Wednesday, October 17, 2018

Wanafunzi 1,500 kupata nafasi ya kusoma VETA Sumbawanga.


Mkuu wa mkoa wa Rukwa Mh. Joachim Wangabo amewahakikishia wanafunzi wanaokisubiri kwa hamu chuo cha ufundi stadi (VETA) cha Mkoa kuwa kinatarajiwa kukamilika mwezi wa nane mwaka 2019 na kitakuwa na uwezo wa kusomesha wanafunzi 1,500 kwa wakati mmoja.
 
Eneo la Ekari 95 linalojengwa Chuo cha Ufundi Stadi eneo la Kashai, Manispaa ya Sumbawanga. 

Katibu tawala Msaidizi Seksheni ya Serikali za mitaa Albinus Mgonya akipewa ufafanuzi wa ujenzi unaoendelea na Mkandarasi wa ujenzi wa chuo hicho cha VETA wakati alipokwenda kutembela kuona maendeleo ya ujenzi wa Chuo hicho. 

Ujenzi huo ambao umeanza mapema mwezi wa tisa mwaka huu baada ya makabidhiano baina ya VETA makao makuu Dar es Salaam, VETA kanda ya nyanda za juu kusini Mbeya pamoja na Ofisi ya mkuu wa mkoa wa Rukwa kumkabidhi mkandarasi TENDER Intarnational kwaajili ya ujenzi wa chuo hicho huku mshauri elekezi akiwa Sky Architect Consultancy Ltd.

Chuo hicho kinachotarajiwa kujengwa katika manispaa ya Sumbawanga eneo la Kashai (MUVA) lina ukubwa wa Ekari 95, kiwanja ambacho tayari kina hati iliyotolewa mapema mwezi wa tatu mwaka huu kwa umiliki halali wa VETA.

“Gharama za ujenzi za mradi huu ni Tsh. 10,700,488,940.05. Ujenzi ukikamilika chuo kitaweza kuchukua wanafunzi 900 wa kozi ndefu na 600 wa kozi fupi hivyo, kitakuwa na uwezo wa kuchukua jumla ya wanafunzi 1,500.” Alisema.

Mbali na chuo hicho cha VETA cha Sumbawanga, Halmashauri ya Wilaya ya Nkasi pia tayari imekabidhiwa majengo ya aliyekuwa mshauri elekezi wa mradi wa mradi wa barabara ya Sumbawanga – Kibaoni yaliyopo katika kijiji cha Paramawe kwaajili ya kuanzisha chuo cha VETA na hivyo kufanya Mkoa kuwa na vyuo viwili vya VETA.

Daraja la Bil. 17.7 linalounganisha Rukwa na Songwe kukamilika Februari 2019.


Katika kuhakikisha kuwa mawasiliano ya wananchi wa mikoa miwili katika sekta ya uchumi na uzalishaji yanakuwa serikali ya awamu ya tano imeendelea kuboresha hayo kwa kujenga daraja kubwa lenye urefu wa mita 84 linalounganisha Mkoa wa Rukwa na Songwe kupitia kijiji cha Kilyamatundu, bonde la ziwa rukwa katika mto Momba.

Ujenzi wa daraja hilo ulianza mwanzoni mwa mwezi wa nane mwaka 2017 ambapo ulipaswa kukamilika baada ya miezi 13 yaani mwezi wa nane mwaka huu. Aidha kutokana na changamoto za mafuriko ya mto huo wakati wa mvua za masika, kazi za ujenzi ziliahirishwa na kutegemewa kukamilika mwezi wa pili mwaka 2019.
Ujenzi unaendelea wa daraja la mto Momba katika kijiji cha kilyamatundu.

Katibu Tawala msaidizi Secsheni ya Serikali za Mitaa Albinus Mgonya (Kulia)  akiagana na mkandarasi wa ujenzi wa daraja hilo. baada ya kutembelea ili kuona maendeleo ya ujenzi wa daraja hilo.  

Katibu Tawala msaidizi Secsheni ya Serikali za Mitaa Albinus Mgonya (shati la kitenge kushoto)  akitaka maelezo kutoka kwa mshauri elekezi wa ujenzi wa daraja hilo baada ya kulitembelea kujua maendeleo ya ujenzi wa daraja hilo.


Ameyasema hayo katibu tawala msaidizi seksheni ya serikali za mitaa Albinus Mgonya wakati wa kuwasilisha taarifa mbalimbali kwa mkuu wa mkoa wa Rukwa Mh. Joachim Wangabo ambapo amesema gharama ya ujenzi wa daraja hilo Shilingi Bilioni 17.7.

Hadi sasa ujenzi umefikia asilimia 65 ambapo tayari mkandarasi amekwishajenga nguzo (pivers) mbili na kingo (abutments) mbili za upande wa Kilyamatundu na Kamsamba pia ujenzi wa beams na sakafu (deck slab) umekamilika,” Alisema.

Kukamilika kwa Daraja hili kutaongeza fursa za kiuchumi katika eneo la Bonde la Ziwa Rukwa hivyo kuendelea kuifungua Halmashauri ya Wilaya ya Sumbawanga na Mkoa wa Rukwa kwa ujumla.

Hatimae Rukwa wapata hatima ya soko la mahindi.

Kutokana na zao la mahindi kuwa ni zao la chakula na biashara katika mkoa wa Rukwa, kuyumba kwa soko hilo kwa mwaka 2017/2018 kumewafanya wananchi waliowengi kukosa kipato cha uhakika ambacho kingewasaidia kukidhi mahitaji yao mbalimbali.
Mahindi

Ili kuhakikisha kuwa wakulima wanaondokana na kadhia hiyo na hatimae kupata soko la uhakika serikali ya mkoa wa Rukwa imeandaa mikakati mbalimbali kukabiliana na kusuasua huko kwa soko la mahindi.

Akizungumza mbele ya mkuu wa mkoa wa Rukwa, Kaimu Mkuu wa Seksheni ya Uchumi na Uzalishaji Ocran Chengula amesema kuwa serikali ya mkoa umefanya jitihada kadhaa ili kuhakikisha mwananchi wa Rukwa anaondokana na kadhia hiyo ya soko la mahindi na hatimae kupata suluhisho la kuuza mazao yake kwa bei nzuri.
“Tumedhamiria kuwaunganisha wakulima na masoko ya mahindi kama WFP (Worl Food Programme) kupitia  taasisi ya BRITEN (Building Rural Income Trough Enterprise) ikiwa ni pamoja na kuwasaidia wafanyabiashara na wajasiriamali kwa kuwaelekeza taratibu za kufuata ili kukidhi vigezo vya kuuza mazao nje ya nchi.” Alisema
Aidha, Aliongeza kuwa kuviunganisha vikundi vya wakulima (SACCOS na AMCOS) ili kuuza mahindi kwa Wakala wa Hifadhi ya Chakula (NFRA) Sumbawanga. Ambapo ununuzi wa Mahindi meupe utaanza kupitia vikundi hivyo jambo litakalosaidia kuongeza wigo wa soko la Mahindi.
Wakala wa Taifa wa Hifadhi ya Chakula (NFRA) Kanda ya Sumbawanga katika msimu huu wa 2018/2019 wamepanga kununua kiasi cha tani 5,500 tu za mahindi meupe katika Mkoa wa Rukwa, kiasi ambacho ni kidogo kulinganisha na ziada ya tani 453,049.2 zilizozalishwa kwa msimu wa 2017/2018.

Monday, October 15, 2018

Wasanii Rukwa Waomba Uwekezaji kwenye Utayarishaji wa “Audio” na “Video”

Wasanii wa fani mbalimbali mjini Sumbawanga, Mkoani Rukwa wameeleza kilio chao juu ya utayarishaji mbovu wa sauti za muziki na picha za video unaofanywa na watayarishaji waliopo ndani ya mkoa na kuwaomba wadau wa sanaa kutoka katika mikoa iliyoendelea katika fani hiyo kuja kuwekeza ili waweze kuleta ushindani katika sanaa.

Msanii Martin Gongwe akiimba wakati wa mashindano ya Super Nyota yaliyofanyika mjini Sumbawanga na kuendeshwa na Clouds Media Group. 


Kilio hicho kimetolewa baada ya Afisa utamaduni wa Manispaa ya Sumbawanga, Charles Kiheka, kuwaita wasanii hao wa fani mbalimbali ili kujua changamoto mbalimbali wanazokumbana nazo pamoja kuwaelimisha miongozo na taratibu mbalimbali zinazotakiwa kufuatwa ili kutokiuka taratibu za kiserikali katika kufanya shughuli zao za sanaa.

Mmoja wa wasanii wa Hip-hop, Martin Gondwe amesema kuwa ‘studio’ zilizopo zimekosa vifaa vizuri vitakavyomwezesha msanii aliyerekodi nyimbo yake mjini Sumbawanga kuweza kuleta ushindani katika ngazi ya kitaifa na kimataifa.
“Vile vile tukizungumzia upande wa “video”, wasanii wanakuwa wanafanya nyimbo inakuwa na “quality” (ubora) ndogo, “Audio” inakuwa ya kawaida, pamoja na “video” pia inakuwa ya kawaida yaani kila kitu kibovu, huwezi kuifikisha hiyo nyimbo yako sehemu yoyote,” Alisisitiza.

Nae Steven Stanley, msanii wa Hip-hop aliongeza kuwa kutokana na ubovu wa kazi zinazofanywa na watayarishaji wa muziki katika upande wa sauti na picha inapelekea wasanii wengi kushindwa kuwashawishi wadau wa sanaa na hatimae kukosa kusaidiwa ili kuweza kusonga mbele zaidi.
“”Video” zinakuwa ziko “local” kiasi kwamba huwezi ukamshawishi mtu anunue, kwasababu kila mtu anapenda kitu kizuri, kwahiyo mtu akiona “video” nzuri anasema hii nimeipenda na akiona kitu kibaya anasema piga chini, ila ukosefu wa “production” ndio “una-cost” kabisa, kwasababu siwezi nikarekodi nyimbo hapa ambayo “production” ipo “local” halafu nikatuma Dar,” Alibainisha.
Kwa upande wake Charles Kiheka alileza kuwa wasanii hawatakiwi kusubiri sherehe za kiserikali pekee kama fursa ya kujitangaza bali ni jukumu la msanii kuwa mbunifu katika kuandaa matamasha hayo na hatimae kuonana nae ili kuona namna ya kumsaidia katika kukamilisha mipango ya msanii aliyonayo ili kujiongezea kipato kwa kumpa vibali vyote stahiki pamoja na ushauri wa mikataba mbalimbali anayotaka kuingia na wadau wa burudani.
Afisa utamaduni wa Manispaa ya Sumbawanga akitoa elimu kwa wasanii wa Sumbawanga (hawapo pichani) juu ya namna ya kutafuta fursa za kujipatia kipato kwa kuanzisha matamasha mbalimbali.
“Leo hii msanii anakwambia serikali iandae “event” aje “kuperform” wasanii wapo wangapi na matukio ya serikali sio ya kila siku, wewe kama mdau wa sanaa, kama msanii ni jukumu lako kuandaa matukio mbalimbali, unakuja na mipango yako ofisini tunaelekezana namna ya kufanya na kuzitafutia ufumbuzi changamoto unazoweza kukabiliana nazo,”Alisema Kiheka.
Katika juhudi za kuhakikisha wasanii hao wanajifunza namna ya kuandaa matamasha, Kiheka anatarajia kuzindua tamasha la “Amka Kijana, Onesha Kipaji Chako” litakalojumuisha mashindano ya sanaa za fani mbalimbali, kuanzia kuimba, kuigiza, ngoma za asili, pamoja na kucheza nyimbo za kisasa (ku-dance) kabla ya kuisha mwaka 2018.

Manispaa ya Sumbawanga yaibuka mshindi wa kitaifa mbio za mwenge wa uhuru

Halmashauri ya Manispaa ya Sumbawanga mkoani Rukwa imeibuka mshindi wa kitaifa wa mbio za za Mwenge wa Uhuru uliowashwa mwezi April katika viwanja vya magogo Mkoani Geita na na kuzimwa mwezi oktoba siku ya kumbukumbu ya kifo cha Mwl. Julius Nyerere katika Kiwanja Mkwakwani Mkoani Tanga na kukimbizwa katika Halmashauri 195 nchini.
Mkimbiza Mwenge wa Uhuru kitaifa Charles Kabeho ( Kushoto) akimnong'oneza na Mkuu wa Mkoa wa Rukwa Mh. Joachim Wangabo wakati wakisubiri mwenge ukitokea Mkoa wa Katavi

Waziri wa Nchi, Ofisi ya Waziri Mkuu, Sera, Bunge, Ajira, Kazi, Vijana na Walemavu Jenista Mhagama amesema kwamba halmashauri hiyo itapewa zawadi ya kikombe na shilingi milioni tano.

“Mheshimiwa Rais wa Zanzibar naomba sasa nimtaje mshindi wa kitaifa ambae ni Halmashauri ya Manispaa ya Sumbawanga kutoka mkoa wa Rukwa, mshindi huyu watapewa zawadi ya kikombe cheti na fedha taslimu shilingi milioni tano,” Mhagama alisema.
Manispaa ya Sumbawanga ilitumia zaidi ya Shilingi Bilioni 11.2 katika miradi 10 ikiwemo, ujenzi wa kituo cha afya Mazwi, ujenzi wa Zahanati katumba azimio, miradi minne ya maji, ujenzi wa shule mpya, ujenzi wa barabara zaidi ya Km 5.
Wengine ambao wamechukua ushindi na kupewa kikombe na cheti ni Mkoa wa Geita kwa Kuwasha mwenge huo, Mkoa wa Tanga kwa kuuzima mwenge huo, na washindi wengine wa kanda tano ambao watapewa cheti, kikombe na fedha taslim shilingi milioni moja ni Halmashauri ya Jiji la Arusha, Halmashauri ya Wilaya ya Kishapu, Halmashauri ya Wilaya ya Mbulu, Halmashauri ya Wilaya ya Chalinze na Wilaya ya kusini.

Sunday, October 14, 2018

RC Wangabo aeleza mafanikio ya miaka mitatu ya utekelezaji wa Ilani ya CCM Rukwa.


Mkuu wa Mkoa wa Rukwa Mh. Joachim Wangabo ameeleza mafanikio yaliyopatikana katika sekta mbalimbali mkoani wa Rukwa ikiwa ni utekelezaji wa ilani ya Chama Cha Mapinduzi kwa kipindi cha miaka mitatu ya uongozi wa serikali ya awamu ya tanounaosimamiwa na Rais Dkt. John Pombe Magufuli.

 Amesema kuwa huduma za kijamii zikiwemo afya na elimu zimeendelea kuimarika na kuongeza kuwa hadi sasa serikali imetoa shilingi bilioni 4.1 zilizotumika kujenga na kukarabati vituo vya afya 9 pamoja na kutenga shilingi bilioni 1.5 kwaajili ya kuanza ujenzi wa hospitali za wilaya huku katika ngazi ya vijiji serikali imejenga zahanati mpya 19 na nyingine 60 zikiendelea kumaliziwa.

Mkuu wa Mkoa wa Rukwa Mh. Joachim Wangabo 

Katibu Tawala msaidizi seksheni ya Serikali za mitaa Albinus Mgonya akieleza mafanikio yaliyopatikana katika utekelezaji wa Ilani ya Chama cha CCM Kwa Mkoa wa Rukwa wakati alipokuwa akiwasilisha taarifa hiyo kwenye Mkutano wa halamshauri ya Chama Mkoa katika ukumbi wa Manispaa ya Sumbawanga. 

Kwa upande wa elimu Mh. Wangabo amesema kuwa uandikishaji wa darasa la kwanza umeongezeka kwa asilimia 26 toka mwaka 2015 na idadi ya shule zenye kidato cha tano zimeongezeka kutoka shule 10 mwaka 2016 hadi shule 15 mwaka 2018, hii ni sawa na ongezeko la asilimia 50.

“Serikali imeendelea na jitihada za kuboresha sekta ya elimu kwa kuhakikisha madawati yanatengenezwa mashuleni. Aidha, katika kipindi cha mwaka 2015/2016 tulikuwa na madawati 37,311 kwa shule za msingi, meza 21,757 na viti 22,093 kwa shule za Sekondari. Aidha, kwa mwaka 2018 madawati yameongezeka kufikia 80,501 kwa shule za msingi, meza na viti 33,686 kwa sekondari  kufikia mwaka huu 2018.”Alisema.

Kwa upande wa upatikanaji wa maji katika mkoa wa Rukwa umeongezeka kutoka asilimia 45 mwaka 2015 hadi kufikia asilimia 53.3 mwaka 2018 huku serikali ikitenga shilingi bilioni 5.6 kwa bajeti ya mwaka 2018/2019 kwaajili ya kuendelea na ujenzi wa miradi ya maji na kampeni ya usafi wa mazingira mkoani Rukwa.

Aidha, pato la mwanachi katika Mkoa limeongezeka kutoka shilingi 3,714,792 kwa mwaka 2016 hadi kufikia shilingi 4,064,393 mwaka 2017 kwa mujibu wa takwimu za mwezi April, 2018 kutoka ofisi ya takwimu (NBS)

Thursday, October 11, 2018

DC Kalambo awataka wasichana kuanza kijilinda wenyewe kupunguza mimba za utotoni


Mkuu wa Wilaya ya Kalambo Mh. Julieth Binyura amewataka wasichana wa shule za msingi na sekondari kuhakikisha wanaanza kujilinda wenyewe kwa kutojiweka na kujihusisha na mazingira tatanishi wanapotoka shuleni na badala yake waendelee kusaidi kazi za nyumbani na kujisomea wakiwa nyumbani.
Wawakilishi wa watoto wa kike Mkoa wa Rukwa wakionyesha idadi ya watu wanaounga mkono kubadilishwa kwa sheria ya ndoa ya mwaka 1971 kifungu cha 13 na 17 katika maadhimisho ya Siku ya Mtoto wa kike Duniani yaliyofanyika katika viwanja vya Nelson Mandela mjini Sumbawanga. 


Mwanafunzi Beatrice James akisoma maombi ya kubadilishwa kwa sheria ya ndoaya mwaka 1971 kifungu cha 13 na 17 katika maadhimisho ya Siku ya Mtoto wa kike Duniani yaliyofanyika katika viwanja vya Nelson Mandela mjini Sumbawanga. 


Mwanafunzi Beatrice James akimkabidhi maombi ya kubadilishwa kwa sheria ya ndoa mgeni rasmi Mkuu wa Wilaya ya Kalambo Mh. Julieth Binyura kwa niaba ya Mkuu wa Mkoa wa Rukwa Mh. Joachim Wangabo katika Maadhimisho ya Siku ya mtoto wa Kike Duniani yaliyofanyika katika viwanja vya Mandela Mjini Sumbawanga. 

Watoto waliohudhuria katika maadhimisho ya Siku ya Mtoto wa kike Duniani yaliyofanyika katika viwanja vya Nelson Mandela mjini Sumbawanga. 
Watoto waliohudhuria katika maadhimisho ya Siku ya Mtoto wa kike Duniani yaliyofanyika katika viwanja vya Nelson Mandela mjini Sumbawanga. 


Ameyasema hayo katika maadhimisho ya Siku ya Mtoto wa Kike Duniani yaliyofanyika katika uwanja wa Nelson Mandela mjini Sumbawanga huku akimuwakilisha Mkuu wa Mkoa wa Rukwa Mh. Joachim Wangabo kama mgeni rasmi wa maadhimisho hayo.

Pia ametoa wito kwa wazazi na walezi mkoani humo kuhakikisha wanawalinda watoto wa kike lakini ili kupunguza vitendo vya ukatili amewaomba wazazi kushirikiana kujenga mabweni ili kuwahakikishia ulinzi watoto hao.

“Kauli mbiu inasema tuwalinde watoto wa kike, ni kweli tuwalinde kwani tusipofanya hivyo, tutahatarisha nchi yetu na kuhatarisha dunia nzima kwa watoto kukosa maadili mazuri, maadili yanatoka kwetu wazazi, nawaomba wananchi qwote wa Mkoa wa Rukwa tuwalinde watoto wetu wanapokuwa mashuleni na majumbani,” Alisisitiza.

 Awali akisoma risala mbele ya mgeni rasmi mwanafunzi Amina Suleiman amesema kuwa ingawa katika familia nyingi hawatoi kipaumbele cha kuwasomesha watoto wa kike lakini imeshuhudiwa mara kadhaa watoto hao wa kike ndio wanaowalea wazazi.

“Utafiti uliofanywa na wadau mbalimbali wa haki za watoto, umebaini kuwa hali duni ya kiuchumi ya wazazi wengi umechangia watoto wao wa kike kukatisha masomo kwa lengo la kuwaoza au kuwapeleka kufanya kazi za ndani ili waweze kuwasaidia kipato kidogo wanachokipata,” Alibainisha

Halikadhalika aliongeza kuwa shirikala maendeleo ya wasichana linasema kuwa wasichana milioni 39 kati ya umri wa miaka 11 hadi 15 hawamalizi masomo yao.

Kuanzia Julai 2017 hadi Mei 2018 jumla ya wanafunzi 149 wamepata ujauzito katika mkoa wa Rukwa, huku wanafunzi wa shule ya msingi wakiwa 59 na sekondari ni 98. Hatua zilizochukuliwa ni pamoja na watendaji wa kata kufikisha kesi hizo polisi na mahakamani kwa hatua Zaidi na mapaka sasa matukio yote 149yameripotiwa polisi na 7 yapo mahakamani.


Wednesday, October 10, 2018

Serikali yatoa Shilingi Bilioni 1.2 kujenga vituo vya afya vipya Rukwa.


Serikali kupitia Wizara ya Oisi ya Rais Tawala za Mikoa na Serikali za Mitaa imetoa kiasi cha shilingi bilioni 1.2 kwaajili ya ujenzi wa viyuo vipya vya afya katika mkoa wa Rukwa ikiwa na lengo la kuhakikisha wananchi wanapata huduma bora za matibabu katika ngazi zote ambapo tayari mchakato wa ujenzi umeanza.
Mkuu wa Mkoa wa Rukwa Mh. Joachim Wangabo (wa pili toka kulia) baada ya kufanya ukaguzi wa ujenzi wa kituo cha afya mazwi mapema mwaka huu. 

Taarifa hiyo imetolewa na mkuu wa Mkoa wa Rukwa Mh. Joachim Wangabo alipokuwa akifungua kikao cha Kamati ya Ushauri ya Mkoa (RCC) kilichokaliwa tarehe 9.10.2018.

Mh. Wangabo amesema kuwa juhudi hizo zinazofanywa na serikali ya awamu ya tano zitasaidia kuboresha afya za wananchi ikiwemo kupunguza masuala ya udumavu ambapo mkoa wa Rukwa una asilimia 56.3 na kupunga maambukizi ya Virusi vya Ukimwi ambayo yapo asilimia 4.4. kwa kupata elimu kupitia vituo hivyo.

“Serikali katika kuendelea kuipa kipaumbele Sekta ya Afya imeongeza idadi ya vituo vya afya vingine vitatu vijengwe ambavyo ni Kituo cha Afya Pito Katumba Tsh.400,000,000, Kituo cha Afya wapembe Tsh. 400,000,000 na Kituo cha Afya Kanyezi Tsh. 400,000,000 ambapo tayari mchakato wa ujezi umeanza.” Alisema.

Hapo awali serikali ilitoa shilingi bilioni 2.5 kwaajili ya ujenzi na upanuzi wa vituo vya afya sita vya mkoa huo ikiwemo Kituo cha Afya Mazwi katika Manispaa ya Sumbawanga, Kituo cha Afya Nkomolo, Wilayani Nkasi, Vituo viwili vya afya vya Mwimbi na Legeza Mwendo, Wilayani Kalambo na kituo cha Afya Milepa katika halmashauri ya Wilaya ya Sumbawanga.




Halmasahuri Mkoani Rukwa zatenga milioni 79 kununua mbegu za kahawa.


Zao la kahawa ni miongoni mwa mazao matano ya biashara ambayo serikali ya awamu ya tano imeamua kwa dhati kutilia mkazo uzalishaji wake, kwa mkoa wa Rukwa zao hilo ndio zao ambalo limeonekana kustawi kwenye baadhi ya maeneo na kupelekea halmashauri za mkoa huu kutenga shilingi milioni 79 kwaajili ya kununua mbegu ili kuendeleza zao hilo.

Mkuu wa Mkoa wa rukwa Mh. Joachim Wangabo amesema kuwa kama mkoa hatuna budi kutilia mkazo uanzishaji na uendelezaji wa zao hili ili wakulima wetu waweze kuwa na zao la biashara na kubainisha kuwa tayari maeneo kwaajili ya kilimo hicho yameshabainishwa ambapo makampuni, taasisi na wakulima wameonyesha nia ya kulima.

“Eneo la kiasi cha ekari 3,195.83 limebainishwa kwa ajili ya kulimwa zao la kahawa. Jumla ya wakulima 2,266 na taasisi 9 zitajihusisha katika uzalishaji wa kahawa. zikiwemo taasisi za Jeshi la Magereza pamoja na Jeshi la Wananchi Tanzania.”Alisema.
Mkuu wa Mkoa wa Rukwa Mh. Joachim Wangabo akiangalia moja wa mmea wa buni katika kijiji cha katuka kilichopo Wilaya ya kalambo ambapo ndipo kulitoka kahawa bora zaidi Afrika mashariki miongo kadhaa iliyopita. 

Ameyasema hayo katika kikao cha kamati ya ushauri ya mkoa (RCC) kilichofanyika mwezi huu wa nane katika ukumbi wa ofisi ya mkuu wa Mkoa ikijumuisha wadau mbalimbali wa maendeleo, Wabunge, Madiwani, Viongozi wa dini na wataalamu wa Halmashauri na sekretarieti ya mkoa.

Aidha, mbunge wa viti maalum Mkoa wa Rukwa Mh. Aida Khenan amesema kuwa kilimo cha kahawa kinahitaji wakulima wenye uwezo wa kifedha ambao katika mkoa wa rukwa wakulima hao hawapo na kusisitiza kuwa wakulima wa mkoa huo wamezoea kilimo cha muda mfupi.

“kahawa inahitaji fedha na muda, wakulima wetu wamezoea kilimo cha muda mfupi, watakaoweza kumudu kahawa ni wale wenye uwezo, masuala ya madawa na kuhudumia hiyo kahawa, wataalamu wetu wafanye utafiti watuambie zao lipi la kibiashara litaleta tija kwa wananchi wetu hasa katika msimu huu wa kilimo,” Alisema.

Mh. Wangabo alieleza kuwa mkoa umejipanga katika kuhamasisha kilimo cha zao la alizeti kama zao la kibiashara kwani hali ya uzalishaji wa zao hilo kwa sasa hairidhishi na hivyo kutoleta tija kwa wakulima.

“Hali ya uzalishaji wa zao la alizeti katika Mkoa umebaki kuwa ni wastani wa gunia  6.5 za kilo 65  kwa ekari sawa na  tani 1.1 kwa hekta. Tija hii ni ndogo sana ukilinganisha na tija iliyofanyiwa utafiti ya gunia 12-16 kwa ekari ambazo ni sawa na zaidi ya tani 2.00 kwa hekta.” Alibainisha.

Serikali ya Awamu ya Tano imeamua kutilia mkazo uzalishaji wenye tija wa mazao matano ya biashara ambayo ni Korosho, Chai, Kahawa, Tumbaku na Pamba.

RC Wangabo awatahadharisha Wakurugenzi na Madiwani kuhusu mapato.


Mkuu wa mkoa wa Rukwa Mh. Joachim Wangabo amewatahadharisha wakurugenzi wa halmashauri pamojana waheshimiwa madiwani juu ya kuanzisha vyanzo vipya vya mapato ili kuweza kufikia malengo zaidi ya waliyowekewa na Wizara ya Ofisi ya Rais Tawala za Mikoa na Serikali za Mitaa.
Mkuu wa mkoa wa Rukwa Mh. Joachim Wangabo 

Wizara ya OR – TAMISEMI imesema kuwa itawapima wakurugenzi kulingana na makunsanyo ya mapato yao na kuwataka hadi kufikia mwishoni mwa mwaka wa fedha 2018/2019, halmashauri zimetakiwa kufikia asilimia 81 ya ukusanyaji wa mapato.

Katika kuhakikisha azma hiyo inafikiwa Mh. Wanagbo amewaomba waheshimiwa madiwani kuhakikisha kila vikao vyao vinapofanyika agenda ya mapato ipewe kipaumbele na kuwang’ang’ania wakurugenzi na kuwawajibisha wale wote wanaohusika na ukusanyaji wa mapato kwani wao ndio chanzo cha kupata sifa mbaya.

“Waswahili wanasema ‘mchelea mwana kulia hulia yeye’ sasa kama tutawalealea hawa ambao wanatusababishia sisi tusikusanye mapato matokeo yake mkichelea kwenu nyinyi kama viongozi na wawakilishi wa wananchi mtakuja kuhukumiwa kule kwenye kura, “Alisema.

Ameyasema hayo katika kikao cha kamati ya ushauri ya mkoa (RCC) kilichofanyika mwezi huu wa kumi katika ukumbi wa ofisi ya mkuu wa Mkoa ikijumuisha wadau mbalimbali wa maendeleo, Wabunge, Madiwani, Viongozi wa dini na wataalamu wa Halmashauri na sekretarieti ya mkoa.

Aidha, alizipongeza Halmashauri ambazo zimevuka lengo la makusanyo lililowekwa na Wizara kwa mwaka wa fedha 2017/2018 ambapo Halmashuri mbili za Wilaya ya Nkasi pamoja na Wilaya ya Sumbawanga zilikusanya kwa asilimia 90, huku Halmashauri ya Wilaya ya Kalambo ikiwa imekusanya kwa asilimia 63 na Manispaa ya Sumbawanga ikiwa imekusanya asilimia 53.

Viwanda 54 vyaanzishwa Rukwa kabla ya kuisha mwaka 2018


Katika kufikia malengo ya kampeni ya serikali ya “Mkoa Wetu, Viwanda Vyetu” inayolenga ujenzi wa viwanda vipya 100 ikiwemo vikubwa, vya kati na vidogo. Mkoa wa Rukwa hadi kufikia June, 2018 tayari imefikisha nusu ya idadi ya viwanda hivyo huku kila halmashuri ikiwa inakaribia kufikia lengo lake.

Katika kutekeleza kampeni hiyo Mkuu wa mkoa wa Rukwa Mh. Joachim Wangabo aliitaka kila Halmashauri kuhakikisha inaanzisha viwanda 25 ndani ya mwaka mmoja hadi kufikia Desemba 2018 ili kutimiza viwanda 100 katika Mkoa wenye Halmashauri nne.

Kabla ya kampeni hiyo ya viwanda iliyozinduliwa na Waziri wa OR – TAMISEMI Mh. Suleiman Jafo, Mkoa ulikuwa na jumla ya viwanda 901. Lakini tangu kutolewa kwa agizo la Waziri pamoja na Mkuu wa Mkoa, Halmashauri ya Wilaya ya Sumbawanga imeongeza viwanda vidogo 19, Halmashauri ya Wilaya ya Kalambo, viwanda 11, Halamshauri ya Wilaya ya Nkasi, Viwanda 11 na Manispaa ya Sumbawanga, viwanda 13.

Kutokana na ongezeko hilo, sasa Mkoa wa Rukwa una jumla ya viwanda 955. Kupitia kikao cha kamati ya ushauri ya mkoa wa rukwa kilichofanyika mwanzoni mwa mwezi huu wa kumi Mh. Wangabo alitumia fursa hiyo kuendelea kuwahamasisha wajasiliamali na wafanyabiashara waliopo ndani nan je ya mkoa kuhakikisha wanatumia fursa zilizopo mkoani Rukwa kuanzisha viwanda.
Mmoja wa wafanyakazi wa Kiwanda cha Energy Sembe Kilichombo Manispaa ya Sumbawanga akiendelea na kazi yake. 

“Mkoa unaendelea kuhamasisha wawekezaji kuja kuwekeza kwenye masuala mbalimbali ikiwemo ya ujenzi wa viwanda na tayari baadhi ya wadau wanaendelea kuunga mkono juhudi za serikali katika ujenzi wa Viwanda katika Mkoa wetu. Hivyo basi, nitoe wito kwenu tuendelee kushirikiana na kuhamasisha wadau mbalimbali kuja kuwekeza katika Mkoa wetu.” Alisema.

Katika Kuchangia hilo mbunge wa Kwela Mh. Ignus Malocha alimtoa hofu Mkuu wa mkoa na kueleza kuwa changamoto kubwa wanayokabiliana nayo ni kutokuwepo kwa nishati ya umeme katika maeneo mengi ya mkoa wa Rukwa. Na kumuahidi kuwa endapo umeme utapatikana basi kuna wakulima na wafanyabiashra ambao wapo tayari kuanzisha viwanda katika bonde la ziwa Rukwa.

“Katika jambo hili tunapozungumzia masuala ya viwanda, tuanze kuangalia kipaumbele cha kusukuma umeme katika maeneo ambayo yanaweza yakaleta tija na ikaonekana kwa mkoa mzima, kila mtu anataka atumie umeme katika kuzalisha, shida umeme umechelewa lakini wateja wetu wameshatanguliza vifaa vyao kama kujenga magodown na mashine mbalimbali kwaajili ya mpunga, mahindi na samaki, wanasubiri umeme,” Alibainisha.

Kwa upande wake meneja wa Shirika la Umeme Tanzania (TANESCO) Mkoa wa Rukwa Frank Chambua amesema kuwa kikazo kikubwa cha kuchelewesha kufikisha umeme kwenye maeneo 1274 ni bajeti kutoka serikalini na kuwaomba wabunge wa mkoani humo kuendelea kuiomba serikali kuwapatia bajeti ya kutosha ili kufikia maeneo yote ya mkoa.

“Mkoa wa rukwa upo tofauti sana na mikoa mingine, zamani mkoa haukuwa na miundombinu, kwahiyo vijiji vingi havikuendelea sana kuhitaji umeme, sasa baada ya barabara hizi kuisha, vijiji vimekuwa na uhitaji wa umeme ni mkubwa mno, sidhani kama kuna mkoa Tanzania amnbao uhitaji wa umeme ni mkubwa kuliko Rukwa,” Alisema.

Monday, October 8, 2018

Mifugo yatajwa kuwa ni changamoto ya maendeleo ya barabara Mkoani Rukwa.


Meneja wa Wakala wa barabara (TANROAD) Mkoa wa Rukwa Mhandisi Msuka Mkina ameeleza kuwa miongoni mwa changamoto zinazorudisha nyuma ujenzi na matengenezo ya bararabara za mkoani humo ni uwepo wa shughuli za kibinadamu kando ya barabara hizo.

Amesema kuwa uswagaji wa mifugo barabarani husababisha uharibifu mkubwa katika muda mfupi jambo ambalo linarudisha nyuma juhudi za serikali katika kuhakikisha inafikisha miundombinu ya barabara katika maeneo yote ya nchi.
Naibu waziri OR - TAMISEMI na Mbunge wa jimbo la Kalambo mh. Josephat Kandege (wa Kwanza) akifuatiwa na Mwenyekiti wa CCM Mkoa wa Rukwa Reina akifuatiwa na Katibu tawala wa mkoa wa Rukwa Benard Makali, akifuatiwa na Mkuu wa mkoa wa Rukwa mh. Joachim Wangabo pamoja na Mkuu wa Mbunge wa Kwela Mh. Ignus Malocha katika kikao cha Bodi ya barabara. 

Mkuu wa Wilaya ya Nkasi Mh. Said Mtanda (wa kwanza kushoto) akifuatiwa na Mkuu wa Wilaya ya kalambo mh. Julieth Binyura pamoja na wajumbe wengine wa kikao cha bodi ya barabara Mkoani Rukwa wakifuatilia kwa makini kikao hicho. 

Mkuu wa mkoa wa Rukwa Mh. Joachim Wangabo akitoa maelekezo wakati wa kufunga kikao cha bodi ya barabara Mkoani Rukwa. 

“Upitishwaji au uswagaji wa mifugo barabarani hasa ng’ombe ni kitendo ambacho kisababisha uharibifu mkubwa katika barabara tena katika muda mfupi ni tatizo ambalo tunakabiliana nalo hivyo tunawaomba ushirikiano wa viongozi katika kutoa elimu na changanomoto nyingine ni shughuli za kibinadamu zinzzofanywa kwenye vyanzo vya mito kama vile kilimo ambapo mvua ikinyesha huleta athari kubwa,tunaomba sheria ya mazingira itiliwe mkazo” Alisema.

Ameyasema hayo katika kikao cha bodi ya barabara kilichowahusisha wabunge, wakuu wa wilaya, wenyeviti wa halmashauri, wakurugenzi wa halmashauri, kamati ya ulinzi na usalama ya mkoa, wataalamu wa ofisi ya mkuu wa mkoa pamoja na mkuu wa mkoa ambaye ndiye mwenye kiti wa kikao hicho.

Katika kulithibitisha hilo makamu mwenyekiti wa kikao hicho ambae pia ni mbunge wa jimbo la Kwela, Wilaya ya Sumbawanga Mh. Ignus Malocha amesema kuwa kuna umuhimu wa kuingia mikataba na viongozi wa vijiji ama kata ili kudhibiti hali ya uzururaji wa mifugo na kuongeza kuwa sio rahisi kwa wakala wa barabara nchini (TANROAD) kusimamia maeneo hayo.

“Nilichokiona hatujaweka mkazo wa kuwabana viongozi waliopo katika maeneo hayo katika kusimamia suala hili la mifugo, jingine ni uharibifu wa mazingi ambapo kuna maeneo unaona kabisa kwamba hatujawajibika ipasavyo mfano ukitoka mtowisa kuja kijiji cha bwando eneo lote lina bonde, mwanzo kulikuwa na kalavati moja lakini kutokana na uharibifu wa mazingira sasa hivi kumekuwa na vivuko zaidi ya vinne na bado tutaendelea maana ukiangalia eneo lote limelimwa,” Alibainisha.

Kwa upande wake Mwenyekiti wa kikao hicho ambae pia ni mkuu wa mkoa wa Rukwa Mh. Joachim Wangabo amezishukia halmashauri juu ya utendaji mbovu wa kudhibiti mifugo hiyo huku akiwasisitizia wakurugenzi kusimamia sheria za mifugo zilizopo kuanzia katika ngazi ya vijiji ili walipa kodi wa kitanzania waweze kufaidi matunda ya kodi zao katika ujenzi wa barabara.

“Watanzania wanalipa kodi zao, fedha ni nyingi sana, tunazipeleka kwenye miundombinu na kule ambako hakuna tunasikia hapa, kwamba jamani tunahitaji barabara Fulani TARURA barabara Fulani TANROAD lakini udhibiti wa barabara unakuwa sifuri, hiuli jambo nisingependa liendelee na iwe agenda tupate taarifa na tuambiwe namna walivyodhibiti, sio kusema tu kwamba tutafanyia kazi, tusikie wapi barabara imeharibiwa na halmashauri imedhibiti namna gani,”Alisistiza.

Katika mwaka wa fedha 2018/2019 shilingi bilioni 13.8 zimeidhinishwa kwaajili ya matengenezo ya barabara na madaraja na bilioni 2.7 kwaaajili ya miradi ya maendeleo katika Mkoa wa Rukwa.

RC Wangabo akutana na Kaimu balozi wa Marekani nchini

Sunday, October 7, 2018

Kaimu Balozi wa Marekani aahidi kusaidia kupambana na Udumavu Rukwa.


Kaimu balozi wa Marekani nchini Tanzania Inmi Patterson amesikitishwa na hali mbaya ya udumavu iliyopo katika mkoa wa Rukwa na kuahidi namna ya kusaidia kupunguza udumavu huo uliopo ili kuokoa maisha ya watoto na hatimae kuwa na kizazi chenye akili ili kuifikia Tanzania ya viwanda ifikapo mwaka 2025.

Mkuu wa Mkoa wa Rukwa Mh. Joachim Wangabo (kulia) akiongea na Kaimu balozi wa Marekani nchini Tanzania Inmi Patterson. 

Mkuu wa Mkoa wa Rukwa Mh. Joachim Wangabo (wa pili toka kulia) akiongea na Kaimu balozi wa Marekani nchini Tanzania Inmi Patterson (Kushoto) na Kulia ni Katibu Tawala wa Mkoa wa Rukwa Benard Makali



Inmi amesema kuwa siku 1000 za mwanzo ni muhimu sana kwa mtoto mdogo katika kujenga afya ya mwili na akili na endapo mtoto huyo atakosa chakula bora katika siku hizo basi itakuwa ni hasara kwa mtoto lakini kwa taifa pia.

“Kuna maneno mawili ya Kiswahili siyapendi; UDUMAVU na UTAPIAMLO, nchini Tanzania haipendezi kuwa na udumavu na utapiamlo kwasababu chakula kipo cha kutosha, udumavu ni uhalifu, sisi sote tuna wajibu wa kufanya kazi pamoja kupunguza udumavu mpaka sifuri, huu udumavu unaiumiza sana,” Alisema

Kwa upnde wake mkuu wa mkoa wa Rukwa Mh. Joachim Wangabo amesema kuwa Halmashauri kwa kushirikiana na serikali ya mkoa wanao mpango kabambe wa kuhakikisha kuwa udumavu huo unapungua kama sio kuisha kabisa na kutanguliza shukrani kwa kaimu balozi juu ya fikra yake ya kutaka kuusaidia mkoa wa Rukwa kuondokana na udumavu kabisa.

Hali ya udumavu kitaifa ni asilimia 34 na katika mkoa wa Rukwa ni asilimia 56.3.

Halikadhalika kaimu Balozi huyo alisifu serikali ya mkoa wa Rukwa kwa kupambana na kupunguza maambukizi ya kiwango kutoka asilimia 6.2 mpaka asilimia 4.4 na kuwaomba wajitahidi hadi kufikia asilimia 0.  

RC Wangabo avionya vikundi vya kidini visivyofuata sheria.


Mkuu wa Mkoa wa Rukwa Mh. Joachim Wangabo amevionya vikundi vya kidini vinavyoanzishwa baada ya kutokea migogoro kwenye makanisa na misikiti kufuata sheria katika kufanya shughuli zao za kiibada na sio kujianzisha kiholela.
Mkuu wa Mkoa wa Rukwa Mh. Joachim Wangabo akiongea na baadhi ya Viongozi wa Kanisa la KKKT Tanzania. 

Picha ya Pamoja

Amesema kuwa kila mtanzania ana uhuru wa kuabudu akiwa mmoja lakini linapokuja suala la kikundi basi hakuna budi kikundi hicho kifuate taratibu za kujisajili ili kiweze kutambulika na vyombo vya serikali kwani vyombo vyote vya kidini vinatambulika kisheria na vimesajiliwa.

“Imani ya mtu mmoja mmoja mtu aabudu tu hata chini ya meza, popote tu, lakini unapokusanya watu, kwasababu tusipokuwa makini hawa wanaokusanya watu bila kujua wana katiba gani na miongozo ipi, kesho watachoma moto hawa waumini, si mnakumbuka yaliyotokea Uganda, halafu lawama itarudi kwa serikali, hatutaruhusu hilo, ” Alisisitiza.

Amesema kuwa vukundi vinavyojitenga huanzisha mikusanyiko yao katika nyumba za kawaida na hufanya kazi kama kanisa japokuwa hawajasajiliwa, hivyo kama serikali itavitafuta vikundi hivyo na kuhakikisha vinafanya kazi kwa mujibu wa kanuni na taratibu.

Ameyasema hayo alipokuwa akiongea na uongozi wa kanisa la KKKT Tanzania walipomtembelea ofisini kwake.

Thursday, October 4, 2018

“Mizinga aisitumike kama hirizi ya kuzuia tembo bali iwe ni chachu ya ufugaji wa nyuki” RC Wangabo


Mkuu wa mkoa wa Rukwa Mh. Joachim Wangabo amewataka wananchi wananchi wa kijiji cha Kisumba, Wilayani kuhakikisha hawaitumii mizinga waliyopewa na Wakala wa huduma za Misitu (TFS) kinyume na azma ya mizinga hiyo na matokeo yake iwe chachu ya kujitengenezea mizinga mingi zaidi ili  kupata asali nyingi na kuondokana na umasikini.
Naibu Waziri wa Maliasili na Utalii Mh. Japhet Hasunga (kulia akiweka mzinga wa nyuki akisaidiana na Mkuu wa mkoa wa Rukwa Mh. Joachim Wangabo (Kushoto) 

Aidha amewataka wanakijiji hao kuhakikisha hawazibi njia za tembo katika kuweka mizinga ya nyuki kuwazuia, kwani kwa kufanya hivyo kunaweza kusababisha madhara zaidi, na kuwatakaka kuwashirikisha wataalalmu wa wanyamapori ili kujua njia wanazopita tembo na kuziacha.

“Kelele za mivumo ya nyuki ndizo zinazowafukuza tembo na si mzinga. Mizinga tuliyowapeni na kuitundika kwenye mpaka wa Hifadhi ya msitu wa Kalambo na kijiji chenu, isitumike kama hirizi ya kutisha tembo wanaowasumbua bali mnawajibika kuhakikisha ina makundi ya nyuki mazuri na makubwa kuweza kufanikisha azma yenu.” Alisema Wangabo.
Mh. Wangabo ameyasema hayo alipokuwa akisoma hotuba kwa niaba ya mgeni rasmi Naibu Waziri wa Maliasili na Utalii Mh. Japhet Hasunga kwenye maadhimisho ya siku ya kutundika mizinga kitaifa Iliyofanyika katika wilaya ya Kalambo mkoani Rukwa tarehe 03 oktoba 2018.
Katika hotuba hiyo Mh. Wangabo alieleza fursa kadhaa zinazopatikana Katika ufugaji nyuki, zinazoweza kuifikisha nchi katika uchumi wa viwanda na hivyo kuwahimiza wananchi kuhakikisha wanazitumia fursa hizo ikiwemo kuanzisha kiwanda cha kutengeneza zana za ufugaji nyuki kama mizinga na mavazi ya kinga dhidi ya nyuki, kiwanda cha kuchakata na kufungasha na kuyaongezea thamani mazao ya nyuki kama asali, nta, gundi ya nyuki na mengineyo.
“Mojawapo ya faida nyingine za ufugaji nyuki ni kwamba hauhitaji mtaji mkubwa sana na wakati huohuo, raslimali muhimu za ufugaji nyuki tunazo tayari kama; nyuki wenyewe, mimea ya nyuki na watendaji yaani wafugaji nyuki. Kinachohitajika hapa ni elimu zaidi ya ufugaji nyuki.” Alisisitiza.
Awali akisoma taarifa kwa Mgeni rasmi Mkurugenzi msaidizi uendelezaji ufugaji nyuki Allen Kazimoto alisema kuwa Tanzania ina takriban ya hekta milioni 48.1 za misitu ambayo ingeweza kutoa tani 138,000 za asali na tani 9,200 za nta.
“Kutokana na changamoto mbalimbali ni tani 34,000 tu za asali huzalishwa kwa mwaka sawa na asilimia 26 ya uwezo wa uzalishaji na baadhi ya changamoto hizo ni usimamizi na utunzaji dhaifu wa makundi ya nyuki na teknolojia duni au isiyosahihi katika kutengeneza zana za kuhifadhia nyuki hasa mizinga,” Kazimoto alisema.
Maadhimisho hayo yenye kaulimbiu inayosema; “Tuwalinde nyuki watunufaishe katika kilimo na uhifadhi” imeonesha uhitaji mkubwa wa wataalamu wa ufugaji wa nyuki  kwani waliopo katika halmashauri hawatoshelezi huku Mkoa wa Rukwa wenye hekta 147,917 za misitu na wenye uhitaji wa watalaamu wa nyuki 86, una watumishi 12 tu ambao wanategemewa katika halmashuri nne za Mkoa.
Katika maadhimisho hayo Wakala wa Huduma za Misitu (TFS) waligawa mizinga ya nyuki 100 kwa vikundi vipya vitano vya waathirika wa uvamizi wa tembo katika kata ya kisumba. 

RC Wangabo amwaga fedha kwa vikundi vya sanaa


Mkuu wa Mkoa wa Rukwa Mh. Joachim Wangabo ametoa Shilingi 150,000/= kwa vikundi vitatu vya muziki ikiwa ni kuunga mkono juhudi zinazofanywa na vikundi hivyo katika kukuza utamaduni na sanaa ya mtanzania.

“Kila kikundi kilichokuja hapa, vile vitatu navipa shilingi 50,000/=, na hii ni chachu tu kwa makundi mengine, waweze kuona uzito wa kutunza na kuimarisha tamaduni zetu lazima tuendeleze tamaduni zetu, taifa lisilokuwa na utamaduni limelala, na sawa na kufa kabisa,” Alisema.
Aidha, aliwataka vijana kujishughulisha na sanaa za utamaduni ili kulinda na kuenzi na kutopoteza nembo ya taifa na utambulisho kama watanzania na kasha kutumia nafasi hiyo kivipongeza vikundi vitatu; kikundi cha Kwaya ya Sopa, kikundi cha ngoma za utamaduni cha maporomoko na kikundi cha muziki wa kisasa cha Wasafi boys.
Alitoa zawadi hiyo katika maadhimisho ya siku ya utundikaji mizinga kitaifa iliyofanyika katika viwanja vya kijiji cha kisumba, kata ya kisumba, Wilayani Kalambo.