na kinamama wengi wanaonyonyesha.

“Katika Kijiji hiki Mheshimiwa mgeni rasmi kuna Kaya 1300, na kwa takwimu ambazo tunazo kupitia idara yetu ya afya kinamama wanaonyonyesha watoto katika Kijiji hiki cha Kisumba ni 234, hivyo utaona kwamba tumekuja kuhakikisha kuwa ujumbe huu unafika kwa wadau kwa njia muafaka,” Alieleza.

Halikadhalika alisema kuwa maadhimisho hayo yankwenda sambamba na utekelezaji wa mradi wa Lishe Endelevu unaolenga kuongeza idadi ya watoto wenye umri kati ya miezi 6 – 23 kuhakikisha kwamba wanapata vyakula vyenye mchanganyiko sahihi na kusisitiza kuwa ni muhimu kinababa kushiriki katika maadhimisho hayo ili wawe msaada mkubwa kwa kinamama.

Wakati akitoa neno la Shukrani Meneja wa Mradi wa Lishe Endelevu Ali Omar alishukuru ushirikiano anaoupata kutoka serikalini na kuwasisitiza kinamama kuwa unyonyeshaji wa maziwa ya mama huchangia kwa kiasi kikubwa katika kuboresha afya, kulinda uhai na maisha ya mtoto.

Asilimia 67 ya watoto wa umri kuanzia miezi 6 – 23 wanapewa vyakula ambavyo havina mchanganyiko wa kutosha, yaani mlo usiokamilika, hali inayodhihirisha kuwa, taratibu duni za ulishaji watoto ni mojawapo ya sababu za utapiamlo katika Mkoa wa Rukwa.

Wednesday, July 31, 2019

“Ushiriki wa Kinababa ni muhimu katika wiki ya Unyonyeshaji” RC Wangabo.


Mkuu wa Mkoa wa Rukwa Mh. Joachim Wangabo amewataka wananchi wa mkoa wa Rukwa hasa kinababa kushiriki katika maadhimisho ya wiki ya unyonyeshaji yanayofanyika kila mwaka kuanzia tarehe 1 hadi 7 ya Mwezi wa Nane ambapo Tanzania huungana na nchi nyingine duniani katika maadhimisho hayo.

Mkuu wa Mkoa wa Rukwa Mh. Joachim Wangabo (kushoto) akiogea na Waandishi wa habari katika maandalizi ya maadhimisho ya wiki ya Unyonyeshaji Mkoani Rukwa. 

Amesema kuwa wiki hiyo ya unyonyeshaji itumike katika mapambano dhidi ya udumavu ambao mkoa wa Rukwa unaongoza kitaifa kwa kuwa na udumavu wa asilimia 56.3 na hivyo kuwataka wananchi kushiriki kwa ukamilifu katika maadhimisho hayo yatakayofanyika katika vijiji 339 vya mkoa huo ili kupata elimu stahiki itakayowawezesha kuwaepusha watoto na udumavu.

‘Msingi Mkubwa kabisa wa kupambana na udumavu uko hapa kwenye unyonyeshaji, ni lazima mama anyonyeshe mtoto wake ipasavyo, kina mama huwa wanapuuza wengine kufanya jukumu hili kwasababu labda ya masuala ya kiuchumi lakini pia hata kijamii na kimazoea, sasa hii elimu ndio inapswa kuitoa ndani ya siku hizi saba,kwasababu inakwenda katika vijiji vyote, kinamama wakisikia huu ujumbe pamoja na jamii kwa ujumla na kinababa wote tutaweza kupambana na udumavu,” Alisisitiza.

Aidha amevitaka vyombo vya habari kushiriki katika kufuatilia utekelezaji wa sheria mbalimbali zinazolinda haki za uzazi na ulishaji wa watoto kwa kufanya tafiti, kuandika au kuripoti matukio mbalimbali kama vile utekelezaji wa haki mbalimbali ikiwemo haki ya kupata likizo ya uzazi.

Mh. Wangabo ameyasema hayo alipokuwa akiongea na waandishi wa habari leo tarehe 31.7.2019 katika maandalizi ya maadhimisho ya wiki ya unyonyeshaji ambayo kimkoa itafanyika katika Kijiji cha Kisumbakati, Wilayani Kalambo ambapo maadhimisho hayo yatakwenda sambamba na siku ya Afya ya Kijiji katika vijiji vyote vya mkoa.

Kwa upande wake Kaimu Mganga Mkuu wa Mkoa wa Rukwa Dkt. Emanuel Mtika alisisittiza kuwa mradi wa Lishe Endelevu ambao unalenga kupunguza udumavu katika Mkoa wa Rukwa umekuja kuongeza kasi ya juhudi za mkoa katika kupambana na udumavu na kuongeza kuwa maadhimisho hayo yanalenga kujenga uelewa wa pamoja katika unyonyeshaji wa mtoto.

“Siku 1000 za makuzi ya mtoto, ukikosea kwenye eneo la unyonyeshaji kuna uwezekano mkubwa sana wa kumuweka mtoto kwenye mazingira magumu, kwahiyo hii inalenga sit u kutoa elimu ya unyonyeshaji lakini pia juu ya maandalizi ya vyakula vya watoto hawa,” Alisema.

Halikadhalika Kaimu Afisa Lishe wa Mkoa Asha Izina alizitaka sekta binafsi kuwapa muda wafanyakazi kina mama wenye watoto ili aweze kuwanyonyesha watoto wao, “Serikali inatia msisitizo kwamba waajiri wahakikishe nao pia wanatoa nafasi au wanatengeneza mazingira ambayo yanakuwa ni Rafiki pale kazini ambapo mama analetewa kazini mtoto wake na kuhakikisha kwamba anamnyonyesha, tukitambua kwamba maziwa ya mama ni ya muhimu kwa afya na maendeleo ya mtoto”.

Kauli mbiu ya mwaka huu 2019 ni: Mwezeshe mama aweze kunyonyesha. Ambayo inasisitiza kuwa kwa pamoja tushirikiane kumwezesha mama aweze kunyonyesha ipasavyo.


Tuesday, July 30, 2019

RC Wangabo atoa wito kwa Wizara kuhusu ukarabati wa MV LIEMBA


Mkuu wa Mkoa wa Rukwa Mh. Joachim Wangabo ametoa wito kwa Wizara ya Ujenzi, Uchukuzi na Mawasiliano kuhusu kuharakisha ukarabati wa meli ya MV Liemba ili kurahisisha usafirishaji wa mizigo na wananchi wanaoishi katika mwambao wa Ziwa Tanzganyika.

Mh. Wangabo amesema kuwa wananchi hao wamekuwa wakiweka maisha yao hatarini kwa kutumia vyombo kama mitumbwi na boti ambavyo usalama wake ni mdogo ukilinganisha na meli kubwa ya MV Liemba ambayo usalama wake ni wa uhakika.

“Nitoe wito kwa wizara husika hii meli ya MV Liemba nimeambiwa hapa kwamba ikipita kwenda Zambia inaitwa ‘Our Baby’ mtoto wetu, sasa huyu mtoto wetu anaulizwa yuko wapi, Zambia wanauliza, sasa Wizara husika twende haraka isimamie hili jambo, MV Liemba itengenezwe, watu maisha yao yapo kwenye hatari kubwa ndani ya hili ziwa Tanganyika”

Mh. Wangabo ameyasema hayo alipotembelea mradi wa usanifu na ujenzi wa bandari ya Kabwe iliyopo kata ya Kabwe katika Wilaya ya Nkasi ili kujionea maendeleo ya ujenzi huo ulioanza tarehe 1 Aprili,2018 ambapo hadi sasa mradi huo umetekelezwa kwa asilimia 52 katika miezi 14 na unatarajiwa kukamilika tarehe 1 Aprili 2020 na kugharimu Shilingi Bilioni 7.49 ambazo ni fedha za Mamlaka ya Bandari nchini.

Eneo la gati ya Bandari ya Kabwe ikiendelea kujengwa katika Ziwa Tanganyika Wilayani Nkasi. 

Naye Mbunge wa jimbo la Nkasi Kaskazini Mh Ali Kessy alieleza kuwa meli hiyo ya MV Liemba ilitakiwa kukamilishwa ukarabati wake tangu mwaka wa fedha 2017/2018 lakini fedha za ukarabati hazikutengwa na kudai kuwa Waziri wa Fedha Mh. Filipo Mpango amemuhakikishia kuwa fedha za ukarabati wa meli hiyo zimetengwa katika bajeti yam waka 2018/2019.  

Kwa upande wake Meneja wa Bandari za Ziwa Tanganyika Pasivo Ntetema amesema kuwa mradi huo unahusisha ujenzi wa gati, jengo la kupumzikia abiria, jengo la mgahawa, ofisi, ghala la kuhifadhia mizigo, nyumba za wafanyakazi na uzio na kuongeza kuwa kwa Bandari ya Kabwe peke yake wastani wa usafirishaji kwa mwezi ni tani 1500 hadi 2000 na mwaka wa fedha 2018/2019 zimesafirishwa tani 20,000

“Pamoja na changamoto za miundombinu lakini utaona kuna ‘access’ nzuri ya watu kupita hapa kwahiyo kukishaboreshwa bandari hii ikakamilika lakini pia miundombinu ya barabara ya kuingia hapa ikakamilika ni Imani yetu watu wa bandari ya kwamba kupitia uongozi wako, kupitia mheshimiwa mbunge na mamlaka zote zinazotawala mkoa wa Rukwa pamoja na serikali kuu, tutaangalia sasa uwezekano wa kuboresha barabara hii kwa kiwango cha lami ili shehena kubwa iweze kupita hapa.

Mamlaka ya Bandari inatekeleza miradi mitatu katika Mkoa wa Rukwa ambayo ni Mradi wa uboreshwaji wa bandari ya Kasanga iliyopo Wilaya ya Kalambo, Ujenzi wa barabara katika Bandari ya Kipili na Mradi wa Usanifu na Ujenzi wa Gati Bandari ya Kabwe zilizopo katika Wilaya ya Nkasi ambapo miradi yote itagharimu shilingi bilioni 12.7